Manteoko GOE eta Gargantuaren sabel zulo asezina
Gastropintxo Basque Tematic Park
Atzeraka eragiten didate “gastro” aurrizkia duten modako negozioek. Uste dut nazkak inoiz ez didala utzi horietako baten atea zeharkatzen ere, izenak berak gastritisa iradokitzen didalako, Pavloven txakurrenaren antzerako zerbait baina listua minduz.
España aldera goazenean “zein ondo jaten den Euskalherrian” dioskute sarri, jada ez digute galdetzen ea terroristak garen, eta nik hori entzutean tabernetako pintxoklonak irudikatzen ditut, mikrouhin labean irradiatuak. Industria poligono batean masiboki ekoitzitako pintxoklonak, munduari biraterdi emandako lehengai merke exkax eta pozoituenetakoekin osatuak, tabernaz taberna etorkin esklabizatuek banatuak.
Bertakoak lekuz kanpoko figuranteak baino ez gara
Tabernaren dekorazioaren araberako izen ponpoxodun pintxoklonak (Amatxi´s kitchen xperience, Euskatxarrito, Fidel Gastro, pringadilla edo vegan commitment) esklabizatutako etorkin multierdaldunek zerbitzatzen dituzte. Bertakoak lekuz kanpoko figuranteak baino ez gara, dialogorik gabeko estrak, bezeroetan arrotzenak, despistez han eroriz gero.
Aplikazio digitalek mundu zabaleko jende andana erakartzen dute EuskoGastroParkera. Tortilla puska bat jatearen ezinbesteko esperientzia zirraragarria bizitzera dator iruzurra erosteko orduak ilaran zai egoteko prest dagoen jende klase hori. Turista hauek osatzen dute txandakako kolonizatzaile armada berriaren tropa xehea.
Sukaldari bufoiak
Pertsonaia herrikoi jatortzat saldu izan zaigu goimahailako sukaldaria, gure herria munduan erakusten duen enbaxadore alaia, euskaldaria, ikusi besterik ez dago zenbat Mitxelindun jatetxe ditugun inguruotan.
Mitxelinok kolonizatzaile finxeagoak dakarzkigute, dirua erruz darabilen jendilaje klasekoak
Mitxelinok kolonizatzaile finxeagoak dakarzkigute, dirua erruz darabilen jendilaje klasekoak, abioi edo helikopteroz etorri daitezkenak bazkaldu eta larrualdi bat jotzeko. Apar plater batengatik dirutza ordaintzen duten artean euskal zatikiak erosteko gai diren horietakoak. Erakuslehioan zintzilik dagoen behia baino ez gara laino artean. Bere kapel luzeak bezain zuriak iruditzen zaizkit aspaldi gure lagun tanborrero horiek. Ezaguna da esplotatzaile gupidagabeak izaten direla, boteretsuen morroi eta zabor janari industrialen iragarle.
Goiko biek osatzen dute okupazio armada kapitalistaren fronte turistikoa, herri hau museoko ehiza pieza erara disekatu, barrenak zurrupatu eta poliestirenoz betetzen ari direnak; makdolars aurrean azken antxua saltzailearen argazki sepia jartzen dutenak gure xarma bereziaren irudia hustuz, andre hori gaur biziko balitz ostikoka aterako luketenean hortik udaletxeko, ogasuneko edota osakidetzako txakurrek progresia guztiaren adostasunarekin.
gure azken antxoa saltzailea – sepia-argazkikoa – gaur biziko balitz, ostikoka aterako lukete udaletxeko, ogasuneko edota osakidetzako txakurrek, progresia guztiaren adostasunarekin
Turismoaren eskutik datoz etxebizitza turistikoak, gentrifikazioa, zerbitzu korporazioak, isuri gutxiko eremuak, coolturismoa eta herritarrak kanporatzeko hainbat fronte genozida.
Baratxurien ordez batazuriak
Elikadura sistema industriala jasangaitza da, osasun, ingurune eta ekonomikoki. Sistema ekonomiko harrapakari eta suntsitzalearen neurrira garatu denez, kontuak ez dira ateratzen ongi, arpilatzeak mugara iristen ari direlako fronte guztietan batera.
teknozientzia motzak, natura errespetuz ulertzen saiatu beharrean, bortxaren espirala puzten du bere supremazismotik
Ekosistema bat hondatzen dugunean, Bizitza komunitateak hura konpontzera egiten du ezinbestean. Adibidez: monokultibo bat kalamitate antinatural da; naturak direnak eta ez direnak erabiliko ditu kalte hori zuzentzeko, biodibertsitatea berrezartzen saiatuz, baina teknozientzia motzak, hori errespetuz ulertzen saiatu beharrean, bortxaren espirala puzten du bere supremazismotik, eldarnio aurrerakoia galga eta atzera martxarik gabe eraiki delako, beti irabazien pilaketarantz joateko.
Laborategitar jendearentzat naturak oker dihardu; ezin dute onartu bizidun komunitatearen desobedientzia. Ondorioz, logikoki, Bizitza erauzten ari dira elikaduratik, hau da, janari ekoizpenaren artifizializazio prozesua azkartzen ari dira.
Janaria jangarriekin ordezkatu nahi baldin bada, hizkera jasoarekin saldu beharra dago iruzurra, ulergaitz bihurtzeko bezain hizkera zientifikoa erabiliz: iruditeria, adituak, erreportaiak…. Nork nahi du ba ulertzen ez duen kaiku ezjakin moduan geratu? Hobe lorito erara jakintsuen leloak errepikatzea, haien mailakoak sentitzeko. Iruzurtua iruzurtiaren mailan? Inoiz ez. Ez baldin bada iruzurtiak bere iruzur sarean sinesten duela behintzat.
Haragi artifiziala lortu dutela dioskute, etikoa, klimatikoki friendlya, animaliekiko tratu txarrik gabekoa, abere zelulak laborategian ugalduz!!! 3Dn inprimatutako txuletak!!!
Ezkutatzen digutena da zein ote den txuleta horien Gaia. Haragintza ez baita kalkuladora, bider, bider, bider sakatu eta pantaila betetzerainoko emaitza eskaintzen duena. Arrautza artifizialak, laborategiko onddoak, arrain genetikadun tomateak… Denak gourmet mailako elikagai bikainak, ziur.
jende estudiatu fededunak esango digu bere birramonaren zortzi neba-ahizpetatik hiruk bakarrik biziraun ziotela haurtzaroari; dena atzerapenaren errua zen, sineskeriena
Jende estudiatu fededunak zenbaki taulak erakutsiko dizkigu, komeni zaion zenbaki entsalada betiere, esanez inoiz baino hobeto bizi garela. Esango digute bere birramonaren zortzi neba-ahizpetatik hiruk bakarrik biziraun ziotela haurtzaroari, edo Ameriketara joan izan behar zutela goseak ez hiltzeagatik; baina testuinguru historikotik kanpo, iragana beti kalamitatea izan delakoan, ez delako egon gerrak, konkistak eta liberalismo industrialak ekarritako kalterik, dena atzerapenaren errua zen, sineskeriena. Ez du lotuko ere oraingo “ongizate” hori hondamen ekologikoekin, humanitarioekin, gatazka geopolitikoekin, zibilizazio harrapakariaren sostengu diren gaien agortzearekin.
Ez digute esango azken berrehun urtetan Zibilizazioak munduko ondare kultural, material zein natural gehienak zabor bihurtu dituela, jasotako oinordetza xahutzen ari garela eta ordainezinezko hipoteka uzten ari garela ondorengoei… Eta, esaten baldin badigute, haserre errieta egiteko izango da, erruak gizakion artean banatzeko, mundua konpontzeko autoritate osoa beraientzat exijitzeko, dakitzatenetzat.
Zorionez, iragarkiak iragarki, mamukeria horietatik guztietatik taxuzko ezer aterako denaren zalantza handiak ditut, zelula klonatu magiko horiek ez baitira berez ugalduko; energia, lehengai eta batez ere dirutza beharko luketelako haragi formadun zabor jangarria ekoizteko. Jada jaten ari diren denon dirua; ez pentsa aberatsek beren xoxak halako abenturatan jokatuko dituztenik.
Zorionez, iragarkiak iragarki, mamukeria horietatik taxuzko ezer aterako denaren zalantza handiak ditut, haragi formadun zabor jangarria ekoizteko energia, lehengai eta batez ere dirutza beharko luketelako
BCC: estraperlista berriak Zurriolan
Estraperloa gerraosteko kontrabando eta komertzio ilegalari lotu izan bazaio ere, hitzak goi mailako bi iruzurgilek Kursaalgo kasinoan jarritako erruleta trukatu batean du jatorria. Honen harira sortutako iruzur eta ustelkeria eskandaluak Espainiako Bigarren Errepublikaren gobernu konserbadorearen erorketa eragin zuen.
Ia ehun urte geroago, beste iruzur mundial baten inguruan ari dira biltzen putre kapitalak hortik gertu: Manteoko Gastronomy Open Ecosystem, harrapazank! Parke publikoa parquet pribatu bihurtuz, goian aipatutako gaiztakeria guztien batura eraikin batean bilduta.
Horiexek dira gure elikagai politikarekin gizentzen ari diren aziendak, inori konturik azaldu gabe dirua erruz eramaten ari direnak. Erakunde publikoek gure xoxekin munduko inbertsio funtsentzat sakrifikatzen dituzten idi sakratuak, hekatonbea, Gargantua Zulo beltz kosmikoaren oturuntza aseezinari oparituak.
* * *
Erreferentziak:
- https://www.bculinary.com/en/noticias/cardumen-capital-and-the-basque-culinary-center-present-the-first-investment-fund-for-foodtech-startups-based-in-the-basque-country
- https://www.elsaltodiario.com/industria-alimentaria/riqueza-privada-financiacion-publica-modelo-gastromico-basque-culinary-engorda-turistificacion
- https://www.bculinary.com/en/noticias/cardumen-capital-and-the-basque-culinary-center-present-the-first-investment-fund-for-foodtech-startups-based-in-the-basque-country
- https://kaosenlared.net/argentina-el-veneno-como-estrategia-de-poder/
- https://www.ondojan.com/la-revista/al-dente/item/2078-el-basque-culinary-center-apuesta-por-la-comida-basura.html
