Itun pandemikoa

Meryl Nass mediku estatubatuarra: “OMEk erabakiko ditu osasunari buruzko gai guztiak”

Kontua da OMEk aholkatu ziola munduari zer egin behar zuen azken pandemian, ia herrialde guztiek jarraitu ziotela, eta bere gomendio bakar bat ere ez dela onerako izan.

1

Juan Martin Elexpuru

Euskal idazlea eta filologoa. Bergara

Meryl Nass mediku estatubatuarra Maine estatuan bizi da. Children’s Health Defense erakundeko ekintzailea da eta arma biologikoetan aditua. Medikuntzan aritzeko baimena kendu zion Maineko gobernuak 2022an “txertoekin” oso kritiko agertzeagatik eta mundu guztian emaitza onak ematen ari ziren Ivermectina eta Hidroxicloroquina bezalako farmakoak erabiltzeagatik gaixotasunaren aurka. Hemen afera horren xehetasunak. Italiako Byoblu telebista librean ingelesez eginiko elkarrizketa italieratik itzuli dugu eta hona ekarri. Bi zatitan argitaratuko da Independentean.

«Byoblu.- Lagunok, gaur gain-gainean dugun mehatxu batez mintzatuko gara, Itun Pandemikoaz, OME sekretuan eztabaidatzen ari den itunaz. Estatu Batuetatik datorren medikuarekin hitz egingo dugu, Byoblu-ren estudioan daukagun Meryl Nass doktorearekin. Bioterrorismoan espezializatua, Children’s Health Defense erakundeko aktibista, Europara etorrita dabil Itun Pandemikoaren arriskuez ohartarazi nahian.

Meryl Nass.- Duela 35 urte antrax izurritea aztertu nuen, eta artikulu batean frogatu gerra biologikoaren ondorioa zela. Lehen aldiz frogatu zen izurrite bat ez zela fenomeno naturala.

B.- Gaurko protagonista Osasunaren Mundu Erakundea da (OME), Covid krisia gestionatu duena mundu guztian, modu negargarrian gestionatu ere, gure iritzi apalean. Lehen galdera, nola jaio zen OME eta nola heldu da gaurko egunera?

M. N.- OME II. Mundu Gerra ostean sortu zen Nazio Batuen Erakundearen (NBE) azpi-agentzia gisa. OMEk ez du inolako eskumenik beste nazio batzuekin itunak sinatzeko. Organo kontsultiboa da. Hala ere, azken pandemian, zoritxarrez, OMEk bere burua gobernu-erakunde bihurtu nahi izan du, entitate kontsultibo izaten jarraitu beharrean, eta bete beharreko agindu lotesleak eman ditu. Gainera, zabaldu eta aldatu egin du Osasunaren kontzeptua. Esaterako, orain osasuna aldaketa klimatikoarekin lotuta agertzen da, edo urarekin, elikagaiekin eta abereekin. OMEk eskumena izango luke beste alor hauetan ere aginduak emateko. Eta aitzakia da azken pandemia gaizki gestionatu dela eta beharrezkoa dela gobernantza bakar bat ezartzea nazioei norabide egokia seinalatzeko. Kontua da OMEk aholkatu ziola munduari zer egin behar zuen pandemian zehar, eta ia herrialde guztiek jarraitu ziotela, baina bere gomendio bakar bat ere ez dela onerako izan; gehienak kaltegarriak izan direla. Kostu handia suposatu dute ekonomian zein hezkuntzan, eta heriotza ugari eragin dituzte. Itun honek eskumena emango lioke OMEri zein farmako erabili behar den erabakitzeko hurrengo pandemia batean; zuzendari nagusiaren agindua aski izango da, besterik gabe, eta erabaki ahal izango du, baita ere, zeintzuk diren erabili ezin diren farmakoak. Adibidez, norbaitek Ivermectina edo Hidroxicloriquina edo D bitamina erabiltzea erabakitzen badu hurrengo pandemian, OMEk debekatu egin diezaioke, eta txertoari itxaron behar diola esan.

B.- Dottoressa, zeintzuk dira gaur egun OMEren finantzatzaile nagusiak?

M. N.- Denborak aurrera egin ahala, finantzatzaile pribatuek paper nagusia hartu dute. % 15 soilik dator herrialdeen kuotetatik; gainetiko % 85 borondatezko dohaintzak dira. Bill & Melinda Gates Fundazioak dirutza ikaragarriak ematen dizkio, eta baita fundazio horri lotutako beste erakunde batzuek ere. Mundu Bankuak ere bai. Gates familiak hainbeste ematen du, ezen Estatu Batuek sei hilabetez beren finantzaketa eten zutenean 2020an, Trumpen garaian, Bill Gates bihurtu zen OMEren finantzatzaile nagusia.

OMEren osasunari buruzko propaganda hedatu ahal izango da soilik

Meryl Nass

B.- Dottoressa, Estatu Batuetan zein Europan politikoekin eta herritarrekin biltzen ari zara egun hauetan Itun Pandemiko horren mehatxuez ohartarazteko. Zergatik izan behar diogu beldur itun horri, datorren urteko maiatzean OMEren batzar orokorrean eztabaidatuko den itun horri?

M. N.- Mehatxuak ugari dira. Lehenengoa, Itun Pandemikoa zein nazioarteko Arautegia bideratuta egongo dira gure online jarduna zelatatzera. Beraz, zelatatuak izateko arriskuan egongo gara. OMEren gustukoa ez den informazioa zabaltzen badugu, zentsuratuak izango gara. OMEren osasunari buruzko propaganda hedatu ahal izango da soilik. Honek bortxatu egiten du Estatu Batuetako Konstituzioa, eta beste edozer baino gehiago prentsa askatasuna. Konstituzio nazional askoren kontra doa. Informazioa kontrolatzen bada, ezinezkoa da beste askatasunez gozatzea. Ez da bakarrik halako sendakuntza edo halako txertoa hartzeko askatasuna, ez badago askatasunik botikez, interbentzio kirurgikoez edo txertoez informatzeko… Informazioaren kontrola beste alor batzuetara ere hedatu daiteke osasunaz at, eta arazo handiak sortu.

Beste bat, nazioak behartuta egongo dira patogeno pandemikoak bilatzera, pandemiak eragiteko gai diren birusak eta bakteriak, hain zuzen. Horrela errazagoa izango da pandemia bat lehertzea. Nazioek beren laborategietan ikertu behar dituzte eta genoma dekodifikatu eta sekuentziak zehaztu. Horrela, sekuentziara hel daitezke, eta patogeno bat sortu. Eta nazioak behartuta egongo dira lagina OMErekin partekatzera, eta sekuentzia online ipintzera. Agente patogeno hauek maila globalean partekatuko dira. Hau benetako desastre bat izango litzateke. Pentsa, Estatu Batuetan problemak sortuko balira patogeno hauek aztertzen diren laborategi batean (astero 60 istripu gertatzen dira Estatu Batuetan soilik)… Zer gertatuko da munduko beste herrialde guztiek gauza bera egiten dutenean? Ehunka istripu astero; honek ia bermatu egiten du beste pandemia batzuk lehertzea. Horrela jokatzeak ez du zentzurik.

Dokumentuek beste alderdi problematiko ugari dituzte. OMEk nazio bat behartu dezake farmakoak eta haien eskubideak beste nazio bati emanaraztera. Ez nago horren kontra guztiz, baina jabetza ken diezaioke subjektu bati beste bati emateko. Nahasketa handia dago agiri hauetan. Artikulu batek dio herritarrek eskubidea izango dutela informazio osoa jakiteko. Beste batek dio informazioa kontrolatuta egongo dela, zentsura ezarriko dutela. Batean diote OMEk gidatuko duela osasungintza. Beste batean nazio bakoitzak bere legeak izan ditzakeela. Nahita eragindako nahasmendua da. Hau da herritarrek Ituna ez ezagutzeko modu onena, Denok irakurriko bagenu agiria (azken bertsioak 28 orrialde ditu bakarrik) deskubrituko genuke elementu beldurgarri anitz dituela, inork nahi ez lituzkeen elementuak eta ezein gobernuk onartu nahiko ez lituzkeenak. Horregatik da inportantea gai honetan fokua jartzea.»

(Jarraitzen du)

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

Erantzun bat “Meryl Nass mediku estatubatuarra: “OMEk erabakiko ditu osasunari buruzko gai guztiak”” bidalketan

  1. Eskertzen dugu informazioa, Martin, ongi dakizun arren ze zaila den amnesia garaiak gainditu eta gauza hauetaz solas egitea. Ongi-ongi izan.

Utzi iruzkina, izen eta abizenez

Azken artikuluak