Justizia, irudiz, emakume itsua da, balantza bat esku batean eta ezpata bestean dituena. Dirudienez, balantzak agintzen dio ezpatari. Balantza, zalantzazko tramankulua, al da epailea?
Epaitegiek Mundua ezpaldu eta ezpal meta mundu hobea dela saltzen digute
Salomon jakintsuak haurra erdibitzea proposatu omen zien bi emakumeri. Euri asko egin du harez gero eta aurrerapen teknozientifikoak Palantir deituriko balantza elektronikoa ekarri digu, datu baseetan oinarritutako justizia-epaile automatikoa, hori ere trukatua noski.
Epaileak arraina mahai gainera ekarri eta, itsasoa edo erreka zer den jakin gabe, arraintasuna ebazten du. Gertakizunak, Bizitzatik erauzita, aretora eraman eta papermortuen neurrira epaitzen ditu.
Epaia aizkorak enborrean eragindako ebakia ere bada. Epaitegiek Mundua ezpaldu eta ezpal meta mundu hobea dela saltzen digute, Zibilizatuak Basatia garaitzean.
Horrela ebakitzen dira Idiologiak ere hain iraultzaile eta sakon, inoizko garatuenak, gizartearen iruditik komeni diren pixelak ebaki eta gidoiak boteretsuen interesera moldatuz, begiratu batean haien kontrakoak diruditen inozokeriak barne.
Epaitegiak
Justizia Epaitegiak jendarteko harremanak agintarien komenientziaren arabera antolatzeko antzeztokiak dira, geure atxikimendua edo gutxienez onarpena izateko zeremoniategiak. Baina epaigura guztia ez zaie metrika ofizialetan kabitzen, ezohiko kasuetan korapilatsuegia delako gidoia eta e(ra)bakitasuna kamutsegi.
Inposatutako ordena hausteko arriskuan dagoenean, edota aginte berak ordena sozial hori beste molde batzuetara egokitu nahi duenerako, salbuespenezko epaitegiak daude, Audientzia Nazionala eta Inkisizioa esate baterako.
ez dago gutxieneko bermerik, ez defentsa eskubiderik, ez delitu eta zigorraren arteko proportzionaltasunik
Epaitegi horietan ez dago gutxieneko bermerik, ez defentsa eskubiderik, ez delitu eta zigorraren arteko proportzionaltasunik. Bizitza osorako zigorzaleak dira eta heriotza fisiko zein zibila lehenesten dituzte. Helburua ez da zuzenbidea, pedagogia baino; beldurra zabaltzea. Eraginkorrak dira, ez dagoelako argi non dauden delituaren mugak eta edonor erre daitekeelako bere garretan.
Inkisizioak ingurune magikotik epaitu zuen Euskal Herria duela lau mende, elizaren hierarkiak har zezan espiritu kolektiboaren gaineko boterea. Harrezkero, larriki inausi digute Gogoa, abar eta ezpalekin egitura naturalen imitazio kaskarra eraikitzeko.
Inkisizio berrituak ezinbestean onartzen du salaketa faltsuak badirela, baina, hain larriak izanik egiazkoak, egia ikertzea oztopo bilakatzen da epaitegiarentzat. Ohiko epai prozedurak luze, mingarri eta korapilatsu bihur daitezkeneez helburu zigortzaile eta pedagogikoetarako, bidezidorretik jotzen da, elizak umetatik txertatu zizkigun bi otoitz ipar orratz gisa hartuta:
Ni bekatari eta Sinisten det
Bekataria bekatari da izatez eta eginahal guztiak ez zaizkio aski arima garbitzeko. Sinesgarria, aldiz, sinesgarri da, sortzez garbia.
Edozein zalantza isilean gorde beharreko heresia litzateke. Epaile eta lekukoei ezkutuaren babespetik jardutea onartuko zaie, aurpegirik eman gabe.
Manikeismo Bitarra; gu onak eta haiek txarrak, edo alderantziz. Ñabardurak edota gertakizunak ulertzeko saiakera publikoa ahulkeria arriskutsua baino ez da, eta horrela goaz aurrera, ebakiz ebaki gure aukerak, zaku batean sartuz Argala eta Carrero, eta bestean Isabel Katolikoa Graziana Barrenetxearekin; “konplize ditut eta maite ditut denak“.
Epaia Zibilizazioaren jatorri
Jainko usteko gizon batzuek, zakilaren zutitasunak liluraturik, sakona eta apala bortxaz gobernatzeko hautua hartu zuten noizbait. Harrezkero, Mundua guk gobernatzeko egina omen dago, edo gu mundua gobernatzeko. Naturaz beste egitearen ondorioz, paradisuarekiko epaituak, izaditik ebakiak izan gara. Ez baita bateragarria agindu eta kide izatea, enplan Jaurlaritza-Auzolana.
Ezinbestean gatazkatsuak diren mugak lubaki bilakatzen dira, epaikinaren senak osatzea duelako gogoan
Epaileak lurraldea ebakitzen du; inperioak, nazioak, lur sailak, orubeak… Ezinbestean gatazkatsuak diren mugak lubaki bilakatzen dira, epaikinaren senak osatzea duelako gogoan.
Lurra bezala, Jendartea ere epaitzen du epaile Jaunandereak, gizona emakumearen gainetik jartzean, aberatsak txiroen gainetik, txuriak beltzen gainetik, erresumak herrien gainetik, hiriak herrien gainetik… Epaileak mozten du bakailaoa eta zatikiekin eraikitzen du gizartea. Aldaerak nahieran mugitu ditzake epaitegiak; emakumeak gizona zapaldu eta abar, betiere boterearen neurrira, epaikuntzan sakontzeko baliagarri zaion artean.
Ados ez datorrenari lepoa ebaki izan zaio munduko ia herri guztiak Zibilizazio honetara makurrarazi arte; lepoa edo baita eskua, hanka eta mingaina ere.
Herriak epaituak dira ingurunearekiko. Jendartea errogabetu ondoren ebaki; tribuak, leinuak, senitarte zabala, senitarte nuklearra, bikotea, baita gutako bakoitzaren burua ere geronen bihotz eta eskuengandik ebakita. Orain haurren zakilak eta bularrak ebakitzen ari dira mutilazio askatasuna aldarrikatuz.
Kaos Orkestra
Dimentsio anitzeko epai antinatural hauen guztien emaitzetako bat jendartearen urardotzea da. Ezinduak gabiltza elkarrekin batera taupatzeko, baita ingurune eta unibertsoarekin bat egiteko ere, musikarien gorputz atal bakoitzak bere erritmoan joko lukeen orkestra erraldoi bat lez.
Kaos honen aitzakian, Batasuna aldarrikatzen dute Ebaki Politikoek (partidoek), bakoitzak bere Batuta astinduz, Overtontoen leihoaren menderakuntza soilik izanik denak batzen dituena, eta AA konposatzaile.
Abiadura azkarreko epai-demak egungo progreen joera aurrerakoienetako bi ebatzi ditu, bata bestearen osagarri:
Eskubitik Bronatalismoa eta ezkerretik-edo Xenofeminismoa.
biek irizten diote ugalketa emakumearengandik epaitu behar dela
Itxura batean bi mutur ideologikotan jardun arren, biek irizten diote ugalketa emakumearengandik epaitu behar dela. Batzuek mendeko gizaki bikainak ekoiztu nahi dituzte laborategian, eta besteek bioteknologia berbera erabili nahi dute emakumea* eta arraza menderatuak Natura cisheteropatriarkarrrazistarengandik askatzeko.
Batzuek zein besteek, giza ugalketa sexual atzerakoia gainditzea dute helburu. Laborategi teknobiologiko askatzaileetan haurrak gurasoen ernalkuntzarengandik behingoz epaitzea dute xede, baita haien hezkuntza ganorabakotik ere: zilbor hestea ezabatu, haurrak umezurtz ekoitzi eta merkatu santuaren esku utzi edo estatu-umezurztegia zaintza unibertsalaren berme bihurtu.
Zein atzeratu eta arriskutsua den sexu bidezko ugalketa, mesedez!
sistema bitar honen bidez zedarritzen dute gaur pentsamendu aukera
Hautua gizon zuricisheterozale edo gorputz transisurkormultisentibera askeak bizi dituzten kontzeptu performatibo artera mugatzeak eta giza ugalketaren jaun eta jabe Zientzia santua bilakatzeak ideia bikaina dirudi.
Bitartasuna gainditu nahi duen sistema bitar honen bidez zedarritzen dute gaur pentsamendu aukera, dela ugalketan, dela beste edozein arlotan.
Batasun anizkoia
Mundua bat eta anitza da aldi berean, batasunaren baitako izaki askotarikoak gara geu ere. Bizi gaituen salda kosmikoaren baitako aniztasunak ez du Osoa hausten, igerian dabiltzan arrainek itsasoa hausten ez duten moduan.
Osoak bere burua atalka eta aleka bereizten daki, baita erdituz ugaldu eta puskatzen ere, eta arrakalatzen ere bai. Baina gizarte zibilizatua ebakiaren bidea hartuta dabil, suntsipena sorkuntzarekin nahasturik.
