Karina Acevedo pozik

Ondorengo testua Karina Acevedok idatzia da eta nik egin dudan gauza bakarra itzultzea izan da. Karina Acevedo mexikarra da, albaitaria formazioz eta immunologian aritua eta aditua. Oso paper garrantzitsua izan zuen plandemiaren hasieran, lehenetarikoa izan baitzen konturatzen nolako ziria sartu nahi ziguten Big Farmak, OMEk eta haien mesedetan ari ziren kazetari eta politikariek. Ni neu, beste asko bezala, oso eskertua nago berarekin, haren idatzi eta bideoak oinarrizkoak izan baitziren iritzi propioa osatzeko eta gainera zetorkigun uholde mediatikoaren aurrean argudioz hornitzeko. Hurrengo testua partekatu zuen Acevedok internetez AEBko Senatuan Anthony Fauci astindu zuten egunean.

Umiliazioa, 2026-07-29

Akasha Komunitateko kide agurgarriak:

Gaur, Anthony Fauci doktorea —garai batean "Ameriketako mediku" gisa goraipatua eta pandemian izandako rolarengatik txalotua— AEBko Senatuaren aurrean agertu da. Ez da borondatezko agerraldia izan; deklaratzera behartu dute. AEBko Konstituzioaren Bosgarren Emendakina baliatu du galderei ez erantzuteko; 111 aldiz egin du hori (horixe egingo zukeen errugabe batek, ezta? Jakina! Bai, sarkastikoa izaten ari naiz).

Fauci izan zen konfinamenduen eta beste neurri arbitrario askoren arduradun nagusia, eta paper garrantzitsua jokatu zuen SARS-CoV-2 birusa modu naturalean sortu zela zioen teoria ezartzeko orduan  —zalantzan jarri ezin zen dogma—. Izugarria da haren erantzukizun globala: milioika heriotzaren, isolamenduaren eta galera ekonomikoen erantzulea da..., planetako biztanle guztiek maila ezberdinetan jasan zuten hondamendiarena, alegia.

Rand Paul senatariak dokumentu batzuk argitaratzea lortu du —presio juridikoaren bidez eskuratutakoak—; dokumentu horiek erakusten dute Fauci doktoreak gezurra esan zuela, gertaerak desitxuratu zituela eta informazioa manipulatu zuela. Ez sinetsi niri: ikusi zeuek (hemen Fauciren egunerokoaren zertzelada batzuk). Hain da larria hor agertzen den edukia, non hedabide tradizionalak ere honetaz jardun beharrean aurkitu diren (CNN espainolez).

Zergatik egin zuen egin zuena? Ezin diot horri erantzun; baina, historian zehar bila daitezkeen adibideei begiratuta, ankerkeriak egiten dituztenek boterea, aitorpena, goraipamena edo dirua bilatzen dute, edo/eta ideologia baten nagusigoa. Fauciren egunkariak argi uzten du lehen lau faktore horiek bultzatu zutela haren jarduna. Sari ugari jaso zuen eta horiekin bakarrik milioi bat dolar baino gehiago irabaztea lortu zuen, eta gaur egun 12 milioi dolar baino gehiago ditu, baita urtean 400.000 dolarreko pentsioa ere. Patetikoa eta kriminala, zalantzarik gabe.

Joe Biden presidente ohiak immunitate osoa eman zion Fauciri kargua utzi aurretik; baina, Rand Paulek esan zuen bezala,"presidentearen indultuak auzipetze penalaren aurka babes dezake, baina ez du historia berridazten, ezta egia aldatzen ere". Baliteke haren krimenek ez izatea ondorio juridikorik, baina adulazioa eta goraipamena irrikaz bilatzen dituenari gertakizun honek min handia eragin behar dio. Fauciren umiliazioak ez ditu konpontzen milioika pertsonaren heriotzak eta sufrimendua, baina badakit egoera honek min ematen diola, eta handia, gainera. Fauci bezalako pertsonaien psikea —megalomanoa, nartzisista, gezurtia— erraza da aurreikusten. Espero dut umiliazio hori barruraino sartzea; hain sakon, non bere kartzela eta bere infernua bihurtuko den.

Nire izatearen muin-muinetik txalotzen dut gertaera historiko hau. Eta azken sei urteetan narrazio "ofiziala" itsu-itsuan sinestea erabaki zutenek —froga guztien gainetik—, orain zalantzan jarriko al dute? Tira, zer esatea nahi duzue? Erremedio gabeko baikorra naiz. Hemen ikusi daiteke agerraldi osoa (ingelesez). Eta hemen J. Hawley senatariaren galdera bitxiak, gaztelaniaz.

Eta ez pentsa senatari guztiak ados daudenik nire iritziarekin. Batzuek tinko defendatu zuten Fauci. Horrela funtzionatzen du ustelkeriak. Eta ez dut hau esateagatik esaten; adibidez, bigarren eta laugarren hizlariek —Gary Peters eta Maggie Hassan senatari demokratak— inbertsioak dituzte Pfizerren eta/edo dirua jaso dute Modernarengandik. Ondorengo loturetan frogak: 1.- opensecrets-pfizer-moderna, 2.- open-pfizerdonors.

Beraz, oraindik ere iragana "ikertzen" ari direlako haserretzen direnean, edo Fauci modu txarrean tratatzen ari omen direlako ia negar egiten dutenean, ez zait zaila egiten horren arrazoia zein den ulertzea.

Agur bero bat guztioi.