Kobid Klimatikoa

Kobidaroaren gorrienean bideo konspiranoiko bat iritsi zen gure betartera. Han amerikar berri-kate erraldoi bateko arduradunak kamara ezkutu baten aurrean zioen Kobidaren kontuak ez zuela askorako emango eta iazko martxotik aurrera arinduko zela, gero klimaren kontuarekin zetorrela matraka eta hori bai izango zela iraunkor eta mamitsuagoa. Kontuan hartzeko moduko adierazpena egin zitzaidan eta berrogeialdian jarri nuen, sinistu gabe artxibatuz… eta ttak, lehendik ere aipatzen bazen ere, hor daukagu etengabe gau eta egun:

Aldaketa Klimatikoa.

Kobid Klimatikoa beldurrezko pelikulan sartzen hasi gara jendartearen hariak mugitzen dituztenen gidoipean, eta izen hau Paranabirus pelikularen gidoiarekin dituen antzekotasunengatik ezarri diot. Etiketa-banatzaileei pixkat gauzak konplikatze aldera, aurrez esango dut ez diodala Aldaketa Klimatikorik ez dela, Kobidik ez dela esan ez nuen bezala, badaezpada.

Aldaketa Klimatikoa katastrofe beldurgarria da!
Denok hilko gara sufrimentu latzak igaro eta gero!
Planeta guztiari eragiten dio!
Adituek dakite!
Gobernuek eta kapitalak jarriko dituzte geu salbatzeko bitartekoak!
Errudunak gara!
Neurri gogor eta inpopularrak hartu beharko dira!
Agindu guzti-guztiak onartzeko edozein zalantza dutenak, ukazionista, egoista eta ultraeskuindarrak dira!
Helburu klimatikoak burutzeko, munduan dagoen ororen gaineko erabateko
autoritatea gureganatuko dugu gizateriaren liderrok!
Indarrez ezarriko ditugu neurriok, zientzia bakar eta akasgabearen argiak
ematen digun zilegitasunarekin!

Matraka terrorista emango digute prentsa guztietatik batera, berdin dio eskuin espainol edo euskadiko ezker

Eta gure kezkak, beldurrak eta solasak bateratzeko, eguneroko matraka terrorista emango digute prentsa guztietatik batera, berdin dio eskuin espainol edo euskadiko ezker. Beroa dela, hotz, euri edo lehor, ez dago atsedenik, erruduna beti pertsona da, errudunagoa gizona, bere gaiztakeria eta naturarekiko bateraezin genetikoa. Ez da inondik inora gizarte ereduaren eta haren arduradunen akatsa. Hobetu beharreko zibilizazio zoragarri batean bizi gara eta konponbidea egoera honetara eraman gaituen zibilizazio antropozentrikoaren ildoan sakontzea izango da, teknologia eta estraktibismoa indartuko dira, eliteak geroz eta ukiezinago bilakatuta eta guk, hilkor arruntok, hobekuntzetara egokitu beharko dugu ezinbestean.

Ez da faltako hau modu paregabean esplikatuko digun pentsularirik. Ez saiatu bilatzen koherentzia minimo bat dakitzaketenen inposaketei, ez egin galderarik aldaketa klimatikoa eragozteko landa-eremua suntsitzen baldin badute eta iturburuak agortu edo porlanizazio masiboa eragin nahi badute garapen jasangarriaren ugazabek, ez kezkatu zuhaitzak botatzen baldin badituzte haizerrota erraldoiak landatzeko, haiek badakite zertan ari diren.

Ez da faltako hau modu paregabean esplikatuko digun pentsularirik eta ezkerreko buruzahagirik

Eta ezkerreko buruzahagiek esaten digute kosta ahala kosta mendiak presaka desjabetu eta korporazioei eman behar dizkiegula elektrizitate berde burujabea ekoizteko, argindar ekoizpen eredu txiki eta kolektiboak sortzea ez delako nahikoa Gasteizen furgonetak ekoizten dituen korporazio bateko lanpostuak bermatzeko. Beraz, klima salbatzeko, mendia suntsitu, furgonetak ekoizteko, enpresariek langileentzako aberastasuna sor dezaten. Ez nuen nahiko estudiatu gauza batzuk ulertu ahal izateko.

Hori bai, kotxe zaharrak zaborretara bota behar dira ipurtzulotik klima berotzen duen kea botatzen dutelako. Aski diru daukatenek uzki zurituagoa duen kotxea erabili ahal izango dute, klimaren laguna izango den ipurtzuloduna, baina ez galdetu kotxe hori zerekin eta nola ekoitzi den, nondik ote datorren edo ze energiak garraiaturik. Ez galdetu ea kotxe zaharrak biziberritzeak baino kalte handiagoa eragingo duen kotxe berriak ekoizteak, ez galdetu, zure galdera lekuz kanpo dagoelako, prentsak edo Garun Tolare Planetario modernoak ez dielako hori galdetzen bere tertuliakide, aditu eta pentsulariei. Zure galdera gustu txarrekoa da, gidoiz kanpo dago, batez ere ez baldin baduzu paparra titulu, master eta publikazio prestigiodunez dir-dir.

Ez egin galderarik, haiek badakite zertan ari diren. Zure galdera lekuz kanpo dago, gidoiz kanpo dago, zure galdera gustu txarrekoa da

Bat-batean hamabost minutuko hiri berdeaz aditzen duzu eta, konturatu orduko, kontzeptua birus bat bezala zabaldu da fedabideetan eta kolore guztietako pentsulari eta jakintsuak hasi zaizkigu bozgorailu guztietatik haren onurez eta ezinbestekotasunaz burua jaten. Hiri zoragarri horretan hamabost minutura izango dituzu eskura zerbitzu guztiak eta ez duzu handik irten beharko zure beharrak asetzeko. Ez dakiguna da paradisutasun hori Fresnes-en edo Beverly Hills-en bizitzea tokatuko ote zaigun, nork, nola eta nondik hornituko ote gaituen, argi dagoelako ez garela geu, auzotarrok, izango auzoko baliabideez geure beharrak asetzeko gaiak ekoitziko ditugunak.

Honek konfinamendua gogorarazten dit, passkobida orain karbono-pase edo dena delako bilakatuta: Kobid Klimatikoa, nahiz eta oraingoz ez Kobid Farmazeutikoa bezain itxia eta itogarria. Baina nor naiz ba ni pentsatzera ausartzeko ere.