Asto begi estalkiez
Agian gaztetxoenek ez zuten ezagutuko, baina, zenbait hamarkada antzina, astoak erabiltzen ziren garraiorako eta herrietan astotegiak zeuden, haien “aparkaleku”. Baserritik herriratzean, han egoten ziren lotuak. Bitxia zen ikustea zenbait astok begien alboetan zituzten estalkiak. Larruzkoak izaten ziren eta alboak ikustea eragozten zieten; horrela, aurrea bakarrik ikus zezaketen. Nolabait astoak bere bidea zuzen jarraitzeko erabiltzen ziren, albora egiteke.
Ulergaitza egiten zait txikizioa ogibide egitea
Gaur antzeko zerbait gertatzen dela sumatzen dut, antzeko estalkiekin dabilela hainbat hankabiko. Ulergaitza egiten zait niri, norbere komunitatearen identitatea, nortasuna deseginez, hainbatek irauten dutela ikustea. Bizibidea edo eguneroko jarduna horretara bideratzea; norbere herria, herriaren nortasuna, hizkuntza, kultura eta ehunka eta milaka urtez berea den komunitateak eraiki duen hori desegitetik irautea; txikizioa ogibide egitea.
Eta, horretan aritzeko, astoek bezala estalkiak behar dira eraman gero. Bi motatako estalkiak dira sumatzen ditudanak. Bata, militantzia. Alegia, norbera eraikitzen aritu den alderdi politiko hori baino haratago ezer ez ikustea, alderdian itsuturik egotea. Eta beste estalkia, dirua. Dirua baino haratago ez ikustea.
Ez gaude oraindik prest hutsunea onartzeko
Ikusteko ez da nahikoa begiak izatea, begiratu ere egin behar da. Aurrez aurre jartzea behar da, burua altxatzea eta aurrean dugun errealitatea onartzea, urtez urte eraiki ditugun alderdi horiek jada ez daudela onartzea. Espazio zabal bat ireki dela, hutsune handi bat, edonork zerbait berria eraikitzeko aukera ematen duena. Noski, ez begiratze hori bizirik irauteko modu bat da, jada desegindakoa ez dagoela ikusteak eragingo ligukeen zorigaitzaren aurrean. Ez gaude oraindik prest hutsunea onartzeko.
Eta horrela gabiltza, azken zaparraden ondorioz, baratzea estali digun barrabas belarrarentzat Jakobak eman izan duen erremedioarekin; beste aldera begiratu eta kito!
Lepoa biratzen hastearekin bakarrik begiak itxiz eta lepoa lehenera itzuliz. Ez ikusiarena egin? Lepoan hartu ta segi aurrera… Horma jo artean.
