hitzaldia

Digitalizazioaren inguruko hitzaldi-eztabaida bihar Donostian

Adrian Almazan ikertzailearen hitzaldia 19:00etan izango da Donostiako Okendo kultur etxean (Gros auzoan).

4

Mikel Alvarez Forcada

Azpiegitura handien aurkako ekintzailea. Donostia

Digitalizazioaren ondorio sozialak eta ekologikoak

Urtarrilaren 29an, astelehena, Adrian Almazán ikertzaileak “Digitalizazioaren ondorio sozialak eta ekologikoak” izenburuko hitzaldia emango du, arratsaldeko 19:00etan, Donostiako Okendo kultur etxean (Gros auzoa). Hori dela eta, hitzaldi honetara biltzeko deitzen dugu, jendartean gero eta kezka handiagoa sortzen ari den munduaren digitalizazio azkarraren aurrean eztabaida sustatzeko.

Adrian Almazán, egun, Madrilgo Carlos III Unibertsitatean filosofia irakaslea eta Fisikan lizentziatua da. Ekologistak Martxan erakundeko kidea da eta digitalizazioak eragindako ingurumen eta gizarte inpaktu larriez ohartarazten ari da. Técnica y tecnología. Como conversar con un tecnolófilo (2021) liburua argitaratu du, eta Contra la doctrina del shock digital (2020) argitalpen kolektiboan parte hartu du besteak beste, non digitalizazio sozialeko proiektu baten ezarpena salatzen duen, aldi berean ez desiragarria, antidemokratikoa eta ekologikoki jasanezina dena. Era berean, dozenaka artikulu kaleratu ditu, kapitalismo digitalak gure gizarte hiperkontsumistaren kolapso ekosozialerako ibilbidea sakontzen duela azpimarratuz.

Kapitalismo digitalak gure gizarte hiperkontsumistaren kolapso ekosozialerako ibilbidea sakontzen du

Industria teknologikoak azken urteotan digitalizazioa izugarri azkartu du, hezkuntzan jarduera digitala orokortuz, robotizazioa hedatuz, teknologia hauei lotutako arrisku psikosozialak nahiz osasun-arazoak biderkatuz, eta herritarren jarraipen orokorrerako datuen pilaketa eta konputazio sistemak erakundeen eta enpresa handien mesedetan garatuz. Ildo honetan, gizartearen digitalizazio osoa sustatzen duen IBM korporazio teknologiko estatubatuarrak Donostian instalatzeko asmoa duen superkonputagailu kuantikoari buruz arreta piztu nahi dugu, bestalde.

Gizartearen digitalizazio osoa sustatzen duen IBM korporazio teknologiko estatubatuarrak Donostian instalatzeko asmoa duen superkonputagailu kuantikoari buruz arreta piztu nahi dugu

“Ez dakigu ordenagailu kuantikoek zer ekarriko diguten, baina Euskadik etorkizuneko erronketarako prest egon behar du”, adierazi zuen Urkullu lehendakariak Hezkuntza Sailaren aurrekontutik ordaindutako 50’8 milioiko IBM-ren gailu horren inguruan, eta Pedro Miguel Echenique ikertzaileak gehitu: “Teknologia berriak edozer izango dira, baina hor egongo gara”. Zaila da garapen teknologikoarekiko fede itsua agertzen duten adierazpen hutsalagoak eta inozoagoak egitea, edonolako hausnarketa eta eztabaida hutsean bihurtuz. IBM al da, ordea, behar duguna? Nora garamatza digitalizazioak?

Beraz, Satorralaia eta Ekologistak Martxan taldeek hitzaldi-eztabaida honetan zuen parte hartzea espero dugu, baita zuek informatu eta animatuko dituzuen lagunena ere.

(Antolatzaileekin harremanetan jartzeko telefonoa: 695715510).

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

4 erantzun “Digitalizazioaren inguruko hitzaldi-eztabaida bihar Donostian” bidalketan

  1. Eguerdi on, asko eskertzekoa dugu gai honen gainean arreta jartzea eta gaurko antolatutako ekitaldia.

    Eskertuko genuke gaur bertaratutakoek han hitz egin eta ikasitakoen berri ematea ere, hurrengo egunetan.

    Aipatutako erreferentziez gain (“Técnica y tecnología. Como conversar con un tecnolófilo” (2021) Adrián Almazán; “Contra la doctrina del shock digital” (2020) argitalpen kolektiboa), zer beste aholkatuko zenukete gaiari heltzeko?

    DesDigitalizazio gaia jarri behar dugu mahai gainean alde guztietan. Hori dagokigu orain. Neurriz kanpoegi jo dugulakoan nago.

    Kontu horretan ere atzerantza nola egin eta eragin?

    Horretaz pentsatzeko eta ekiteko gonbitea daukagu orain hemen.

    Uros bizi!

  2. Eskerrik asko.
    Zoriontzekoa. Ni, tamalez, urrutiegi gertatzen zait haraino joateko.
    Bada garaia herritarrok antolatzeko eta arlo guztietan inposatu nahi diguten kontu honen kontra egiteko. Ez dugu guk erabaki. Ez dugu nahi. Diktadura teknologikoa gelditu.

  3. Eskerrik asko, Eleder!
    (eta eskerrik asko, jakina, Mikel, antolaketa lanagatik!)

Utzi iruzkina, izen eta abizenez

Azken artikuluak