Ereintza faltsua belar txarrak galarazteko nekazal teknika bat da: lurra goldatu, ezer ez landatu eta, ernatzeko prest dauden hazi “maltzurrak” hazten direlarik, berriro goldatu, gal daitezen. Ondoren ereindakoek lehiakide gutxiago izango dute horrela, eta ahultzen joango da berezko landaredia.
Pito kiles
Antzeko teknikak ikusten ditut gizartegintzan ere, adibidez: txorimalo mediatiko faxista bat dator Euskal Herrira eta gazte konprometitu sutsuenek deiari erantzuten diote zezenek kapari bezala. Etsaiak jarritako egun, ordu eta lekura doaz zintzo, poliziaren egurra jaso eta handik denbora batera atxilotuak izateko. Gero fitxak, kontrolak, epaiak…
Hiruzpalau urtean behin hori eginda, belar txarrak berdinduta eta haien arrastoak galduta, poliziaren fitxategietan izan ezik
Hiruzpalau urtean behin hori eginda, belar txarrak berdinduta eta haien arrastoak galduta, poliziaren fitxategietan izan ezik.
Belaunaldika belaunikatuak, ibiltzen ere ahaztu arte.
D eredua
Lazkao Txikik esan omen zuen laster erdaraz arituko ginela euskaraz ari garelakoan. Gaur esan dezakegu eskolan erdara irakasten dela euskara irakasten delakoan. Hori da D ereduaren iruzurraren tragedia, euskalduntzeko apenas balio duelako, baina bikain ari delako haur euskaldunak erdalduntzen.
Bizi guztian euskarazko ereduan ibili eta euskaraz komunikatzeko ezgai
Adituek jakingo dute zer den gaizki egiten ari dena eta zer ondo, eskola frankistan ibilitakoontzat nahiko mirakulu izan da ikustea euskarazko hezkuntza posible zenik ere, baina zertan gaude gaur? Hemezortzi urteko gazteak bizi guztian euskarazko ereduan ibili eta euskaraz komunikatzeko ezgai irtetea kurtsoak bata bestearen atzetik gaindituta, bai eskola “publikoan”, baita ikastola batzuetan ere. Inork aipatzen ez duen elefante horrek euskarekiko frustrazio eta desatxikimendua eragiten du; euskaraz matrikulatzea erabaki duten gurasoak eta haien haurrak iruzurtuak dira. Euskara etxetik ez daramatenak nekez ari dira euskalduntzen eta euskaldunak erdalduntzen dira euskaraz bizitzeko guneak erdaldunduta daudelako. Ustez segregazioaren aurkakoak diren neurriek oztopatu egiten dute haur euskaldunak biltzea gehiengo erdalduna baztertua izan ez dadin, denak erdaran berdindu eta kitto. Hau komeriya.
Adegikortasuna
Golde Globalistak abegikortasun internazionalista ernarazten digu eta inportazioko jende oldez agortzen du. Gure xamurtasunaz baliatuz giza baliabideak optimizatzeko operazio bikaina burutzen ari dira. Merkatu globalaren beste salgai bat da jendea, baina, onkeriaren distirak maltzurzuriarekiko itsutzen gaituen bitartean, arrazismoa gora dator, jendartea geroz eta desegituratuago dago, eta polizia da bizikidetzaren berme. Earki gatxik/n.
Giza baliabideak optimizatzeko operazio bikaina burutzen ari dira
Asko luzatu ninteke adibideak jartzen: KM0, Zero Zabor, Transizio Energetikoa, Bakezaletasuna, Berdintasuna… denak iruzurrak, geure senean ernagai geratu daiteken edozein hazi jator ahitzeko sukaldatuak unibertsiotateetan. Ez dira jendea gobernatzeko modu berriak, ziur aski, baina zibermundializazioak dimentsio global totalitarioa eransten dio gaiari, oso friendlyki, hori bai.
