Gaurko karlistak

Ezkerra, esistitzen denetik, progresoaren izenean, herri-jakituriaren aurkako kruzadaren, eskola derrigorrezkoaren edo misio zibilizatzailearen puntaren puntan izan da.

Historian aldi batez elkarren etsai izan baziren ere, Makina kapitalistak eta Ezkerrak dagoena hautsi beharra, bera daukate komunean.

XX mende bukaeran, tren sozialista matxuratuta, bere progresismoan ezin etsiz, tren neoliberalera igo zen Ezkerra. Tren horretatik, lehengo giza-balio oro eta hainbat kultur-balio ezezten dituzten ideologiak zabaltzen ditu.

XIX MENDEAN, karlisten aurrean, liberalek bentaja guztiak zituzten. Komunitateen destrukzioa (eliteen nahikeriek zekartena), azkar eta egokiago, haiek zuzenduko zuten… Berdin oraingo neoliberalek edo “mundialistek” ere, “patrioten” edo “atzerakoien” aurrean. “Atzerakoiek” defendi dezakete familia, patria, erlijioa… Ez da hori Makinaren norabidea. Eliteek eta haien eskutik heldu den teknologiak zuzentzen duten Historia, ez dijoa hortik.

Makina-gidariak ohartuta daude, EBko politikak errefusatzen dituzten herri-indar antiliberalak, euren interesetarako, potentzialki, ezkerrekoak baino arriskutsuagoak direla

Makina-gidariak ohartuta daude, Europar Batasuneko politikak errefusatzen dituzten herri-indar antiliberalak, euren interesetarako, potentzialki, ezkerrekoak baino arriskutsuagoak direla. Herritar “atzerakoi” horiek dira tokiko produkzioa (nola hala), haurrak (nola hala), edo, transhumanismoaren aurrean, giza-espezie zaharraren iraupena (nola hala!) defenditzen dituztenak.

Herritar “atzerakoi” horiek, gaurko karlistak direnak, “elite ustelak” gorroto dituzte – batzuetan, ezkertiarrak ere gorroto dituzte. Ezkertiarrek, beren aldetik, soilik “atzerakoiak” gorroto dituzte.

Makina-gidarien enkarguz, eta gogotik, Ezkerrak “atzerakoiei” erasotzeko eginkizuna hartu du beretzat.

Oraingo antifaxismoa, beste inondik baino, hortik ulertu behar da.