DONOSTIA

Satorralaiak azaroaren 21ean protesta-kontzentrazioa deitu du

Egun horretan bertan Donostiako Metroa martxan jarriko dela-eta, protesta eta umorea batuko dituen elkarretaratzea egingo dugu 12:00etan Easo Plazan.

0

Marifran Aranjuelo

Satorralaiako kidea. Donostia

Larunbatean, azaroak 21, Satorralaia bizilagunen mugimenduak protesta eta umorea batuko dituen elkarretaratzea deitu du, eguerdiko 12etan Easo Plazan, hain zuzen ere egun horretan martxan jarriko duten Donostiako Metroaren pasantearekiko herritarren desadostasuna adierazteko.

Gure hirian zeharo behargabekoa den azpiegitura xahutzaile hori bultzatu duten politikarien zentzugabekeria salatzen dugu. 2009an Eusko Jaurlaritzak PSOE buru zuela proiektua abiarazi zuenetik, Donostiako erdigunetik lurpeko metro bat eraikitzeko egitasmoak desadostasun zabala sortu zuen, bai garraio publikoa hobetzeko beste aukera batzuen aurrean justifikaziorik ez zuelako, nahiz proiektuaren kostu ekonomiko itzelarengatik eta Dbus-en eragingo zituen ondorio galgarriengatik, baita obra erraldoi hori egiteak hirigunean eragingo zituen kalteengatik eta hiriko hareatzen eta ibai-marea lurren gainean zimendutako eraikinen egonkortasunari eragingo zizkien arriskuengatik ere. Gogora dezagun gaiak polemika sutsua piztu zuela eta 2013an EAJren ondorengo gobernuko Ingurumen eta Lurralde Politikako sailburuak proiektua “obra faraonikotzat” jo zuenean itxuraz amaitu zela. Aipagarria da Arantxa Tapia orduko mugikortasun-diputatuak ere proiektua nola auzitan jartzen zuen, “Donostian hiru metro-geltoki egitea kostatuko litzatekeenarekin Donostiari eta beste herri batzuei zerbitzua emango liekeen beste sare bat eraiki daitekeela” adierazten zuelarik. Hala ere, EAJ-PSOE gobernu-itunaren ondoren, Donostiako metro-pasantea ezinbesteko obra bihurtu zen, eta Arantxa Tapiak berak obrak hasteko agindua eman zuen 2017an, proiektua “topoaren saihesbide” gisa berrizendatuz eta herri-galdeketa bat egin zedin Satorralaiak 9.000 donostiarren sinaduren babesarekin aurkeztutako eskaera ukatuz.

Gaur egun, obretan ia hamar urte egin ondoren, proiektuaren balantzea oso negatiboa da:

  • Metroaren pasantea modu erabat inposatzailean bultzatu da, Donostiarako garraio-sistema egokienaren inguruan herritarren parte-hartzeari inolako biderik ireki gabe.
  • Metroaren egitasmoa garraio publikoarentzat apustu okerra dela erakusten dute txosten guztiek, bidaiariak batez ere autobus-zerbitzuen erabiltzaileen multzotik bereganatuko dituelako –Dbusek bidaiarien % 21 galduko luke eta Lurraldebusek % 28, proiektuaren bideragarritasun azterketaren arabera–; aldiz, Donostialdean autoz egunero egiten diren joan-etorrien %1 baino ez luke bereganatuko –hau da, Donostiako udalerrian egiten den ibilgailuen trafikoaren %1’5 inguru–, eta beste 2.000 lagun inguruk oinez edo bizikletaz ibiltzeari ere utziko liokete, Gipuzkoako Garraioaren Lurralde Agintaritzak egindako azterlan baten arabera. Gainera, Dbus eta Lurraldebusen zenbait autobus linea kentzea eta beste hainbaten maiztasunari murrizketa garrantzitsuak egitea planteatzen du Eusko Jaurlaritzak Metroaren Eskari-Azterketan. Murrizketa horiek auzo ugariri eragingo liekete, eta batipat adineko pertsonek eta mugikortasun urriko biztanleek jasango lituzkete horren ondorioak. Honi dagokionez, azken aldian Ekialdebusen egiten hasi diren murrizketak salatzen ditugu, herritarren erantzunari esker zerbitzu gehienak berreskuratu badira ere.
  • Metro pasabidearen eraikuntza-lanen kostua 340 milioi eurokoa dela kalkulatu daiteke gaur egun, 4’2 km-ko trazadurako, proiektuaren informazio-azterlanean ezarritako 172 milioiko (BEZa barne) hasierako aurrekontua bikoiztuz. Susana García Chueca sailburuaren arabera, 252 milioi euro gastatu ziren obretan joan den apirilaren 30era arte, eta kopuru horri Eusko Jaurlaritzaren 2026 eta 2027 urteetarako aurrekontuetan sartutako partidetatik gutxi gorabehera beste 28 milioi eta BEZari dagokion % 21a ere gehitu behar zaizkio, proiektua gauzatzeak dakarren kostu osoa behar bezala islatzeko. Bestalde, Mirakontxa-Easo zatiaren eraikuntza-lanek % 162ko gainkostua izan dutela berresten dute sailburuak emandako zifrek, 2017an 53 milioitan esleitu zen zati horren egungo zenbatespena 139 milioikoa baita (BEZ zenbatu gabe). Era berean, Morlanseko lotunearen obran kostuaren % 344ko igoera eman dela nabarmentzekoa da, hasierako eraikuntza proiektuan obra horretarako aurreikusitako 4’1 milioiko gastua 18’2 milioira igo baita indarrean dagoen aurrekontuan. Metroaren eraikuntza-lanen diru-kontuek ez dute amaierarik eta oraindik ere gastu gehigarriak agertzen ari dira, hala nola obrek kaltetutako eremu batzuk urbanizatzeko Donostiako Udalak berriki konprometitu dituen 5 milioiko kredituak.
  • Metroaren indusketa lanetan zehar Kontxako hondartzaren eta hirigunearen azpian gertatu diren arazo larriak eta egin egin behar izan diren “larrialdi-obra” eta zementu-injekzio ugariak kontuan hartuta, azpiegiturak mantentze-kostu oso altuak ere beharko dituela iragarri daiteke, hain zuen ere hiriko hareatzetan eta ibai-marea lurretan pilatzen diren uren filtrazio iraunkorrek tunelaren gain eragindako presio hidraulikoaren ondorioak jasan beharko dituelako. Obra hau hiriko lurpearen ezaugarriak aintzat hartu gabe egin dela erakusten du “indusketa-fronteetan ur asko eta hareak ustekabean agertzearen” ondorioz eraikuntza-lanak bi urtez eten behar izanak, eta zulo handi hori hipoteka larria izango da gerora hiriarentzat. Bestalde, Erdialdea/Kontxako geltokiaren kokapena dela-eta, trazadura oso “bortxatu” bat eraiki behar izan da sakonera handira jaisteko, eta horrek trenen energia-kontsumoa eta ustiapen-kostuak ere izugarri areagotuko ditu. Eskailera mekanikoetatik 40 metro beherago eraikitako geltokira jaistea ikaragarria izango da, baina garaiz kanpoko desmasia eta obra desfasatu bat dela ohartuko gara berehala, hainbeste baliabide publiko xahutzea eta energia nahiz hormigoi kontsumitzearen jasangarritasun ezagatik besterik ez bada ere. Aipamen berezia merezi du, halaber, Pio Barojako Larrialdi-Irteera Galeriaren arriskugarritasunak —500 m luzerako arrapala eta guztira 400 eskailera ditu, 68 metroko desnibela gainditzeko, hots, 24 pisuko dorre baten altueraren parekoa—, tunelean istripu larriren bat edo suteren bat gertatuz gero ondorio tragikoak izan ditzakeena.
  • Donostian hirigintzaren arloan pairatzen dugun espekulazio jasanezinaren arazoa larriagotuz, Metroaren etorrerarekin hiriguneko denda eta lokalen prezioa are gehiago garestitzen ari dela jakinarazi dute joan den ekainean hainbat informaziok. Bistan da udal agintariek eta kudeatzaileek bertako biztanleei begirako hiri bat pentsatzeari utzi egin diotela, eta Metroak Erdialde/Kontxako “bihotz turistiko eta komertzialera” bisitari eta kontsumitzaile gehiago erakarriko dituela espero duten lobby ekonomikoen interesak baino ez dituzte bideratzen. Era berean, EuskoTrenen Amarako geltoki nagusia ezabatzeak eta trenbide-orube osoa eraikinez betetzeak ez dio etxebizitzaren arazoa konpontzeko interesari erantzuten, Metroaren sustatzaileak lurzorua birkalifikatzearen ondorioz gainbalio handienak lortzeko duen interesari baizik. Hirigintza molde harrapari bat sustatzen ari da Amaran, hiriko auzo guztietan bezalaxe.

Horregatik denagatik, zuen parte-hartzea espero dugu, baita zuek informatu eta animatuko dituzuen lagunena ere. Kartela atxikita doa.

Halaber, deialdiari sostengua emateko proposatzen diegu erakunde eta talde sozial guztiei.

DONOSTIAKO METROA: BEHARGABEKOA – EROKERIA!

Satorralaia bizilagunen mugimendua

Harremenaterako tlfnoa: 695715510

Emaila: satorralaia@gmail.com

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

Utzi iruzkina

Azken artikuluak