Natura ala hil ala natura hil

Pasa den apirilaren 17an, Frantziako Ariège eskualdeko baserrian ikusitako irudiek ezinegona eta haserre gorria eragin dute berriz.

120 gendarme, dronak zeruan behiak distantzian ihiztatzeko, zoologikoko albaitariak, fusilak eta frantses administrazioko beste zenbat ordezkari Christelle Record laborariaren 30 behiak txertatzeko.

Bai, gerra irudiak ikusi ditugu bere behi taldea babesteko bukaeraraino borrokatu den Christelle laborariaren behiak bortxaz txertatzeko…

Bakarrik esaldi hau idaztean, duela urte gutti pentsaezinak ziren gertakari hauen distopia maila agerian gelditzen zaigu askori.

LIBRe kolektiboak mobilizazio deiak biderkatu ditu, txertatze masibo eta ez beharrezkoak gelditzeko

Duela hilabete batzuk DNK (Dermatosi Nodular Kutsakorra) gaixotasun arinaren kontra Frantziako osasun agintariek indarrean jarri neurriak salatzeko sortu den LIBRe kolektiboak mobilizazio deiak biderkatzen ditu Euskal Herrian zein Frantzian txertatze masibo eta ez beharrezkoak gelditzeko eta osasun agintarien neurri ero eta inutilak salatzeko. Kolektiboak justizia aurreko salaketak eta laborariak babesteko ekintzak ere antolatzen ditu behi hazleen erabakitzeko eskubideak aldarrikatzeko.

Bestalde, zientzialari askoren ikerketak eskatu dituzte DNK gaixotasunaz piztu alerta erlatibizatzeko, administrazioek hedatu datuak eta arrisku mailak berrikusteko eta halako gaixotasun bati aurre egiteko neurri eraginkorrak eta hobeak animalientzako existitzen direla agerian uzteko.

Baina, berriz ere, kolektiboko laborarien galderen, jarreren eta aterabide proposamenen aurrean, agintarien eta beste eragileen isiltasuna nagusitzen da eta osasun erakundeen propagandak leku guztia hartzen du, espiritu kritikoari, behatze objektiboari, gogoetari eta eztabaidari leku izpirik utzi gabe.

Neurriek oinarri zientifikorik ez zutela frogatu eta laborariak haserre gorrian sartu zirenean, txerto masiboaren karta atera zuen gobernuak

Gogoratu behar da DNK gaixotasunaren krisi hau 2025ean hasi zela Frantzian eta Ipar Euskal Herrian. Garaian, osasun erakundeak behi taldeak osoki hiltzen hasi ziren gaixotasun kasu bat agertu orduko… Muturreko neurri horiek oinarri zientifikorik ez zutela frogatu eta laborari asko haserre gorrian sartu zirenean, txerto masiboaren karta atera zuen gobernuak, krisiari amaiera emateko.

Aterabide hura onartu eta laborari gehienek onartu zuten behiak txertatzea… baina berriz ere txertoaren eraginkortasun eza agerian gelditu da hilabete batzuen buruan. Izan ere, DNK kasuak berriz agertu dira eta berriz ere administrazioak txertatzea agintzen du, abereek eta laborarien jarduerak segitu ahal izateko. Berriz ere, bizigaiak txertatze amaigabera kondenatuak.

Laborari askok lanbidea utzi dute, asko depresio batean sartu dira eta askok ere beren buruaz beste egin dute

Erran gabe doa laborari askok etsipen erabatekoa bizi dutela hazten dituzten abere osasuntsuak egun batetik bestera albaitariek akabatzen ikusi dituztenean. Askok amore eman eta lanbidea utzi dute, asko depresio batean sartu dira eta askok ere beren buruaz beste egin dute, mundu honi zentzua galdurik.

Bestalde, gero eta gehiago dira osasun erakundeen jarrera bortitza salatzeko mobilizatzen ari direnak. Euskal Herrian adibidez, ELB sindikatak bat egin du LIBRe kolektiboarekin eta elkartasuna erakusten die orain txertoa ukatzen duten behi hazlei. ELBk ohartarazi du iaz behi hazle gehienek onartu zutela txertatze kanpaina, eta gaur egun hemengo baserrietako abereen %90 inguru txertatua izanik ere, gaixotasuna berriz agertzeko mehatxua dutela buru gainean. Ondorioz, mirakuluzko aterabiderik ez dela argi dute eta txertoa berriz proposatzeak ez duela zentzurik ere bai.

ELB sindikatak bat egin du LIBRe kolektiboarekin eta elkartasuna erakusten die orain txertoa ukatzen duten behi hazlei

ELB sindikatak eta LIBRe kolektiboak badakite Frantziako Ariège departamenduan bizitako egoera mingarri bezain sinesgaitza noiznahi errepika daitekeela Baxe Nafarroa, Xiberua edo Lapurdiko baserri batean.

Orduan zer gertatuko da? Euskal Herrian zer gertatuko da jendarme frantsesak baserri batean bortxaz sartzen direnean abere osasuntsuak hiltzeko?

Zein izanen da euskal politikarien, sindikaten, eragile sozialen, ekologisten, abere babesle elkarteen eta kalitatezko laborantza babesten duten eragileen jarrera? Nori luzatuko diote mikroa eta nor isilduko dute aldi huntan tomate goxoak eta txuletak gustuko dituzten kazetari eta erredaktore buruek?

Euskal Herriko gizartea atxikia da, anitz, kalitatezko laborantza lehenetsi duten euskal laborariei. Gure herrian betitik erakutsi digute natura errespetatzen, lehenesten eta ahora ekartzen duguna ongi hautatzen. Euskal Herriaren ibilbide politikoarengatik, askok txikitatik ikasi dugu hedabide gezurtiek eta kanpoko ahotsek matrakatutako diskurtso esklusiboak begi zorrotzez ikusten eta pentsamendu kritikoz ikertzen.

Globalismoaren pozoia borrokatzen ikasi genuen, osasunaren banderapean munduko handiek izua sartu eta sumisioa eta zatiketa nagusitu ziren arte

Globalismoak tantaz tanta isurtzen duen pozoia ikusi eta borrokatzen ikasi genuen, osasunaren banderapean munduko handiek izua sartu eta sumisioa eta gure arteko zatiketa sakona nagusitu ziren arte. Mercosurrekin datozen elikagaien kalitate kontrolik eza eta ondorio larriak hasi besterik ez dira egin laborarientzat eta kontsumitzaileentzat. Hazi transgenikoen onespena ere bozkatzekotan dira Parisen, asmatu duten izen berri baten atzean gorderik.

Alegia, mundu huntako elitearen erasoak ez du etenik, natura babestu eta bizia edertu nahi genukeen herritar soilen kontra. Berriz ere ikasgaia begi bistan dugu eta guri dagokigu naturaren erakustaldiaren ala batzuen diskurtso ederren artean bidea hautatzea.

Orduan, mutu ala mobilizatu? Elkartu ala baztertu? Hor dago koska.

Gora LIBRe kolektiboa eta bizigaien defentsa!