Transhumanismoa eta teknokraziaren aurrean, eutsi

Dr. Joseph Mercola doktorearen ingelesezko podcastaren itzulpen zati bat da hau,
Trikooban transkribatuta gazteleraz osorik 2022ko uztailaren 4an.

Lehenago esan bezala, narrazioak aldarrikatzen dituzten liderrak ere hipnotizatuta daude beti. Alde horretatik, fanatikoak dira. Hala ere, gaur egungo munduko liderrak transhumanismoaren eta teknokraziaren fanatikoak diren arren, ez dute nahitaez sinesten covidari buruz esaten ari
direna.

Askok badakite gezurrak esaten ari direla, baina gezur horiek justifikatzen dituzte beharrezkotzat jotzen dituztelako transhumanismoaren eta teknokraziaren ideologiak arrakasta izateko. Covidaren agenda irrigarria helburu baterako bitartekoa da. Horrexegatik jarraitu behar dugu presioa egiten eta salatzen; izan ere, lider horien aurkako argudioak desagertzen direnean are fanatikoago bihurtuko dira haien bilaketa ideologikoan.

Mattias Desmetek dio:

«Azken batean, behin betiko erronka ez da hainbeste jendeari frogatzea koronabirusa ez zela uste genuen bezain arriskutsua, edo covidari buruzko narratiba okerra dela, baizik eta ideologia hau problematikoa dela: ideologia transhumanista eta teknokratiko hori hondamendia da gizateriarentzat; pentsamendu mekanizista hau, unibertsoa eta gizakia sistema material mekanizista moduko bat direla eta modu mekanizista transhumanista baten bidez zuzendu eta manipulatu behar dela.

Horixe da azken erronka: jendeari erakustea, azkenean, gizakiaren eta munduaren ikuspegi transhumanistak gure gizartea erabat deshumanizatzea ekarriko duela. Beraz, uste dut hori dela aurrean dugun benetako erronka. Jendeari esatea: ‘Begira, ahaztu une batez koronabirusaren narratiba. Bide beretik jarraituz gero, teknologiaren erabateko kontrolpean egongo den gizarte transhumanista batera goaz, gizaki baten bizitzarako ezein espaziorik utziko ez duena’».

Horixe da azken erronka: jendeari erakustea, azkenean, gizakiaren eta munduaren ikuspegi transhumanistak gure gizartea erabat deshumanizatzea ekarriko duela

Mattias Desmet

Nik bezala, Desmetek uste osoa du azkar goazela totalitarismo global baterantz eta gauzak asko okerragotuko direla hobetu baino lehen. Zergatik? Bada, totalitarismoaren prozesuaren hasierako faseetan gaudelako bakarrik. Etorkizun hurbilean, identitate digitala agertzen ari da, eta berarekin batera kontrol-sare pentsaezineraino boteretsua dator, ia mundu guztia menperatzeko gai.

Argi izpia hauxe da: Formazio kolektiboa eta totalitarismoa aztertu dituzten guztiek biak berez autosuntsitzaileak direla ondorioztatu dute. Ezin dute bizirik iraun. Eta populazioa kontrolatzeko zenbat eta baliabide gehiago eskura izan, lehenago suntsitu lezake bere burua, totalitarismoak gizakiaren nukleoa deuseztatzen baitu.

Totalitarismoak gizakiaren nukleoa deuseztatzen du

Azken finean, “totalitarismoa” sistemaren anbizioari dagokio. Gizabanakoak hautatzeko duen gaitasuna ezabatu nahi du, eta, hori egitean, gizakia izatea denaren muina suntsitzen du, «gizaki baten energia psikologikoa gizaki batek benetan berea den aukeraketa bat egin dezakeen une bakoitzean sortzen delako», dio Desmetek. Sistema batek zenbat eta bizkorrago hondatu gizabanakoa, orduan eta lehenago eroriko da sistema.

Beste behin ere, gizateriaren suntsipen bortitzaren aurkako arma bakarra aurre egitea da, hitz egitea, indarkeriarik gabe eustea. Agian ez du totalitarismoaren ibilbidea geldiaraziko, baina astakeria izugarrienak arrastoan sar ditzake. Horrez gain, erresistenteak elkarrekin bizirauten eta aurrera egiten saiatzeko leku txiki bat ere eskainiko du paisaia totalitarioaren erdian.

«Orduan, arrakasta izan nahi badugu, egitura paraleloetan pentsatu beharko dugu, pixka bat autosufizienteak izateko aukera emango digutenak. Sistema gehiegi behar ez izaten saia gaitezke. Baina egitura paralelo horiek ere suntsitu egingo lirateke une batean, jendeak hitz egiten jarraitzen ez badu. Beraz, hori da erabakigarria dena.

Denon arreta horren gainean jartzen saiatzen naiz. Nahi adina egitura paralelo eraiki ditzakegu, baina sistema suntsitzaileegi bihurtzen bada eta bere ahalmen erasokor guztia erabiltzea erabakitzen badu, egitura paraleloak suntsitu egingo dira. Baina, sistema ez da inoiz iritsiko hipnosiaren sakontasun maila horretara hitz egiten jarraitzen duten ahots disonanteak baldin badaude. Beraz, nik neuk buru-belarri ekin diot hitz egiteari».

Sistema ez da inoiz iritsiko hipnosiaren sakontasun maila horretara hitz egiten jarraitzen duten ahots disonanteak baldin badaude

Mattias Desmet

Aurrerapen zehatzak egitea ezinezkoa den arren, Desmeten susmoa da ziur aski gutxienez zazpi edo zortzi urte pasatuko direla sortzen ari den sistema totalitarioak bere autosuntsiketa egin baino lehen. Izan liteke gehiago edo gutxiago. Gizartea sistema dinamiko konplexua da, eta sistema dinamiko konplexu sinpleak ere ezin dira aurreikusi ezta segundo bat lehenago ere. Honi ekosistema dinamiko konplexuen aurreikusteko ezintasun determinista deritzo.

giltzarria izango da hori guztia gainditzea eta ahal duguna egitea sarraskia ahalik eta txikiena izateko

Urte gehiago edo gutxiago luzatu, giltzarria izango da hori guztia gainditzea eta ahal duguna egitea sarraskia ahalik eta txikiena izateko. Norbanakoaren mailan, erronka garrantzitsua gizatasunaren oinarrizko printzipioei eustea izango da. Elkarrizketan, Desmetek Aleksandr Solzhenitsyn-en Archipiélago
Gulag liburuaz hitz egiten du, zeinak gizatasunik gabeko egoera batean zeure gizatasunari atxikitzearen garrantzia nabarmentzen duen.

«Hori da, agian, prozesu osoaren emaitza ona bermatzen digun gauza bakarra; nire ustez beharrezko prozesua dena, bestalde. Krisi honi ez zaio zentzurik falta. Ez da zentzugabekeria. Prozesu honetan, gizarteak zerbait berria sor dezake, orain arte existitu dena baino askoz hobea».

Itzulpena: Ane Miren Elordui-Zapaterietxe