ABERRI EGUNA

Independentziaren eguna iritsi bitartean, Orreaga gure aberri eguna

Pazko igandeko ospakizunak ez gaitu erakartzen, alderdikerien ispilu bihurtu delako. Orreagan, aldiz, biltzarretan antolatutako baskoi batzuk Inperioa garaitzen, anarkia totalitarismoaren aurka.

0

Angel Bidaurrazaga Vandierdonck

Medikuntzan doktorea, EHUko irakasle ohia. Bilbo

Noiz da gure Aberri Eguna?

HerriBiltzaren azken bileran, gai-zerrenda zabaleko puntu bat Aberri Egunean egin beharko genukeenari buruzkoa izan zen. Orduan gertatutako eztabaida aipatzea bururatu zait, benetan solasaldi interesgarria izan zelako, bertan geundenon ikuspuntu eta jatorri ezberdinengatik (Iparraldea, Bilbo, Barakaldo, Gipuzkoa).

Gehienok Pazko igandeko (aurten apirilaren 9an) ospakizunak ez gintuen gehiegi erakartzen, egia esan. Batzuentzat, giristinoekin duen erlazioagatik; beste batzuentzat, Irlanda edo Eireren erreboltaren kopia izan zelako jatorrian; beste batzuentzat, burgesiarekin duen loturagatik; eta, gehienontzat, alderdikerien ispilu bihurtu delako. Nahiz eta bildutakoak abertzaletasunetik gertu egon, plandemiak ere apaldu digu gure herri-mina edo maitasuna, eta euskarak aukera bi ematen dizkigu sentimenduetarako.

Abuztuaren 15ean, Euskal Herriko historian gure nazioak irabazi duen bataila bakarrean, Orreagan

Nik abuztuaren 15a proposatu nuen, Euskal Herriko historian gure nazioak irabazi duen bataila bakarrean, Orreagan, alegia. Gaurkotasunarekin lotuta, Karlomagno inpresionagarriaren kontra, izan ere, biltzarretan antolatutako baskoi batzuek garaipen xume bat lortu zutelako, hau da, anarkia totalitarismoaren aurka, txikia handiaren aurka, indigenak kolonizatzaileei aurre egiten… Ez dakit, baina sinbolikoki gehiago erakartzen nau honek Jesusen bizkundeari lotutako jaiak baino.

Gainera, inguruko nazioentzat, haien aberri eguna bat bakarra da; Frantzian uztailaren 14a, Espainian urriaren 12a. Zer dela eta egon behar dugu guk udaberriko ilargi betearen arabera, urtero eguna aldatzen? Beste nazio bat izan nahi badugu, jar dezagun egun bat betiko. Independentzia lortzen dugun eguna izango litzateke egokiena, badakit, baina, daukagun panoramarekin, nekez ikusiko dugulakoan nago.

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

Utzi iruzkina, izen eta abizenez

Azken artikuluak