EHE

Euskarari lehentasuna emanen dion ofizialtasuna, orain!

Aldarri hau kezka eta arduratik egiten dugu larrialdi egoera betean gaudelako. Beraz, gaurko deialdia bizirik segitu nahi duen herriaren oihua da.

4

Gorka Roca Torre

Lur langilea. Behorlegi

Joan den irailaren 19an EHEk prentsaurrekoa eman genuen Izpegin. Hau da irakurri genuen agiria:

EUSKARARI LEHENTASUNA EMANEN DION OFIZIALTASUNA, ORAIN!

Gaur hemen Euskal Herriko txoko ezberdinetatik etorritako euskaldun eta euskaltzaleak elkartu gara gure nazio, kultura eta hizkuntzaren aldeko aldarria egiteko. Aldarri hau kezka eta arduratik egiten dugu larrialdi egoera betean gaudelako. Beraz, gaurko deialdia bizirik segitu nahi duen herriaren oihua da.

Frantzia eta Espainiako estatu kolonial eta inperialistak sortu zirenetik Euskal Herriaren desagerpena izan dute helburu

Larrialdi egoera honi aitzin egiteko ezinbertzekoa da oroitzea nola heldu garen egoera honetara. Frantzia eta Espainiako estatu kolonial eta inperialistak sortu zirenetik Euskal Herriaren desagerpena izan dute helburu. Ezin ditugu atzendu gure historian zehar herri hau desagerrarazteko gupidarik gabe erabili dituzten prozesu suntsitzaileak. Inkisizioa, Frantziako Iraultza, Espainiako diktadura frankista, eta gaur egun, inposizioan eta zapalkuntzan oinarritutako demokrazia faltsuak dira horren adibide batzuk. Prozesu hauek guziek beti izan dituzte euskara eta euskaldunak jomugan. Estatu zapaltzaileek argi dutelako herri bat menperatzeko beharrezkoa dela herri horren hizkuntza desagerraraztea. Hizkuntza, komunikazio tresna hutsa baino gehiago, herri honek lurrarekin, kulturarekin eta bere mundu ikuskerarekin duen lotura zuzena baita.

Guk ere argi eduki behar dugu, beraz, herri honek bizirik irauteko, euskara behar duela eta euskaldun ahaldundu eta aktiboak ere behar dituela. Horregatik, Nafarroa Garaia eta Beherea bereizteko inposatu diguten muga honetatik abiatutako deialdi hau euskal lurralde guztietara zabaltzen dugu. Izan ere, egoera hau ez da Nafarroan bakarrik gertatzen. Besteak beste, Euskal Herriko kaleetan, batez bertze, zortzi lagunetatik bakarrak euskaraz hitz egiten du, belaunaldi berrien parte batek soilik jasotzen du euskara etxean edo eskolan, eta euskararen arnas guneak arriskuan daude. Gure hizkuntza galzorian dago.

Atharratzen, Bilbon, Tafallan nahiz Guardian; hezkuntzan, osasungintzan, epaitegietan, lantegietan… euskaldunak modu sistematikoan baztertzen gaituzte gure herrian bertan. Euskaldunen kontrako zapalkuntza egiturazkoa da eta euskaldunak asimilaziora eramaten gaituen egoera betean gaude. Egoera honi buelta emateko, mendez mende egin dugun bezala, ezinbertzekoa da herri gisa antolatzea eta erresistentzian herri boterea aktibatzea.

Aurtengo abenduaren 15ean, 40 urte beteko dira Nafarroa Garaiko Vascuencearen lege zapaltzailea onartu zenetik. Lege hau estatu kolonial eta inperialistek zatitutako Nafarroa gehiago zatitzeko eta euskaldunak bigarren mailako herritar bezala tratatzeko erabiltzen da oraindik, bizi garen herriaren arabera, gure hizkuntza eskubideen aitortzan mailaketa bat eginez. Urteurren hau baliatu nahi dugu eskubidez dagokiguna aldarrikatzeko, konponketa historikoa zor digutenak interpelatzeko eta inori baimenik eskatu gabe, euskaldun guztion eskubideen aitortza eskuratzeko. Nafarroa Garairako eskatzen duguna, Nafarroa osorako eta Euskal Herri osorako eskatzen dugu.

Euskarak eta Euskal Herriak bizirauteko behar duten guzia aldarrikatzen dugu. Euskarak bizirauteko lehentasuna eduki behar du kalean, etxean, lan munduan eta administrazioan, hau da, euskaraz lehenik eta gehienik aritu behar da. Ez dugu onartuko aurpegi zuriketarako erabiltzen den lege baztertzailerik; euskarari lehentasuna emanen dion ofizialtasuna behar dugu; euskara Euskal Herriko berezko hizkuntza nazionala eta ezagutu beharrekoa izendatuko duen ofizialtasuna. Ez edukirik eta bermerik gabeko ofizialtasun edota ko-ofizialtasunik. Euskarari lehentasuna emanen dion legea euskaldunok idatzi behar dugu; euskararen errepublika ahalbidetuko duena; euskaldunon askotariko eta zapalkuntzarik gabeko komunitatea ekarriko duena; euskara eskuragarri jarriko duena eta euskaraz bizitzeko eskubidea bermatuko duena.

EHEk 2026ko abenduaren 15ean Euskal Herri osoko euskaldun eta euskaltzale guztiak mobilizazioak antolatzera gonbidatzen zaituztegu

Beraz, Euskal Herrian Euskarazek 2026ko abenduaren 15ean Euskal Herri osoko euskaldun eta euskaltzale guztiak mobilizazioak antolatzera gonbidatzen zaituztegu. Aurre egin diezaiegun euskaldunon kontrako lege zanpatzaileei. Ozen sala dezagun, frantses eta espainiar agintariek, jatorrizko hizkuntza euskara den lurraldean frantsesez eta españolez bizitzeko berme guztiak ematen dituzten bitartean, euskaldunoi euskaraz bizi ahal izateko eskubidea ukatzen digutela. Horrela, erdaretan bizitzera bultzatzen dute, horietan bizi nahi dutenei pribilegioa emanez. Erran diezaiegun ozen Nafarroa Garaiko agintariei aski dela! 40 urte beteko dituen Vascuencearen lege zapaltzailea behin betiko bertan behera uzteko garaia dela eta euskarak lehentasunezko estatus ofiziala behar duela! Zor digutelako eta badagokigulako. Gure historia ez dezaten erdaraz idatz. Euskaldun guztien eskubideen aitortza eskuratzera goaz!

Euskal Herrian Euskaraz!

LEGE ZAPALTZAILEEN AURREAN, JEIKI NAFARROA!

EUSKAL HERRIAN EUSKARAZ

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

4 erantzun “Euskarari lehentasuna emanen dion ofizialtasuna, orain!” bidalketan

Utzi iruzkina

Azken artikuluak