Fauci errudun nagusia da agian, baina inola ere ez bakarra

Goiko iruzkina komentatu aurretik zerbait argitu nahi nuke. Obamaren administrazioak 2014an debekatu egin zuen, formalki behintzat, birusen funtzio irabazpen saioak (gain-of-function) AEBko laborategietan egitea, ikusten zion arriskuagatik. Txinak ez zuen nonbait oztoporik jarri eta zeregina hara eramatea erabaki zuten. Dena dela, ez da egia AEBn esperimentu hauek egiteari utzi zitzaionik. Ipar Karolinako Unibertsitateko laborategian gaur egunera arte segitzen dute egiten, jarraian azalduko dugun aitzakian babestuta. Eta gaineratu beharra dago Tulsi Gabbard Inteligentzia Nazionaleko Buruak, dimisioa eman aurretik, 2026ko ekainean informatu zuela AEBk gutxienez 120 laborategi finantzatzen dituela munduan zehar, horietako asko Ukrainan, non esperimentuak egiten diren patogeno arriskutsuekin.

Zergatik egiten dira birusa gaiztotzeko saio hauek? Bi arrazoi; bata, agintariek esaten dutena, gezurra ziurrenik: balizko pandemiari aurre hartu diezaiogun, normala baino patogenoagoa den birus bat sortuz, gero harentzat erremedioak asmatuko ditugu, txertoak, esate baterako. Bigarrena, ezkutua, egia ziurrenik: arma biologikoak sortu ditzagun gerran erabili ahal izateko, mundu mailako legediak galarazi arren.

ez da kasualitatea Bidenek Fauciri indultua 2014az geroztiko ekintzengatik eman izana

Beraz, 2014tik aurrera Wuhango birologia laborategian esperimentu hauek egiten ziren, AEBk finantzatuta. Eta ez da kasualitatea Bidenek Fauciri indultua 2014tik aurrerako ekintzengatik eman izana. Pandemia lehertu zenean, zientzialari gehientsuek pentsatu zuten birusa laborategian sortua zela, tartean Luc Montagnier Nobel Sariak, eta ziurrenik baita Anthony Fauci berak ere, haren egunerokotik ondorioztatu daitekeenez, han esaten baitu dozena bat birologorekin bildu zela eta horietako bik bakarrik pentsatzen zutela berez sortua zela eta Wuhango merkatutik zabaldu zela.

Argitu beharreko beste puntu bat: nola lortu zuen Paul senatariak Fauciren egunerokoa? Gauza sinplea da, Fauci estatuko langilea zen eta kargua utzi zuenean bere ordenagailua izandakoan geratu ziren haren idatziak, eta Paulek eskuratu ahal izan zituen.

Fauciren izaera ulertzeko, oso adierazgarria da bere egunerokoan esaten duena, 2020ko maiatzean: “The situation with my national and international fame is explosive and really unimaginable. It is not hyperbole to say that today I am the most famous and talked about person in the country and one of the most recognizable persons in the world”. Hau da:

“Nire ospe nazional eta nazioartekoaren egoera lehergarria eta benetan imajinaezina da. Ez da gehiegi esatea gaur egun herrialdeko pertsonarik ospetsuena eta aipatuena naizela eta munduko pertsonarik ezagunenetako bat”.

denok dakigu Covidaren txertoa hartzeko eta hartzeko gomendatu zitzaiela haurdun zeuden emakumeei

Audientzian ia aipatu ere egin ez zen beste gai bat ere azaleratu da medikuaren mezuak argitaratu direnean: ea txertoak abortuak eragiten zituen. Gauza jakina da haurdun dauden emakumeei ahalik eta medikamentu gutxien ematen zaiela, ezta aspirinarik ere, haurdunaldiaren lehen hilabeteetan. Eta denok dakigu Covidaren kasuan alderantziz izan zela, hartzeko eta hartzeko gomendatu zitzaiela. Ikus dezagun zer esaten zion Faucik orduko Gaixotasunen Prebentzio zuzendariari, bidali zion mezuan:

“Galdetu nuen, eta kontuan hartu behar duzun arazo bat dago: ikusirik pertsona askok zitokina ekaitza eta sukarra dutela bigarren dosiaren ondoren, hau, teorikoki, lotua egon daiteke bat-bateko abortuekin, lehen hiruhilabetekoan”.

Handik egun gutxira Faucik telebistan esaten zuen txertoak ez zuela inolako arriskurik haurdun zeuden emakumeentzat.

Zera ere esan behar da agian; Faucik birikietako infarto bat jasan zuela 2021eko ekainean, lehen dosia kameren aurrean hartu eta sei hilabetera. Txertoagatik izan zela uste dute gaizki-pentsatuek. 2026ra arte ez zen hau jakin.

pandemiaren kontrako neurriak 2020ko martxoan hasi ziren hartzen, konfinamendu masiboa eta abar, eta garai hartan Donald Trump zen AEBko presidente

Lehenago ikusi dugunez, Karina Acevedo asko poztu da AEBko Senatuan gertatutakoarekin, eta gu ere bai. Poz handia ematen dit niri ere Fauci bezalako indibiduo bat umiliatua ikusteak, egin duen kalteak atzera bueltarik ez duen arren. Baina zalantza eta galdera batzuk sortzen zaizkigu, garai hartako historia errepasatu ondoren. Kontua da pandemiaren kontrako neurriak 2020ko martxoan hasi zirela hartzen, konfinamendu masiboa eta abar, eta garai hartan Donald Trump zela AEBko presidente. 2021eko urtarrilera arte egon zen karguan. Ezin izan al zuen gehiago egin kolapso hura ebitatzeko? Beraren baimenarekin hartu ziren lehen neurriak. Eta, bestalde, orain ahotsa jasotzen duten kargudun errepublikar asko orduan ere karguan zegoen. Ezer esan al zuten hartzen ari ziren neurriez? Nik dakidala, gehienek ez. Isil-isilik onartu zituzten ia guztiek.

Harrezkero sei urte igaro dira eta astia izan dute arbola astintzeko, behintzat azken urte eta erdian, Trump agintean egon den garaian. Kosta zaie mugitzea. Orain zerbait egin dute, eta, onar dezagun, ez da gutxi. Egia da Rand Paul senatariak urteak daramatzala gai honetan argia jarri nahirik, eta ziur aski oztopo ugari izango zituela bere alderdian ere. Bestalde, ezin da ahaztu egun osasun arloko buru den Robert F. Kennedyk 2021ean argitaratu zuen liburua: The Real Anthony Fauci: Bill Gates, Big Pharma…, non gogor kritikatzen duen Fauci krisiaren gestioagatik eta Big Farmarekin eta Bill Gatesekin dituen loturengatik.

plandemiaren barkua Faucik pilotatu bazuen ere, armadoreak beste batzuk izan ziren. Audientzian ez dira aipatu Pfizer, Moderna, Tedros Adhanom, Albert Bourla, Black Rock… Ezta narratiba hedatzen lagundu zutenak ere; Youtube, Twitter, Instagram, Mark Zuckerberg…

Bestalde, plandemiaren barkua Faucik pilotatu bazuen ere, armadoreak beste batzuk izan ziren. Senatuko audientzian ez ziren Pfizer, Moderna, OMEko buru Tedros Adhanom, Albert Bourla, Black Rock eta beste izen asko aipatu. Ezta narratiba hedatzen lagundu zuten Youtube, Twitter, Instagram eta abarreko jabeak ere, Mark Zuckerberg, esaterako. Boteretsuei aurre egiteko beldurra? Horrela ezin urrun joan.

Gaizki pentsatzen jarrita, errepublikarren jokaldi politiko gisa ere interpreta daiteke. AEB-Israelen Palestinako genozidioa, Irango gerra eta krisi ekonomikoa alderdi errepublikarra leku txarrean uzten ari direnean, demokratak zafratzeko aukera ederra. Gogoan izan laster izango direla legealdi erdiko hauteskundeak eta inkestek oso emaitza txarrak iragartzen dizkietela errepublikarrei. Une bikaina demokratak astintzeko. Izan ere, defendaezina defendatuz, itxura patetikoa eman zuten senatari demokratek Fauciren agerraldian.

PP eta Vox ez ditugu ikusiko honengatik Sanchezi kontuak eskatzen. Eta, Euskal Herrian, zeinek zeini eskatu behar dio ezer?

Baina gera gaitezen alde onarekin. Espainia eta Frantziako estatuetan ere badaude eskuina eta eskuin muturra, eta AEBkoek bezalatsu joka zezaketen, hemen ere badira-eta Fauciren klonak eta jarraitzaileak, baina gai hau ez da aipatu ere egiten. Espainian PSOE erasotzeko erabil zezaketen, bera izan baitzen krisia kudeatu zuena, baina lasai, PP eta Vox ez ditugu ikusiko honengatik Sanchezi kontuak eskatzen.

Eta Euskal Herrian zeinek zeini eskatu behar dio ezer? Gorago esana dugu hemengo hedabideetan ez dela lerro bat ere agertu Fauciren agerraldiaz. AEBn hautsak harrotu dituen notiziak ez du hemen orrialde ertz bat ere merezi. Ez da harritzekoa, kontuan izanda alderdi guztiek bat egin zutela Estatu Batuetatik zetozen irizpide faucitarrekin, eta gure hurbileko batek txertaketa!, txertaketa, txertaketa! aldarrikatu zuela.

eta zein izan da Txinaren papera zirko honetan? Kasu honetan ez da sinesgarria arma biologikoen kontua

Beste hainbat galdera ere etortzen zaigu burura: zein izan da Txinaren papera zirko honetan? Zergatik onartu zuen Txinako gobernuak Wuhango laborategian birusaren funtzio-irabazpen saioak egitea? Kasu honetan ez da sinesgarria arma biologikoen kontua, elkarren etsaiak izanda ez baitu logikarik elkarrekin arma biologikoak garatzeak. Beste zerbait egon behar du, baina zer? Txinazaleek diote agintariek ez zekitela ezer, eta AEBk Txinari leporatu nahi ziola birusaren sorrera eta hedapena. Txinako ekonomia izorratu nahi zutela, azken batean. Hori horrela bada, Txinaren ingenuitate maila estratosferikoa da. Oso sinesbera izan behar da hau sinesteko. Txinako agintariek ez dute argibiderik eman gaiaz, eta zain egon beharko dugu egia jakiteko. Baina aspertuko gara zain egoten.