Aramaixon 2025eko martxoaren 21ean irakurritako testua.
LURRAREN ETA BIZITZAREN DEFENTSAN, GORA PALESTINA!
Berriz ere gure pantailak sufrimendu eta suntsipen irudiz bete dira. Netanyahuk argi adierazi du hasiera besterik ez dela izan eta erresistentzia suntsitu arte genozidioak jarraituko duela. Beste era batera esanda, garbiketa etnikoa bururaino eraman nahi du Israelek eta herri palestinarra deuseztatu, beren lurrak uztera behartuz.
Komunikatu honen helburua ez da drama horren berri ematea, baizik eta gure erantzunak hartu beharko lukeen norabidean eragitea. Zer egin dezakegu egoera honen aurrean? Lehenik eta behin, herri palestinarrari eta bere erresistentziari babes irmoa erakutsi behar diogu. Eta, bestetik, egoera honen erantzuleen aurkako borroka indartu behar dugu. Momentu honetan Palestinako herriaren okupazioarekin eta zapalkuntzarekin amaitzeko ekimenik handiena Estatu israeldarraren aurkako boikot, desinbertsio eta zigor kanpainan oinarritzen da (BDS kanpaina), Hegoafrikako apartheid erregimena nazioartean isolatzeko egin zen kanpaina luzean oinarrituta dagoena.
Palestinarrentzat Lurraldearen defentsa da bizirauteko bermea
2005ean Palestinako gizarte zibilak egin zion deia nazioarteari BDS kanpainari eusteko Israelek nazioarteko legedia bete arte:
- Palestinako Herriaren autodeterminazio eskubidea onartu eta okupazioa eta kolonizazioa amaitu arte.
- Harresia desegin arte.
- Israelgo herritar palestinarren eskubide berdintasuna aitortu eta errefuxiatu palestinarren itzulera baimendu arte.
Boikot kanpaina honen testuinguruan Arrasaten egindako lanari esker, Alcampo, Douglas eta Eroskik Israelgo jatorrizko produktuak erretiratzeko erabakia hartu zuten. LiDL eta BM supermerkatuen kasuan, blokeoak, manifestazioek eta presioak oraindik jarraitzen dute. Arrasateko ile-apaindegietan informatzeko lana egin da, Israelgo kosmetika-produkturik erabil ez dezaten.
elkartasunik onena erregimen sionistaren nazioarteko isolamendua da
Palestinarrentzat Lurraldearen defentsa da bizirauteko bermea eta herri duintasunerako baliabide-iturria. Nabarmena da Palestinako laborantza sektorearen aurkako erasoa, Lur horixe baita giltzarria beren elikadura burujabetzarako. Mendebaldeko gobernu ustez demokratikoek zapalkuntzan sakontzen dute itun komertzialen bidez Israel legitimatu eta diru-inbertsio handiak eginez edota laborari palestinarren lurren espolioari esker ateratzen den nekazaritza produkzioa erosiz.
Gure erosketek ze inplikazio dute? Produktu sionistak erosi eta kontsumitzen al ditugu?
- Carrefour da boikot kanpainen jomugetako bat, bere filial bat lurralde okupatuetan supermerkatuak zabaltzen ari baita, beste izen batekin, eta Israelgo militarrei opari pertsonalak egin izan dizkiete.
- Arabako Udapa kooperatibak, adibidez, lurralde okupatuetako patatak komertzializatzen ditu sasoi batzuetan.
- Medjoul Datilak Zisjordaniako kolonia israeldarren diru iturri nagusietakoa dira eta marka ezberdinek komertzializatzen dituzte. LiDL eta BM supermerkatuetan saltzen dira, adibidez. Gainera, LiDLeko Lupilu toallitak ere israeldar jatorrikoak dira
- BDS kanpaina honetan lehentasunezkoak dira HP, Intel, Siemens, Carrefour, Disney… adibidez.
- Bigarren maila batean daude Amazon, Airbnb, Booking eta Google. Azken horren inteligentzia artifiziala erabiltzen ari dira misilak gidatzeko.
Palestinako herriarekin egin dezakegun elkartasunik onena erregimen sionistaren nazioarteko isolamendua da. FIFA, Olinpiar Jokoak, EuroVision… erakunde horietatik kanporatua izan behar du Israelek. Eta, gure jokalekura etorrita, kirol eta kultur ekimenetan hango ordezkarien presentzia salatu behar dugu, Maccabiren kasuan egin izan den bezala Gasteizen. Gainera, mota guztietako erakunde eta enpresek estatu sionistarekin dituzten harreman, lankidetza eta negozio guztiak eteteko presioa egiten jarraitu behar da.
Euskal Herrian ekoizten diren 5 armetatik, 4 diruz lagunduak dira
Palestinan giza eskubideak errespetatzen ez dituzten eragileekin harremanak etengo zituztela erabaki zuen Euskal Herriko Unibertsitateak eta, ondorioz, CAFekin ez dutela akordio berririk egingo. Izan ere, CAF Beasaingo multinazionalaren jarrera lotsagarria da: bost urteko protesten ondoren eta nazioarteko legediaren kontra, tranbia lineak eraiki, hornitu eta kudeatzen ditu Jerusalemgo hiri okupatuaren eta inguruko kolonia berrien artean. Gainera, guztion diruarekin mantenarazten da injustizia hau, Eusko Jaurlaritza CAFeko akzioduna baita, eta Nafarroako Gobernuak laguntza ekonomikoak ematen baitizkio.
Duela egun batzuk Aramaion “Emakumeak gerraren kontra” hitzaldian azaldu ziguten moduan, “gerra hemen hasten da”, “Eusko labeldun armak” baititugu militarismoari prestigioa emateko. Euskal Herrian ekoizten diren 5 armetatik, 4 diruz lagunduak dira.
Ba al dakigu zer eta norentzat ekoizten dugun gure lantegietan?
Otsailaren 7an Juan Martinek kontatu zigun Zedarriak izeneko enpresari lobbyarentzat armagintza eta energia nuklearra aukera bikainak direla Euskal Herriarentzat: “NATOren exijentziak direla eta, Europako herrialde askok beren aurrekontu militarra handitu beharko dute, eta horretan oinarritzen da sektore hori suspertzeko aukera”.
Otsailaren 14an Iñakik honako hausnarketa luzatu zigun: Hondamendiak aukera dira beti, eta euskal enpresari ekintzaile aurreratuenek ez dute aukera galdu nahi. Non gerra-gogoa, han negozio-zangoa; euskal ekonomiaren izenean, euskal gizartearen garapenaren izenean, guztion ongizatearen izenean.
Herrien suntsiketa ahalbidetzen duen euskal armagintza lanpostu oparo eta soldata txukunekin eskaintzen digutenean, gobernu eta instituzioek ondo lagunduta, zer esango du euskal langileriak? Ba al dakigu zer eta norentzat ekoizten dugun gure lantegietan?
Borroka hau herri guztietako langileon eginkizuna da eta horretarako antolakuntza internazionalista indartzea dagokigu. Euskal Herritik ez dugu palestinarren kontrako genozidioa geldituko, baina laguntzaileak ez izatea bai dagoela gure esku: Palestinako genozidioak hemen ez dezala segidarik izan.
