Maiatzaren azken astea
Gaur arrautza ekologiko ekoizle batekin aritu naiz hizketan. Bera ornitologia zalea izanda eta ni baino zientziazaleagoa, eskerrak ematen ari zen hegaztien kartzelaratze agindua altxa eta gero etorri delako beroaldi hau. Hegazti gripearen hedatzaileak hegazti errariak omen diren arren, ez dira batere kontuan hartu haien migrazio zikloak kaiolaratze aginduak ezarri eta altxatzeko. Orduan, zeintzuk izan ote dira irizpideak? Dottoreek jakingo dute. Lagun hau kokoteraino dago baldintza sanitario-burokratikoez, beste laborariak lez.
Kokoteraino dago baldintza sanitario-burokratikoez, beste laborariak lez
OCA (nekazal bulegoaren izen española).
Lagun horrekin egon eta gero, oka bulegora gerturatu naiz betearazi nahi zidaten papermetari uko egitera. Teknikariak sartzen ikusi nauen unetik galdetu dit ea baja eman nahi nuen lur eremua ekoizle erregistrotik, asko hala egiten ari omen garelako. Gauza da, duela urte batzuk, etxeko gaztainei okindegian probetxua emateko saiakeran, paperak betetzen hasi ginela, etsi arte. Gaztain irina oso elikagai preziatua eta urria den arren, hain da korapilatsua lehen sektorean ekoizteko edozein prozedura, papermortuan galdu eta bidean geratu ginela. Gune komertzialen paradisu gastronomikoan, nori axola dio ba makina bat milioi eta milioi bat makina mugitzen ez dituen bertako ekoizpen natural osasuntsuak? Paperezko barrikadak ezarri eta ahaztuko dira tematiak (papera diodanean, bere bertsio informatikoa barne ulertu behar da).
Aste honetan bertan, abereen hautazko txertaketaren defentsarako LIBRE kolektiboko kide batek frantziar elikadura eta bla-bla ministroari luzatutako galdera sortetako batean, galdetu du ea zertarako alferrik galdu duten bi milioi t´erdi kilo behi haragi sano azken hilabeteetan, behiak prebentiboki akabatu eta zaborretara botata. Erabaki horiek ere hilkor arrunton jakintza iristen ez den maila gorenetan hartuak dira geure hobe beharrez.
Donostian, aldiz, kaleetan jende ilara luzeak ikusten ari dira tortilla pintxo bat eskuratu ahal izateko edo Donostiako gazta tarta tradizional ezagunaren txataltxo bat. Jendetza gosetu hori garaiz iritsi ahal izateko ilaran kaleak blokatzera, gogotik aritu dira txakurrak Loiuko aireportuan Zibilizazioa oztopatzen diharduten betiko tematiak egurtzen.
Adegiko jauntxoak kezkatuta daude beraien neurrirako eskulan eskasia dela eta, eta Estatuari etorkinak erakartzeko erraztasun politikak agindu dizkiote. Besteak beste, diru publikotik etorkinen alokairu edo alokaruak ordaintzeko hileko laurehun euroko laguntza publikoa proposatzen ari dira, eta etxebizitza publikoetan sartzeko erraztasunak, kanpotarrentzat bizitza oso garesti omen dagoelako hemen. Ez zaie burutik pasa ere egin langileei duin bizitzeko beste ordaindu behar litzaiekeenik. Soldaten igoerak geure ekonomiaren lehiakortasuna kaltetuko luke eta etxebizitzaren prezioak mugatzea merkatu librearen aurkako erakundeen esku hartze onartezina litzateke. Hauek Sozialistak beharrean Sizilistak dira.
Ez zaie burutik pasa ere egin langileei bizitzeko beste ordaindu behar zaienik
Bitartean, erdaldunberri oldea euskaldunberritzeko asmoa adierazi du Idurre Eskisabelek kasino jokalari keinuarekin. Haien ikerketa burutsuen arabera, hirurehun mila euskaldun berri behar ditugu; berez sortzen ez badira, kanpotik ekarri eta tuneatu.
Irudikatzen ditut etorkin eusklaboberrigai alaiak euskara gogotik salbatzen bertako gehiengoaren utzikeriagatik. Turista pintxokolalariak ere, ilaran espaloiak oztopatzen dituzten bitartean, euskalduntzeko app bat erabiltzera gonbidatu ditzakegu eta, bukatzean, galdetegitxo bat gaindituz gero, euskaldun txartela oparitu. Horrela erraz biderkatu genezake euskaldun kopurua.
Zerbaitetan behintzat badago kontsentsua patronal, politikaritza eta euskalgintza ofizialaren artean; kanpotar oldeak salbatuko gaitu.
Hori bai, hondartzak lepo egon dira egunotan. Astegun buruzuriak abuztuko igandea zirudien Zarauzko malekoian. Horrek, benetan, itsasoan murgildu, giza paisaiez gozatu eta kezkak erlatibizatzeko gogoa eman zidan, ingurua ulertzeko gaitasuna higatzen ari zaidala sentitzen ari nintzenean. Ekarpe diem.
Zarautzen elikagai ekologikoak saltzen dituen denda on bat itxi dute, lokala hartu duenak kirol medikuntza salduko omen du. Bi merkatalgune berri ireki dira, kartoi-igeltsuzko etxeak altxatzen ari dira erruz, garbigune izeneko zabortegia laukoiztu dute eta lau afitxa dotore ezarri dituzte herriko leku estrategikoetan udala eta mankomunitateak tokiko nekazaritzarekin duen konpromezuaren erakusle. Compro-mezua.
Jaiotza tasak lur jota dauden garaiotan, harritzen ninduen hainbeste etxebizitza eraiki beharrak. Norentzat ote dira etxe garesti kaxkarrok? Bertako gazte gehienek, gutxi izanda ere, eskuratu ezingo dituztenez, geure ekonomia eta hizkuntza salbatzera ekarri nahi den jendetza bizitzeko izango dira. Adegik erabakiko du diru publikoz erakarritako turista tropentzat izango diren ala behar dituen langile etorkinak bizi ahal izateko ordainduko dizkiegun denon artean.
Euskal Garbigune Herrikoia
Zaborrez hustu eta gogoa indartzeko asmotan, Elosun lagunekin berriro biltzeko irrikan nago. Laugarrenez bilduko gara aurten, okerrik ez bada, Independenteak deitutako Baraualdi Euskaldun Autoeratua ospatzera.
Lau, alor emankorra edota etxe bat eraikitzeko zorua izan daiteke, ez da hesola soil Bat, Bi sigi-sagatsua ezta Hiru erpina ere, Laua da.
Han elkartuko garenok zama toxikoa indar berrituarekin ordezkatzeko aukera landuko dugu, algara soziala isilarazita elkar entzuteko beta hartu, norbere barne hotsak aditu eta gorputzari atsedena eman.
Burujabetza bizitzaren artifizializazioaren kontrako bidetik etorriko da, bada
Burujabetza bizitzaren artifizializazioaren kontrako bidetik etorriko da, bada. Baraua da uko modurik zuzen eta xinpleenetakoa, ihesa ez den ukoa, errealitaterik sakonenari bizkar ematen ez diona, aurrez aurre jartzen gaituelako geure buruarekin zein inguruan ditugunekin.
Ongi etorri bidaia lagun izan nahi duzuenok!
EMAN IZENA – 2026 Baraualdia Uztailak 20-26 + Uzt. 20-Abu. 2
