EHEk prentsaurrekoa eman zuen Iruñean joan den urriaren 12an. Hau da orduan zabaldutako agiria:
Gaur, urriak 12, hainbat instituzio eta eragile espainiar kolonialismoa eta inperialismoa goraipatzeko eguna ospatzen ari dira, bai Euskal Herrian, bai mundu osoan zehar, espainiar supremazismoaren izenean zapaldutako bertze hainbat lurraldetan ere. Aldi berean, munduko txoko aunitzetan antolatu gara herrien suntsitzea goraipatzen duen eta espainiar hizkuntza eta kulturaren nagusitasunean oinarritzen den ideologia horren aurkako ekimenak gauzatzeko.
Egun hau baliatu nahi dugu, beraz, espainiar kolonialismo arrazista, etnozida eta linguizida pairatzen duten herri guziei gure elkartasuna adierazteko. Elkartasun horretan, ardura bikoitza dugu euskaldunok. Alde batetik, gure herria zapaltzen duten estatuek —Espainiak eta Frantziak— Euskal Herrian zein beste herrien aurka aurrera eramaten dituzten politika eta jarrera zapaltzaile guztien aurka egitea dagokigu, supremazismo europar eta zuriaren logikak salatuz eta haiei aurre eginez.
Bestetik, Euskal Herritik, euskaratik eta euskaraz, gure kultura eta hizkuntza aldarrikatu behar ditugu. Izan ere, gure hizkuntza eta kulturak ekartzen dituen mundu-ikuskerak, kolonialismoak zein inperialismoak inposatu nahi duten homogeneizazioaren aurrean erresistentziarako tresna ezinbestekoak dira. Aldi berean, gure esku dagoena egin behar dugu euskara eta euskal kultura Euskal Herrian herri zapalduen arteko elkartasuna bultzatzeko izan daitezen. Ez dugu onartuko euskara izatea diskurtso faxistak elikatzeko tresna. Alderantziz, euskarak faxismoaren aurrean harresia eta herrien arteko elkartasunerako zubi izan behar du.
Momentu aproposa da, beraz, gaur espainiar zein frantziar estatuek gure kulturaren eta hizkuntzaren desagerpena helburu duten politika eta lege asimilatzaileak salatzeko. Azkenaldian, euskararen kontrako oldarraldi politiko-mediatiko-judiziala bihurtu da estrategia. Baina aspalditik ezagutzen ditugu euskararen eta euskaldunon kontrako legeak. Lege horietako bat dugu Nafarroa garaiko Vascuencearen legea. Euskal Herrian Euskarazeko kideok Izpegin egin genuen prentsaurrekoan erran genuen gisara, heldu den abenduaren 15ean, 40 urte beteko dira lege zapaltzaile hori gure gibelean dagoen parlamentuan onartu zenetik.
Bertan adierazi genuen gisara, lege zapaltzaile hau salatzeko eta Euskal Herri osoan euskarari lehentasuna emanen dion ofizialtasuna aldarrikatzeko, nazio mailako ekimena abiatu dugu. Euskaltzale guziak 2026ko abenduaren 15ean Euskal Herriko txoko desberdinetan “Euskarari lehentasuna emanen dion ofizialtasuna, orain!” lemapean mobilizazioak antolatzera gonbidatzen zaituztegu: 19:00etan denek Euskal Herrian Euskaraz kantua abestuko dugu, eta, horrez gain, bakoitzak nahi duen gisara mobilizazioa osatzeko gonbita luzatzen dizuegu.
Bitartean, eskualde ezberdinetan batzar irekiak eginen ditugu: abenduaren 15eko ekitaldia aurkezteaz gain, Frantziako eta Espainiako Estatu zapaltzaileek euskara desagerrarazteko aspalditik egiten duten ahaleginari buruz eta horri aurre egiteko borrokari buruz eztabaidatuko dugu.
Kantatzen duen herria, ez da sekula hilko!
Lege zapaltzaileen aurrean, jeiki Euskal Herria!
EUSKAL HERRIAN EUSKARAZ
2026-10-12
