Zedarriak: armagintza eta energia nuklearra aukera bikainak Euskal Herriarentzat

Notizia ia oharkabean igaro dela iritzirik, egunkari eta webguneetan agertu dena ekartzera mugatuko gara laburpentxoa eginez, eta balorazioak irakurlearen esku utziko ditugu. Urtarrilaren 15ean Berriak Zedarriak enpresari lobbyaren urteko bilkuraren berri eman zuen titular honekin:

“Zedarriak-ek «aukera bikaina» ikusten du defentsa industrian, eta sektore hori berreskuratzera deitu du”. Aurrerago: “Hitza hartu du Dorronsorok (Zedarriak-eko zuzendariak), eta ur handitan sartzeko prest agertu da: gehitu du industria nuklearrari berriz ekiteko «apustu garbi» bat dagoela Europan, eta hala egiteko asmoa dutela zentral nuklear txikien bitartez. […] Dorronsorok nabarmendu du «aukera bikaina» egongo dela «segurtasun eta defentsa industrian», diru asko inbertituko delako sektore horretan. «Europako defentsa industria berreskuratu behar dugu, Euskadin ia osorik desagertu dena», zehaztu du. NATOren exijentziak direla eta, Europako herrialde askok bere aurrekontu militarra handitu beharko dute, eta horretan oinarritzen da sektore hori suspertzeko aukera”.

“Deustuko Unibertsitateak Bilbon duen liburutegiko areto nagusian izan da aurkezpena, eta entzuleen artean zen Mikel Jauregi Jaurlaritzako industria sailburua. Hark positibotzat jo du txostena, eta esan du bat egiten duela Zedarriak-ek EAEren eta Europaren inguruan eginiko diagnostikoarekin eta sortu nahi duen eztabaidarekin.” […] “Guztira ordu eta erdiko ekitaldia izan da, baina horretatik minutu bakarra izan da euskaraz”. […] Txostenaz harago, Pedro Luis Uriarte ekonomialari eta BBV bankuko presidenteorde izandakoak Zedarriak-en zuzendaritza utziko du, eta aurrerantzean kontsulta batzorde berrira igaroko da. Haren tokia Pilar Kaltzada kazetariak hartuko du. Gaur egun Save The Children gobernuz kanpoko erakundeak Espainian duen ordezkaritzako presidentea da Kaltzada, besteak beste”.

Pilar Kaltzada kazetariak hartuko du Zedarriak-en zuzendaritza

Hau da, euskalgintzaren munduan oso ezaguna den Pilar Kaltzada, umeen babeserako Save the Children erakundearen Espainiako presidentea, armagintza bultzatu nahi duen erakundearen zuzendaritzan egongo da.

Abenduaren 31koa da hurrengoa. Naiz-ek Gasteizkoak kolektiboaren liburu berriaren muina laburbiltzen du; euskaratuta dakargu hona: “Industria militarrari lotutako Hego Euskal Herriko enpresa, zentro edo entitateak hirukoiztu egin dira 20 urte baino gutxiagoan, 70etik 206ra igaroz”. Naiz-en jatorrizko bertsioan ez dira enpresen kokapenak agertzen; geuk gehitu ditugu: “Bere garrantzia kontuan hartuta, ITP Aero (Zamudio), Sener (Getxo), Sapa (Andoain), Aernnova (Miñaogutxia-Gasteiz) eta MTorres (Iruña-Nafarroa) nabarmentzen dira. Tamainaren eta errendimenduaren bigarren maila batean, Aciturri (Gasteiz), AEG Power Solutions (Miñaogutxia), ArcelorMittal (Legutio, Sestao), Beretta Benelli (Iruña Oka), Ecia Xemein (Markina Xemein), Novatronic (Bilbo), Orbital (Artika-Berriobeiti), Sidenor (Basauri, etab.), Sisteplant (Derio), Tecnalia (Gasteiz, Donostia), Tecomar (Pasaia) edo Wartsila Ibérica (Bermeo) bezalako enpresak egongo lirateke”.

“Horietatik guztietatik bik baino ez dute %100eko ekoizpena sektorean: Sapa eta Ecia Xemein. Azken hori da txostenaren egileek detektatu duten kasu “surrealistena”, “granadak eta morteroak udal espazio batean fabrikatzen baitira segurtasun baldintza beldurgarrietan”, eskola batekin espazioa partekatzen baitute”.

Radio Euskadik elkarrizketa egin zion Mitxel Lakuntza ELAko idazkari nagusiari urtarrilaren azken aldera, eta hona hemen hark esandako batzuk, sindikatuaren webgunetik jasota:

Zedarriak-ek bere bide orriaren berri eman zuen foroan, erakundeak eta EAJ, PSE-EE eta EH Bildu zeuden

Titularra: “Eskandalua da Zedarriak-en armamentuari buruzko proposamenaren aurka alderdi batek ere ahotsa ez altxatzea”. Jarraipena: “Bultzada publikoaz gain, Lakuntzak trantsizio ekosozialaren norabidean inbertsio handiagoa egitea aldarrikatzen du, Zedarriak lobbyak proposatutako energia nuklearraren eta armagintzaren inbertsioaren kontrako norabidean, hain zuzen ere. ELAri oso kezkagarriak iruditzen zaizkio Zedarriak bezalako lobby enpresarialek markatu nahi dituzten adierazpenak eta bidea”, kritikatu du, eta politikaren etorkizunak “demokrazia, eskubide sozialak eta bakea defendatzea” izan behar duela defendatu du. Era berean, salatu du Zedarriak-ek bere bide orriaren berri eman zuen foroan erakundeak eta EAJ, PSE-EE eta EH Bildu zeudela, baina “inork ez zuela ahotsa altxatu entzuten ari zirena benetako eskandalua zela esateko”.