Abenduaren 7an Brandy Vaughan, 45 urtekoa, hilik aurkitu zuen 9 urteko semeak Kaliforniako bere etxean. Txertoen segurtasunaren eta industria farmazeutikoaren krimenen ikertzailearen bat-bateko heriotzak ikerketa poliziala eragin du, Santa Barbara konderriko Sheriffaren Bulegoak iragarri zuenez. “Heriotzaren azken arrazoia eta berau zehazteko modua normalean 4-6 aste luzatzen den azterketa toxikologikoaren zain daude”, adierazi zuen komunikatu batean.
Brandy Vaughanek Merck konpainia farmazeutikoko salmenta-exekutiboa izan zen garaian, barrutik ezagutu zuen ustelkeria, berak saltzen baitzuen ia hogeita hamar mila pertsonen heriotza eta beste askorengan eragin kardiobaskular kaltegarriak eragin zituen Vioxx izeneko medikamentua.
Hau dela eta, Merck konpainia utzi zuen eta handik urte batzuetara, txertoen osagaiak ikertzen hasi zen, bai eta txertoak hartu eta ez hartzearen arriskuak ere. Munduan zehar bidaiatu zuen jendea hainbat ekitaldi, mitin eta sinposiotan heziz, txertoen, produktu farmazeutikoen eta beharrezkoak ez diren tratamendu medikoen arriskuei buruz. Brandy ezagutu zutenek esaten dutenaren arabera, jarraitzaile askok miresten zuten haren grina, indarra, zintzotasuna eta, bereziki, edozein pertsonarekin, edozein lekutan eta edozein unetan eztabaidatzeko zuen ezagutza eta ausardia harrigarria.
2015. urtean Kalifornian hezkuntza arloan SB277 derrigorrezko txertaketari buruzko lehenengo legeetako bat ezarri zen, seme-alabek txertoa ez hartzeko gurasoei beren sinesmen pertsonalak aipatzea debekatu ziena. Orduan eta erantzun gisa, Learn The Risk irabazi asmorik gabeko erakundea sortu zuen.
Brandyk semea kimika-interferentziarik gabe haztea aukeratu zuen. Bere hitzetan: “Zure seme-alabari zure ikerketa egin behar diozu, eta ez bakarrik esaten dizuten guztia sinetsi, bereziki istorioaren alderdi bat besterik ez denean: irabaziei lehentasuna ematen diena zure seme-alabaren osasunaren aldean”.
2015. urtean Sacramento hiritik SB277 legearen kontrako protesta batetik etxera itzuli zenean hura beldurtzeko ekintzak jasaten hasi zen, bideo batean salatu zuenez. Beste jazarpen ekintza batzuen artean, norbaitek, etxeko alarma-sistema indargabetuz, barruan sartu eta ordenagailua eta bestelako tresnak lekuz aldatu zituen, nahita beldurtzeko ekintza hauen arrastoak utziz.
Brandy Vaughanen heriotzaren inguruan susmo txar handiak daude. 2019. urtearen amaieran, hau adierazi zuen: “Zerbait gertatuko balitzait,… joko zikina da, eta badakizu zehatz-mehatz nor izan den eta zergatik, bizitza honetan dudan lana eta misioa direla eta”. Bihozkada fatidiko honek ondo islatzen du bazekiela bere bizitza arriskuan jartzen ari zela eskrupulurik gabeko interes farmazeutikoen aurka eta txertoen inguruko egiaren aldeko ekintzailea izateagatik. Izan ere, osasungintza naturala praktikatzen zuten eta enpresa farmazeutiko handien kritikari irekiak izan ziren mediku ekintzaileen heriotza kasu gehiago ezagutzen dira, bat-batekoak eta, batzuetan, modu misteriotsuan gertatu direnak, hau bezalaxe. Brandy Vaughan kasu horien jarraitzailea zen. Facebook-eko bere profilean honelakoak idatzi zituen: “Eginkizun handi bat daukat bizitza honetan, oso zaila eta beldurgarria denean ere. Inoiz ere ez nuke neure buruaz beste egingo”. Semeari dagokionez, Vaughanek hau idatzi zuen: “Bastien dena da niretzat eta inoiz ez nuke utziko”. Hamar urtean farmazia-produkturik kontsumitu ez zuela gehitu zuen. “Bestela esanda, ez nago ustekabean edo bat-batean hiltzeko moduan. Zerbait gertatuko balitzait, gauzak prestatu ditut lagun talde batek ikertzaile pribatuen talde bat kontrata dezan xehetasun guztiak jakiteko. Misio honetan edo antzeko batean asko izan dira erailak eta bada hau gelditzeko garaia. Iluntasunak ezin du garaitu”.
Children’s Health Defense taldeak, haurren osasunaren alde diharduenak, hitz hauek idatzi ditu Brandyri omenaldia eginez: “benetako gudaria izan zen, ama handia eta iraultzailea. Munduak aingeru handi bat galdu du eta gure mugimendua inoiz ez da bera izango hura gabe”.
Artikulu honek ere omenaldi txiki bat izan nahi du, txertoen segurtasunaren alde jardun izanagatik, horien arriskuez hainbat jende hezi zuelako eta lege bidegabeen aurka egiteagatik.
Brandy, eskerrik asko farmazeutika handien krimenen aurkako borroka gogorragatik!
Miresgarria Brandy Vaughan.
Bizitza koherentziaz betea nola eraman daitekeenaren adibide sutsua.
Eskerrik asko Ane Miren, Brandy gure artera ekartzeagatik.
Ea bada Brandy Vaughanen lagunek kontratatu bide duten ikertzaile pribatu taldeak heriotzaren arrazoiak lehenbaitlehen argitzen eta argitaratzen dituen eta iristen zaizkigun.
Bestetik, sistemaren kontra asko dago esateko, industria farmazeutikoaz asko, baina hitzaldiren bat entzun diot eta argudiaketa finagoa behar dela iruditzen zait. Bestela inora ez garamatzan manikeismo batean erortzen gara: batzuentzat, sistema dena ona da, besteentzat, dena txarra. Eta posizio horietatik eztabaida eraikitzailerik ez dago, sinesmen itsuak baino ez.