Bart, loak hartu bitartean zenbait lerro irakurtzen ari nintzela, jakinmina sortu zidaten gizakien beldurrei buruzko gogoeta interesgarri batzuk aurkitu nituen, eta, gure inguruan ere oso hedatuak daudela ikusiz (ez ahaztu egungo komunikabide eta sistema orok nagusiki beldurra erabiltzen duela gu guztiok menpean hartu eta kontrolatu ahal izateko; bestela geure inguruari, gizarteari begiratu besterik ez dugu), zertxobait moldatu, egokitu eta argitaratzeko gai polita iruditu zitzaidan.
Gure beldurrei buruzko gogoetak ziren, eta benetan interesgarriak. Begira bestela azken urteotan delako “mamuagatik” zenbaterainoko beldurra sartu diguten zainetan.
Beldurra, jaiotzen denetik hiltzen den uneraino gizakiaren parte izaki, bizirik irautearen oinarria ere bada. Bestalde, egon badago beldurrarekin gozatzen duenik ere. Beraz, irakurritakoa neure modura atondu dut bizitzak irakatsitako beste zenbait ideia erantsiz.
Bakardadeari beldurra
Psikologia munduan, “bakarrik aurkitzearen edo bakardadeaz” dugun sentimendua izen ugariz ezagutzen da: eremofobia, autofobia, monofobia e.a. Izen gehiegi uste eta susmo askori soluzioa nola eman adierazten ez denean. Kontuan hartu borondatezko (eta batzuetan derrigortutako) bakardadearen ondorioz guk uste baino jende gehiago hil eta hiltzen dela.
Antsietatea, lotsatia izatea, gure ingurunearekiko kultur diferentzia, maitasunari buruzko ezinezko estandarra idealizatzea, autoestimu baxua, ahalke sentitzea, psikologikoki eta fisikoki ezindua izatea edo apurka-apurka egoera fisikoa galduz joatea aipatzen dira norberak senti dezakeen bakardade horren arrazoi nagusitzat.
Bestalde, gizarte ereduek eta geure egoak eta pentsamenduek bakarrik gaudela sinetsarazten digutenean, besteekin loturarik ez dugula, bizitzako protagonista sentitzeko gai ez garela eta familian, bikotean, lagun-taldean, lanean eta gizartean elkarbizitzeko gauza ez izatearen sentimendua sortzen digutenean sortzen da bakardadeari beldurra.
Aitzitik, esan behar da bakoitzaren espirituak eta barne-indarrek osotasun baten parte garela gogorarazi nahi digutela, bizitzako energia integratzaileari lotuta gaudela (dei Jaungoikoa, Natura, Kosmosa zein Energia), geure barruan dugun barne-sugar horren bidez adierazten dena dela zabaldu behar dugun argia. Gai hauei buruz oso gutxi hitz egiten da, askotan tabu bilakatuz.
Har gogoan denboraren eta gogoetaren poderioz ulertuko dugula BAKARDADEA geurekin partekatzeko bizitzako aukera zoragarria dela eta, hain zuzen hori ulertzean, une horretan hasiko dira, beste gizakien konpainiaren hutsunea sentitzen badugu behintzat, gure sintonia eta intentsitate berdinarekin hunkituko gaituzten pertsonak agertzen.
Eskasiari beldurra
Urritasunean, diru eskasian, geure burua inolako aukerarik eta gogorik gabe gelditzeko arriskuan ikusten dugunean sortzen den beldurra gainditzeko lan handia egin behar du norberak bere buruarekin. Maiz, ez daukaguna amesten eta desiratzen dugu daukagunaz gozatu eta disfrutatu gabe. Hau askotan gertatzen da, eta, agian, hau izanen litzateke eskasiaren funtsa.
Biktima-sentimendua izatea beldurrak menperatzen zaituen seinale da. Pentsamendu hori baztertu eta goizean, iratzartzean, bizitzako momentu orori eskerrak emateak asko laguntzen du.
Daukazun guztiagatik eta lortuko duzunagatik eskerrak ematen dituzun une bakoitzean hasten zara bizitzak eskaintzen dizun guztia hautematen. Lotsatu egiten gara guztiagatik eskerrak ematerakoan. Doako irribarre bat eskaintzen digutenean beste aldera begiratzen dugu. Jakin dezagula eskerrak ematen hasten garen egun eta momentuan kenduko zaigula eskasiari diogun beldurra eta denbora gutxian zure desirak betetzen hasiko direla. Esperantzarik ez da galdu behar, SINESMENA indartu baizik!!!
(Jarraituko du)
Mila esker Iñaki, zoragarria litzateke heldu diozun gai honi jarraitzea, bai. Izan ere, eskasiaren beldur garen bezalaxe gara aurkakoaren beldur; eta bakardadeari den bezala, bada elkarbizitzari eta jendartean egoteari ere. Beti zerbaiten beldur, akaso ez dugu erremediorik. Norbere beldurra ongi ezagutu, eta berarekin bada ere, lepoan hartu eta segi eta jokatzea izango da kontua.