IRUÑA-VELEIA: ESKABADORAK AZTARNATEGIAN
Ekainean 20 urte bete ziren euskarazko eta latinezko grafitoen aurkezpenetik: egun pozgarria izan zen hura euskararentzat eta euskaldunontzat. Baina pozak gutxi iraun zuen, bi urte eta erdi baino ez, 2008ko azaroaren 19an Arabako Diputazioaren Foru Agindu batek grafitoak faltsutzat deklaratu zituen arte. ‘Deklaratu’, ez frogatu. Oraindik ere, Iruña Veleia Argitu, ez Suntsitu Plataforma froga eske dabil, grafitoak nazioarteko arkeologia laborategi espezializatuetara eraman ditzaten erregutuz.
Gainera, indusketa arkeologikoaz hitz egin behar da: LURMENek eskuz, aitzur txikiz, galbahez eta mimoz induskatzen zuen, ‘Harris matrizea’ jarraituz. Baina 2010etik 13.500 metro karratuko azalera urratu dute hondeamakinak erabiliz, lurra tonaka erauziz eta zabortegian pilatuz, geruza arkeologikoak deseginez. Grafitoak eta oso baliotsuak izan daitezkeen gauzak — txanponak, hezur txikiak, ikatz zatiak… — jasotzea ezinezko bihurtzen da. Horrela jardun balute, gaur egun Irulegiko Eskua ez zatekeen Nafarroako Museoan egongo, zabortegian baizik.
Iruña-Veleiako aztarnategian Arabako Foru Aldundiak, Quark enpresaren bidez, daraman industeko modua salatzeko, Iruña-Veleia Argitu, ez Suntsitu Plataformak elkarretaratzea antolatuko du Gasteizko Andra Mari Zuria plazan, azaroaren 14ko arratsaldean, 6etatik aurrera. Bertan bideoak eta grafitoen argazkiak erakutsiko dira, eta hainbat azalpen eskainiko.
Iruña-Veleia Argitu, ez Suntsitu Plataforma
