Hau ere gertatu da. Hau ere, hemen eta orain, niri ari zait gertatzen. Horregatik, hau ere irakurtzeko aukera izan dezazun nahi nuke.
Eneritz Zubiaurre Ituarte naiz. 41 urte ditut. Emakumea naiz.
2021eko martxoaren 14an, COVID-19aren aurkako txertoa hartu nuen eguerdiko ordu batean.
Hurrengo egunean ezin nintzen mugitu, ohean itsatsita gelditu nintzen. Poliki-poliki, orduak eta egunak aurrera zihoazen heinean, hitz egin ezin nuela, begiak ireki ezin nituela nengoen.
COVID-19aren aurkako txertoa hartu nuen eguerdiko ordu batean, hurrengo egunean ezin nintzen mugitu
Laugarren egunean, egun osoa lo pasa ostean, ni larrialdietara eramatea erabaki zuten etxekoek; ez nuen indarrik ezertarako, gorputza mugitu ezinik nengoen, mugitzeko esaten nion baina ez zidan kasurik egiten. Larrialdietan hainbat proba egin zidaten: analitikak, oxigenoaren saturazioa… Dena ondo zegoen. Etxera. Tratamendurik gabe. Jarraipenik gabe.
Hurrengo egunean okerrago nengoenez, berriro ere larrialdietara eraman ninduten; kortikoidea zainetatik sartu eta kortikoide tratamenduarekin etxera bidali ninduten.
Ohean pasa nituen 10 egun. Hilabete etxetik atera gabe. Hurrengo bost hilabeteak medikuen erantzunik gabe.
Bajan nago geroztik. Nire baja-paperean post-vacunal (RAM) jartzen du.
Lehen irteerak egiten hasterako maiatza zen. Etxetik 300 metrora mugitzeko gai nintzen, hasieran. Itsasoa ikustera kotxez eramaten ninduten, eta lortu dut oinez bertara iristea.
Amak gure etxean ezaguna den osasun-etxe batera joatera animatu ninduen. Txanda hartu eta uztailean izan nuen lehen hitzordua. Bertan, galdera sorta bati erantzun, zer sentitu dudan esan-entzun, ordura arteko ibilbidean egondako medikuen txostenak irakurri eta berehala polineuropatia edota nerbio-sistema periferikoan “desajuste” bat egon dela esan zidaten. Uztailetik hona beraiekin nabil: akupunturarekin, nutrizionistak jarritako dietarekin eta homeopatiarekin. Beraien laguntzarekin aurrera noa.
Beraiek esandakoarekin nire medikuarengana jo nuen berriro abuztuan. Neurologoarenerako hitzordua eman zidan, eta korrika erresonantzia magnetikoa, elektromiograma eta analisi espezifikoak. Aurrez patologiaren bat ote nuen aztertu nahi zuten.
Ez zen ezer halakorik agertzen. Egin zizkidaten azterketek polineuropatia bat gertatu dela diote, eta txertoaren ondorio izan dela.
Azaroan errehabilitazioko medikuak ikusi ninduen eta orain errehabilitazioan nabil.
Hau da niri gertatzen ari zaidana, hemen eta orain.
Txertatzea erabaki nuen. Nire osasuna kaltetu da. Ez dut COVID ziurtagiria lortzeko eskubiderik. Nire kasua ez da jasotzen txertoaren albo-ondorioen kasuen artean. Nire alabekin, familiarekin funtzionatzeko, egunerokorako behar besteko indarrik ez daukat. Idazteko edota hitz egiteko “hiztegia” galdu dut,…
Hau ere gertatu da. Hau, hemen eta orain, niri ari zait gertatzen.
Pandemiak oso egoera gogorrak ekarri ditu jende askorentzat, denentzat. Egoera gatazkatsuak sortu dira gure artean, kalean, besteak haien ekintza eta erabakiengatik epaitzeraino, gure artean haserretzeraino. Ezagutu ditugu kasu positiboak, COVID-19ak eragindako ospitaleratzeak eta heriotzak. Gogorra ari da izaten, eta hori guztia bizi izan dugunoi/dutenei begirunea eskaini nahi izaten diegu.
Iritziak iritzi, begirunea nahi dugu guk ere. Izan ere, hau ere gertatu da. Hau ere, hemen eta orain, niri ari zait gertatzen (eta beste batzuei ere bai). Horregatik, hau ere irakurtzeko aukera izan dezazun nahi nuke.
2021eko martxoaren 14an, COVID-19aren aurkako txertoa hartu nuen eguerdiko ordu batean.
Hurrengo egunean ezin nintzen mugitu.
Hunkigarria da hau irakurtzea niretzat, eta oso argigarria, ingurukoentzat ere. Eskerrik asko Eneritz hemen kontatzeko izan duzun ausardiagatik. Nire elkartasuna adierazi, ausardia horrek lagunduko zaituen ustea ere.
Besarkada haundia!
Gertatu jatzuna sentitzen dot. Guillain-Barre sindromeak zurearen sintoma batzuk antzekoak ditu, eta hau bai albo-ondorio gisa oso ezaguna da. EMAk be onartu dau. Mediku batzuek txertaketa-kanpaina hasi zanean nekatu arte polineuropatiaren arriskua aitatu eben.
Ziur egon tratamendu eta profesional egokiakaz osatuko zarela.
Ez dakit hemengo irakurleen artean nonor txertatuta dagoen, holan bada zure testigantzak hirugarren dosiagaz jarraitu ala ez erabakitzeko emendio ona egingo deutso.
Animo!
Eskerrik asko, Eneritz, zuri gertatutakoa kontatzeagatik. Beste askori errealitate hori ikusteko balio baldin badio behintzat… Animo eta segi aurrera, laster izango zara erabat osatuta.