digitalizazioa eta ingurumena

Teknologia ‘garbien’ matazan harrapaturik

Espainiako ‘tuperren legea’, paperezko frogagiria kentzea… zenbateraino dira ingurumenaren aldeko ekarpen eta zenbateraino teknologia kontsumoaren festak jarraitzeko distrakziorako kea?

5

Iñaki Lopez de Luzuriaga

Euskal Wikilarien Elkarteko kidea. Itzultzailea. Lasarte

Albiste dira egunotan klima aldaketari buruzko berriak, urte arteko konparazioak, eta aurten izan ditzakegun aurreikuspenak. Zer egin dezakegu tenperatura igoera eragozteko? Bada, neurri berriak datoz: Espainiako 1055/2022 Errege Dekretuaren arabera, Hego Euskal Herrian jada gure tuperrarekin sartu ahal izango gara bilgarri gisa supermerkatuetara, berrerabilpena sustatzeko. Erosketaren frogagiri papera ere kentzekotan dabilzkigu, klima salbatzearren beste bultzadatxo bat emateko, eta komuneko paperaren patua ere zein den…

ExxonMobil erregaien korporazioaren ikerketek (1977-2003) jada zehaztasun handiz aurreikusi zuten klima etengabe berotuko zela, baina nahiago izan zuten ezkutuan utzi. Hala argitaratu berri du Science aldizkariak, munduko zientziaren totemak. Aldiz, negozioari kalteak eragin ziezazkiokeela eta, ExxonMobilek ez zituen argitaratu ikerketaren emaitzak. Bagenekien erregaiak eta oihalgintza industriala ez zirela inondik inora onena gure klimarako. Erregai fosilak baztertze aldera, orain auto elektriko eta hibridoen erabilera sustatzeko neurri berriak datoz, eta murriztu egingo da hirietara ibilgailu ez oso berrietan sartzea.

Teknologiari eman zaio azken hitza, teknologia dugu ustezko lagun, garbi eta efiziente, ingurumen-salbatzaile

Teknologiari eman zaio azken hitza, teknologia dugu ustezko lagun, garbi eta efiziente (ingurumen-salbatzaile). Pixkanaka besterik agertzen ari dira gauzak, ordea, itsusi eta lohi. Arte telebista kateak (streaming bidez!) Frankenstream seriean argitaratu dituen datuen arabera, gailu digitalak eta tartean Internet dira munduko kutsatzaile handienetakoak. Smartphoneek bideoak barra-barra ikusteko modua eman dute, streaminga da jaun eta jabe, eta bi teknologia horiek bat egin zutenetik goranzko joera etengabea izan da berotegi efektuko gasen emisioetan.

Kutsadura digitalean, Youtube da erantzule nagusienetako bat, urtero 11 mila milioi CO2 isuriz atmosferara, Glasgow edo Frankfurt hiriek beste. PornHub, besteak beste, izango da beste erantzuleetako bat; izan ere, munduan kontsumitu streaming bidezko pornografiak 18.000.000 tona CO2 inguru askatu ditu 2022an, Belgikak beste, alegia. Guztira, gailu digitalek munduko berotegi efektuko gasen % 6 askatzen dute, abiazioak eta ia auto trafikoak beste.

Aldiz, etengabe xaxatzen gaituzte teknologiaren kontsumora. Hara, oso garbiak dirudite, zikin arrastorik ez gure begi aurrean, ez-fisikoak, ia etereoak: hodeia. Badator 5G (“pasa zaitez 5G-ra!)” eta hurrengoa, 6G. Ia denok gaude Interneteko matazan harrapaturik, eta nekez bekatutik libre. Datu goseak ez du mugarik. Bideo bereizmena hobetuz doa, datu emaria handituz doa, eta Gargantua digitalaren munstroa ere bai.

munduan kontsumitu streaming bidezko pornografiak 18.000.000 tona CO2 inguru askatu ditu 2022an

Streamingak 5G teknologiaren bidez datu zentro gehiago eskatzen ditu, eta horiek beharrezko dituzte aldamenean energia hornitzeko zentroak. Datu zentroak estrategiko bihurtu dira korporazio eta estatuentzat, eta haizatu egin behar dira gehiegi berotu ez daitezen. Smartphonetako harritxo preziatuek (koltan…), bestalde, ingurumen suntsipen handia dakarte, eta berotegi efektuko gas gehiago atmosferara.

Ongi dago bakoitzak geure aletxoa jartzea, baina benetan, Espainiako tuperren legea edo erosketaren paperezko frogagiria kentzeko aukera zenbateraino dira ingurumenaren aldeko ekarpen eta zenbateraino teknologia kontsumoaren festak jarraitzeko distrakziorako kea?

Iñaki Lopez de Luzuriaga, itzultzailea/wikilaria

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

5 erantzun “Teknologia ‘garbien’ matazan harrapaturik” bidalketan

  1. 2020an abiarazitako dispositibo plandemikoaren lerro estrategikoen artean daude digitalizazioa, ekonomia “inmateriala” eta abar. “Guztion onerako” omen horiek ere. “Publikoa” (norena?) izango dela esatea bakarrik falta zaie, eta, beraz, “ona”, medikuntza industrialistaren antzera.

    Eragozpenik ikusten diona eta diskurtso ofiziala zalantzan jartzen duena baztertzeaz, irrigarri uzteaz eta behar bada deabrutzeaz arduratuko dira.  Askotan, espero izango ez genukeen jendea izango da hori egingo duena.

    Nik jakin nahi nuke orain zein zulotan sartu diren gezur horiek sinistu eta propaganda guztia irentsi zuten haiek, eta, beraien delirioak eramanda, kristorenak eta bi esan zizkiguten haiek. Badirudi irribarre faltsu batekin estali nahi dituztela azken 2-3 urteak.

  2. “…, gailu digitalak eta tartean Internet dira munduko kutsatzaile handienetakoak.” “Youtube da erantzule nagusienetako bat, urtero 11 mila milioi CO2 isuriz atmosferara,…”
    Zergatik diozu CO2 kutsadura dela? Landarerik ez legoke CO2 gabe. Guk geuk isurtzen degu arnasterakoan.
    Ezagutzen al duzu “ZEU ZARA MURRIZTU NAHI DUTEN KARBONOA” eslogana? Hor nonbait, ezta?

  3. Iñaki, albiste paregabea da zalantzak eta galderak plaza publikora ateratzen hastea. Ondo bidean, luze gabe ohartuko da masa kritiko bat, klimaren eta ingurumenaren narratiba ofiziala primerako aitzakia besterik ez dela 4. iraultza industriala deitu duten esklabutza zaharberritu hori gizarteak gustuz hartu eta ontzat eman dezan.

  4. Klimaren gaia ez dut espezialitate, eta dibulgazio nahiak ekarri nau auzira. Ez dut aurkitzen arrazoirik CO2 emisioez dokumentalean ematen dituzten datuen gainean duda egiteko, eta bai, aldiz, pentsatzeko gailu digitalek eta streamingak sortzen duten emisioez ez zaigula ia ezer esaten. Bistan da elite ekonomiko-politikoek gizartean hedatzen ari diren produktu komertzialak direla, eta horien kontrako informazioa ez dela ongi etorria. Goraintzi

Utzi iruzkina, izen eta abizenez

Azken artikuluak