Eskubiko Ezkerra

Antifaxismoa exkerraren klaudikazioak ezkutatzen dituen estalpe bilakatu da

Sistema kapitalistak bere burua berrasmatu du gizartearekiko kontrola izugarriki handituz azken berrogeita hamar urteetan, baina larriena da ezkerra ere kapitalismoak berrasmatu duela.

7

Asier Bastarrika Gorostiza

Okina eta aita. Basabizizalea. Aia

Aspaldi utzi dio ezkerrak kapitalismoarentzat mehatxagarri izateari. Azken berrogeita hamar urteotan sistema kapitalistak bere burua berrasmatu du, baina larriena da ezkerra ere sistema berak berrasmatu duela, orain den subjektu zorabiatu erridikulua bilakatzeraino.

Fatxarik ez balego asmatu egin beharko lituzkete ezkerreko jaunanderetxoek, beraien bizimodua zuritzeko

Ezkerra ez da jada herritarrok botereari aurre egiteko antolatutako mugimendua, Unibertsitateetako laborategietatik eratorritako loritoen zirkua baino, eta, jatorrizko asmo guztiak baztertu, kapsulatu edota momifikatu ondoren, faxismoaren moduko txorimaloa behar du txotxongilo emanaldian inor dela erakusteko. Fatxarik ez balego asmatu egin beharko lituzkete ezkerreko jaunanderetxoek, beraien bizimodua zuritzeko.

Faxismoari, aldiz, ezin hobeto datorkio bere burua egunero lotsagarritzen duen ezker hau, astapotrotegi nazia oposizioak abandonaturiko landa oparoetan hazteko.

Hariak gobernatzen dituztenentzat, biak ala biak dira osagarri eta beharrezko, geure arreta eta indarrak zirkuko hondarretatik gora altxa ez ditzagun.

Fatxatzat hartu gintuzten diktadura kobidistaren aurkariok

Antifaxista autopertzibituek ez zuten ahotsik altxa diktadura kobidiar farma/militarraren aurrean. Errazagoa izan zitzaien gu bezalako etsai ezdeusa borrokatzea, boterearen egiturei aurre egitea baino.

Kobidaroan erruz xahutu zen diru publikoa aberatsenak gizentzen, eta bide batez osasun zerbitzuak gure muturren aurrean deuseztu. Administrazioan herritarrekiko arreta zuzena desagertu da, ziber-magia txapuzeroaren esku utziz herritarron egunerokotasunaren gobernua.

Darwinen madarikazioren batek eraman behar omen gintuen, baina hemen gaude, temati

Darwinen madarikazioren batek eraman behar omen gintuen, baina hemen gaude, temati. Harrezkero, ezusteko hileta batzuetara joan gara bat-batitisak jotako lagun eta senideak agurtzera, turbo-minbiziak ikusi ditugu, iktusak jotako jende sano ohia… Gusto txarrekoa da galdetzea zenbat dosi sartu ote zizkieten, eta egunero grafiko eta estatistikez asetzen gintuzten haiek afizioz aldatuta dabiltza, ugazabek hala aginduta.

Eta fatxak gu ginen edo, onenean, fatxek engainatutako gizajo atzeratu magufo antizientifikoak. Horrela etiketatzen gintuztenak, aldiz, jende arduratsu zintzo solidarioa; batzuk demokratak, beste batzuk iraultzaile marxistak, baita anarkista sentitzen diren batzuk ere. Orain gor-mutu dira, iruzurra agerian geratzen ari denean, isilkeriatan gordeta, eragindako osasun kalte eta erailketa zientifikoak salatu gabe.

Fatxatzat hartzen dute Espainiar Gobernua kritikatzen duena

Ez da komeni demokrazia eta ongizatea defendatzen dituen gobernu progresistaren aurka egitea, faxismoari mesede egin eta bide batez aukera lehiotik amiltzeko aukera historikoa zapuztuko genukeelako.

Hogeita hamaseiko altxamendu militarraren oinordeko den Gobernua faxistengandik defendatu behar omen dugu, egiturazko ustelkeriei ez ikusiarena eginez.

Barne ministro torturatzailea duen Gobernua faxistengandik defendatu behar dugu.

Hogeita hamaseiko altxamendu militarraren oinordeko den Gobernua faxistengandik defendatu behar omen dugu

Antifaxistek egunero defendatzen dute Españako gobernua, prentsan eta parlamentuan, kritikatxoren bat eginez tarteka, baina sostengu osoa emanez.

Fatxa da aldaketa klimatikoaren aitzakian burutzen ari diren edozerkeriarekiko mesfidantza ere

Oligopolio energetikoak lur eta itsasoak porlanduz eta desjabetuz mundua salbatzera datoz, elektrifikazio garbiak petrolioa ordezka dezan; hori bai, prozesuan petrolio ugari erabilita.

Edonongo Lurraren erraiak bortxatu behar dituzte Mugarik Gabeko Meatzariek energia jasangarrirako trantsizioa burutzeko behar diren mineralak eskuratzeko, hango biztanle atzeratu ezjakinek oztopoak jarri arren aurrerapenari.

Lurraren erraiak bortxatu behar dituzte Mugarik Gabeko Meatzariek

Aldaketa klimatikoak euri jasak eragitean, lur porlanizatuek ezingo dute ura xukatu eta uherrak abiada biziagoan eramango du dena, soildutako zoruek eguzkiaren berotasuna islatu eta tenperaturak igoko dira, baina errua fedegabeona izango da antifaxistek ondo dakiten bezala.

Fatxa da Herriak bizirautea nahi duena ere

Elkartasuna izan da giza garapena ahalbideratu duen estrategia komunitarioa, baina, hori inguruko jendartearekiko harremanean eratzen danez, unibertsitario antifaxistek dioskute komunitate xenofoboak direla, ez dutelako egunero gerturatzen zaien jendea baldintzarik gabe onartzeko gaitasunik. Horretarako gaitasuna erakundetze piramidalak soilik eskain dezake eraginkortasun eta giza eskubide berme guztiekin.

Horregatik, Herri Antifaxistaren ateak inongo baldintzarik gabe ireki behar dira, 24/7, etxeak itxi eta giltzak aberatsenen eskuetara igarotzen ari diren garaiotan.

Fatxa da Europar Gobernuaz askatu nahi duena

Ezaguna da Bruselan politikari beste tratante dagoela. Ekonomian pisua duen edonork borondateak baldintzatzeko bulegoak ditu bertan, erosi, xantaia egin, mehatxatu eta beharrezkoa den indar guztia erabiliz politika europarretan eragiteko.

Han egunero erabakitzen dira gobernatzen gaituzten politikak, gero guk bozkatutako udal edo gobernutxo antifaxista jatorrek ezinbestean bete beharko dituzten politikak, hain zuzen ere.

Egunetik egunera ari dira Bruselan kapitalismoa oztopatzen duten lege guztiak deusezten, baina faxistak “antieuropeistak” dira

Egunetik egunera ari dira Bruselan kapitalismoa oztopatzen duten lege guztiak deusezten, politika sozialak zein ingurune eta osasunaren defentsarako ditugun helduleku apurrak alegia, dirua egiteko makinak agintzen duelako zenbat eta kontzentratuago boterea, gobernatzen errazagoa dela, baina faxistak “antieuropeistak” dira.

Eta hala ere, antifaxismoa bilakatu arren borroka bakarra, faxismoa aparra bezala dator goraka.

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

7 erantzun “Antifaxismoa exkerraren klaudikazioak ezkutatzen dituen estalpe bilakatu da” bidalketan

  1. A ze panorama gelditu zaiguna. Faxistak eskuinean, faxistak ezkerrean, faxismoaren masa-psikologia luze-zabalean. Nondik jo?

  2. Erabateko dekadentzian sartutako mundu honetan, non degenerazio maila pentsaezinetaraino iritsi den, hitzak, kontzeptuak, ideiak, guzti-guztiak bortxatu dituzte. Denak balio du gauza baterako eta kontrakorako. Mundu fiktizio batean bizi izan gara, eta hor ezer ez zen zirudiena.

  3. Itsutasun larria hedaturik da aspalditik. …….
    Orain bazterra jotzera al ziek? Bastarrika.
    Gau hau pasako ote duk.
    Eta goizeko ihintzak busti.
    Eskerrik asko. Hor eta hemen izate arren.

  4. Betierekoan iraungo digun antolaturiko mugimendurik ez bai da inoiz izan. Ezagutu izan ditugu gizaldi bat baino gehiago iraun diguten sagarrondoak, baina bakarren bat edo… Usteldu artean. Antolaturiko mugimendua bere buruaren jabe izanik, gehiengoaren mesedegarri izango bada, etengabeko landaketa bat eskatzen du. Etengabe ereitea, sortzea eta zaintzea, lantzea. Herri honetan azkena sortu zen antolaturiko herri mugimendu burujabea, benetan kapitalaren botereari aurre egiteko…. Puff, denbora asko da. Eta ustelduak ditugunengatik zerbait espero izatea, errege(a)lien zain egotea bezala da. Sagarrondo ustelduek ez dute sagarrik ematen, pitzatu eta sutan agurtu lehen baitlen, berriei lekua eginez. Ez du merezi zirenen gainean indarrik galtzerik, berriak sortzea baizik, nik uste. Exker berriak erein, herriz herri, nazioz nazio, eskubidea badugu eta oraindik. Altxa, jeiki, irauli … iraun nahi badugu.

  5. Errealitatea den bezala irakurri eta adierazteko gaitasun hain urriaren jabe zarela erakutsi duzu Asier, betiko moduan. Eskerrik asko.
    Zuk mahaigaineratutako kontraesan eta problematikei beste bat gehituko nieke: Disidentziaren garapena mozteko instrumentu efektiboena bilakatu dela Antifaxismoa. Hau da, ultraeskuinari aurre egiteko gaitasunik ez dutela argi geratu den arren, honi benetan aurre egingo liokeen alternatiba herritarraren jaiotza itotzeko ahalik eta gehien egiten dute Antifek.
    Euren ekarpenik handiena sistemaren mantenua da: (sistemarentzat) politikoki zuzena den hortatik mugitzen hasten den guztia mozteko tresna baita.
    Eskerrik asko berriro.

  6. Halaxe da, Irular: disidentziaren garapena mozteko instrumentu efektiboena bilakatu da Antifaxismo*a. Eta oso baina oso kezkatzekoa da gure herri mugimendu eta antolakunde historiko batzuk diskurtso posmoneoliberal hori zein modu arriskutsuan hartzen ari diren ikustea. Izan ere, herritik sortutako eta ezinbesteko berezko ekimen gehiegi ikusi ditugu alferrik galtzen, hondatzen eta lehertzen horrelako maniobra interesatu eta pozoitsuen ondorioz. Gehiegi. Eta ez gaude horrelako galera gehiagotarako.

    Beraz, “antifaxista” deklaratzen denak oso argi izan beharko luke zertan ari den: ea benetan kokatzen den betiko eskuinetik datorkigun faxismo klasikoaren kontra bezala “ezker” autopertzibituaren posmofaxismo progre-kolorintxi-belizistaren kontra eta tinko, ALA Mendebaldeko gaurko gizartearen nazifikazio sozial orokorraren agente bat gehiago bilakatu den, bere utzikeria, akomodatze ideologiko eta bisio estrategiko eskasagatik.

    Ez genuke ahaztu behar modaren industria kapitalistak aspaldi atera zituela Che Guevararen kamixetak, eta horiek erostea ez zela antifaxista, Sistemaren asimilatu eta moda jarraitzaile txatxu izatea baizik.
    Ez genuke ahaztu behar Coca Colak aspaldi aldarrikatu zuela errebeldia, eta ez zela horregatik Coca Cola kontsumitzea ekintza errebelde bat, klaudikazioaren hasiera baizik.
    Ez genuke ahaztu behar Pfizerrek, Black Rockek eta NATOk zer sustatu duten, inplizituki eta esplizituki, azken urte hauetan.

    Eta euskaldunok ez gaude horrelako maniobra manipulatzaile, asimilatzaile eta instrumentalizatzaile bat ere gehiago jasateko baldintzetan.

    Euskaldunok, herriexistentzian iraun nahi badugu, ez genuke ahaztu behar PP-PSOE berdin dela; eta aplikatu hori gaur egunera. Posmoekin eskutik doana ERE eskuina da, eta azken batean faxista (denbora kontua da maskara erortzea). Gero alferrik da negar egitea gobernutxoetan faxista klasikoak ikusten ditugunean. Posmofaxistek alfonbra gorria jarri baitiete horra iristeko, arduragabekeria eta inkontzientzia osoz egitea hautatu duten TRAIZIO HISTORIKOAREN ondorioz.

Utzi iruzkina

Azken artikuluak