Arrisku taldean nago eta laborategira eraman naute azterketa sakonagoak egitera. Gizon, txuri, cis, hetero, heldu, euskalduna naiz eta gaiztoa izateko zantzu guztiak ditut, ez ditut goizero autogorroto eta erruduntza aitorpenak egiten eta, hori gutxi balitz, iritziak plazaratzeko joera desegokia erakusten ari naiz.
nire laginak jaso eta laborategi soziomikroskopioan aztertu ditu, mikromatxismo, mikroarrazismo eta pribilegio andana aurkituz
Polizia sozientifikoak nire laginak jaso eta laborategi soziomikroskopioan aztertu ditu, mikromatxismo, mikroarrazismo eta pribilegio andana aurkituz. Horietaz gain, ulertu ezin izan ditudan ingelesezko beste gaixotasun andana: mansplaining, blackfacing, notallmen… Ezin guztiak gogoratu, baina txukun sailkatu eta nire aurkako froga txostenean bildu dituzte. Epaiaren zain nago eta aurrekariek ez dute ezer onik iragartzen.
Adituak hamaikak aldera kafetegira joan dira eta bakarrik geratu naiz, hotzak, ipurdia agerian uzten didan mantala jantzita. Beraien atzetik joan dira poliki lurrin, desodorante eta makilaje usainak. Aspertzen nintzen neurrian, haien azpian ezkutatutako kiratsa somatu dut pixkanaka azaleratzen. Zaborrontziren batetik zetorrela pentsatu dut hasieran eta handik hona ibili naiz bila, baina ez, ez zen zaborrontzietara mugatzen. Besaulki batetik zetorrela otu zait gero, adituren bat aulkiari itsatsita usteldu zelakoan. Bai, besaulkiei kiratsa darie baina mahaiei ere bai, baita teklatu eta mikroskopio elektronikoei ere. Lurrunen behelainoa desegin ahala, keruak inguratu nau leku eta objektu guztietatik.
Mikroustelkeria dela Laborategi Soziomikroskopikoa berotzen duen erregaia
Atea ireki denean txintxo plantan eseri naiz adituak kafetegitik zetozelakoan, baina ez, adituek kafetegian zerraiten. Garbitzailea sartu da, andre beltxaran txiki bat gurdiari bultzaka, eta bere protokoloei ekin die: zaborrontziak hustu, garbikariak zabaldu, zapiarekin igurtzi… Egunonak opa dizkit adeitsu, eta ea han zertan ari nintzen galdetu. Kontatu didanez, ohikoa da aztergaiok “potrokoloak” bete eta gero han ahaztuta gelditzea. Ea ondo nengoen, eta nik baietz, baina usainak nazkatuta nengoela eta ea ote zekien nondik zetorren.
Mikroustelkeria dela erantzun dit.
– Nola mikroustelkeria, zer arraio da hori?
– Bai, laborategia elikatzen duena.
adituek egunero eramaten dute etxera beren mikroustelkeria poltsakada: jateko, hipoteka ordaintzeko, eta oporrak, eta seme-alaben ikasketak…
Eta bere lanaz jardun zait luze, patxadaz. Kontatu dit laborategiko makineria mikroustelkeriaz koipeztatzen dela, adituek egunero eramaten dutela etxera beren mikroustelkeria poltsakada: jateko, hipoteka ordaintzeko, eta oporrak, eta seme-alaben ikasketak… Mikroustelkeria dela Laborategi Soziomikroskopikoa berotzen duen erregaia. Baina ez hori bakarrik; eraikineko beste bulego askotan ibilia dela lanean eta berdin-berdin daudela mikrousteleriaz koipeztatuak, etorkinentzako lan poltsa agorrezina dela usaina garbitzen aritzea, baina lapiko zulatua urez betetzea baino zailagoa dala Jauregi Ustelari usaina aldatzea, kiratsa beti datorrelako lurrunari aurrea hartuta.
Baina nola egongo da ba dena ustela? Jende jator askoa ezagutzen dut asmo onez Estatuarentzat lanean. Gainera, hor daude zerbitzu publikoak, Osasungintza, Hezkuntza, Zerbitzu sozialak….
Garbitzaileak, bere mendeetako pazientzia apalaz, erantzun dit baietz, hala dela, bihotz oneko jendea aurkitu duela han eta hemen, baina aginduak goitik behera datozela grabitateak erakarrita, eta agindu horiek handikien nahierakoak direla. Eraikin berean egiten dutela lan irakasleak zein katxiporradunak, etxegabetzen duenak zein zerbitzu sozialekoak, militarrak eta erizainak, denen artean osatzen dutela Jauregi Ustela eta mikroustelkeria dela hura berotzen duen erregaia.
Jauregi ustelaren sotoetan “gizarte zibila” esaten dioten horren artxipelagoa bizi da, haiek ere grabitateak lurreratzen dituen aginduak betetzen mikroustelkeria-apurren truk.
Jantzi eta alde egiteko asmoz abiatu naiz, baina oraindik ez dut irteera aurkitu.
Ze ona Asier!
Hemen nago barrea eta mikroustelkeriaren kiratsaren nazka artean irakurtzen.
Energetikoki dentsoak diren esperientziak bizitzea nahitaezkoa denean idatziz garbitzen dugu pairatutako dentsitate energetiko jasangaitza.
Eskerrik asko partekatze eder honengatik!
Oso ona Asier! Benetako gertakarietan oinarritua. 😖
Bai, gaurko makro teknofaxismoaren azpian.
Elkarrekin bilatuko dugu Jauregi Usteletik ateratzeko bidea, bilaketa bera izango da irteera, bideak helburuarekin bat egin dezala.