Manifestatzaileen aurkako errepresioa geldi!
Euskaldunen kontrako erasoak geldi!
Elkarretaratzea Baionan komisaldegi aitzinean urriaren 31n 13:00ean.
Salatzen dugu:
- poliziei euskaraz mintzatzeagatik, bi poliziak 15 urteko ikasle bat azkarki kolpatu izana;
- hainbat poliziaren jarrera euskarafoboa;
- ikasle hau kolpatu zutenetik hilabete bat pasa da baina polizia hobendunak ez dira oraindik erruztatuak izan;
- poliziak eta beren agintariak manifestatzaileen aurka erabiltzen ari diren bortizkeria handia.
Eskatzen dugu:
- poliziengandik kolpatuak izan direnek polizien bortizkerien aurka pausatutako salaketak lehenbailehen aztertuak izatea eta poliziak erruztatuak izatea.
Bat egiten dugu:
- egun hauetan manifestaldietan esku hartzen duten ikasleen eta herritarren aldarrikapenekin.
Euskal Herrian Euskaraz
Argibideak 15 urteko ikasleari gertatu zaionari buruz:
Joan den urriaren 1ean, Baionan, lizeoetako ikasleen mobilizazioen testuinguruan, 15 urteko ikasle bati, mobilizazioak ziren inguruetan ibiltzen ari zelarik, bi poliziak bidea moztu zioten, hortik pasatzea debekatua zela frantsesez adieraziz. Ikasleak euskaraz erantzun zien eta urrundu zen.
Bi poliziak haren gibeletik lasterka hasi ziren. Ondorioz gaztea ere lasterka hasi zen. Orduan, eror zedin, polizia batek gibeletik ostiko bat eman zion. Ikaslea lurrera erori zen eta erortzerakoan bere buruak lurrarekin gogor talka egin zuen.
Lurrean zela, poliziek matrakaz kolpatu zuten, iraganeko zauri larri batengatik ahuldua zuen belaunaren gainean. Gazteak “Barkatu! Barkatu!” oihukatzen zien bitartean, gas negar eragilea aurpegira bota zioten.
Gas negar eragilearen ondorioz itsuturik eta minez zela, "euskaldun horiekin beti berdin da" entzun zion frantsesez erraten polizietako bati. Poliziak joan ziren, gaztea lurrean utziz.
Ikaslea lagunengana joan zen eta haiekin biltzean konortea hamar minutuz galdu zuen. Iratzartzean, shock egoeran izan zen eta hainbat minutuz ez zuen hitzik erran ahal izan.
Lagunek deitu zituzten larrialdi zerbitzuek artatu zuten gaztea, eta ospitalera eraman behar izan zuten. Arta gehiago ukan ondoren, ordu batzuen buruan ospitaletik minarekin atera zen.
