Gizadia

Homo absurdus

Bere burua atxilotzen duen animalia bakarra gara.

5

Patrik Unzurrunzaga Garate

Datu informatikoen transkribatzailea.. Algorta

Lur planetako animaliarik inteligenteena gara, edo hori sinesten dugu.

Garenera arte eboluzionatu duen hominidoa gara. Ez naiz giza eboluzioaren lerroan galduko, ez bainaiz aditua eta, gainera, hainbeste interes berekoirekin, ez naiz fio kontatzen didaten edo irakur dezakedan ezertaz. Adibide gisa Iruña Veleiako historia hondeamakinekin suntsitzea dugu, tanke hiltzaile gisa; beraz, ez naiz horrekin korapilatuko.

Argi dudana da geure buruari Homo Sapiens (gizaki jakintsua) deitzen diogun gizakiok handiuste samarrak garela. Eta gizadiaren historia bera, gainera kontatu digutena, akatsak estali eta onena kontatzen digutela suposatzen dena, zein baino zein higuingarriagoak diren zentzugabekeriaz betea dagoela. Nik, benetan, uste dut egokiagoa litzatekeela Homo Absurdus (gizaki absurdua) izena hartuko bagenu; izan ere, planeta osoaren erabateko kontrolaren buruan jarri ginenetik, hau kontsumitzen eta hondakin ez birziklagarri bihurtzen ari da.

Ez, honek ez du zerikusirik klima-aldaketarekin eta Homo Absurduen arteko dominatzaile interesatuek kontatzen diguten horrekin

Nik esango nuke planeta hau gaixotzen ari den parasito ziztrin bat garela. Eta ez, honek ez du zerikusirik klima-aldaketarekin eta Homo Absurduen arteko dominatzaile interesatuek kontatzen diguten horrekin guztiarekin. Egia dena da bizkarroi hutsak garela, bizitzaren orekarako beharrezkoak diren animalia, intsektu eta beste izaki bizidun mota oro desagerrarazten ari garenak. Ekosistema ziztu bizian hondatzen ari gara, planetaren birziklapen-gaitasun naturalak ahalbidetzen ez duen bizi-estilo xahutzaile baten mesedetan.

Kontua ez da asko garela, kontua da gaizki kudeatuta dagoela hori. Izan ere, errealitatea da baliabide naturalak agortzen ditugunok gizakion oso ehuneko txikia garela. Gehiengoa ahal duenarekin bizi da, eta gero eta handiagoa den ehuneko batek ez du oinarrizkoenik ere. Homo Absurdusak hain gara suntsikorrak, ez dugula aski bizitzeko beharrezkoa dugun ingurune naturala ahitzearekin, eta, beraz, geure burua ere espezie gisa irensten dugu. Absurduaren gailurra gara, autosuntsiketarako bizi gara.

Seguraski, behin erabat desagertzen eta bat bera ere geratzen ez garenean, naturak berak, jakintsua bera, ekosistema berriro orekatuko du. Baldin eta ez bazaio naturari beste izaki bizidun bat Homo Absurdusa bezala harropuzten eta natura bera baino adimentsuagoa dela uste izaten. Okerrena da, nire ustez, gizakiok planetarekin bat eginda bizi gintezkeela, ekosistemaren parte izanik eta haren bizitzaren parte izanik, eta ez haren heriotzaren parte.

Ez naiz ekosistemaren defentsari uko egiten diotenen absurduan eroriko ere, zergatik eta Agendakoek hori esaten dutelako, bi gauza guztiz kontrajarriak direla aztertu gabe

Salba dezagun gure ama lurra. Eta ez, ez naiz 2030 Agenda “berde”aren mitin bat ematen ari, ez naiz nagusi diren Homo Absurdus horien ekologismo faltsuan erortzen ari. Ezta ekosistemaren defentsari uko egiten diotenen absurduan erortzen ari ere, zergatik eta Agendakoek hori esaten dutelako, bi gauza guztiz kontrajarriak direla aztertu gabe. Eta fenomeno berbera gertatzen da bizitzaren aldeko gainerako jarrerekin, hala nola anti-arrazismoarekin , anti-xenofobiarekin, anti-homofobiarekin, edozein zapalduren eskubideen defentsarekin, izan koloreagatik, arrazagatik, sexuagatik, kulturagatik edo errepresioaren edo/eta marjinazioaren xede den beste edozein ezaugarrirengatik.

Absurdusetik Sapiensera eboluzionatu genezakeela uste nuen, baina egunetik egunera zalantza gehiago ditut.

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

5 erantzun “Homo absurdus” bidalketan

  1. Nolako da gizakion egoera?
    “…eboluzionatu genezakeela uste nuen…”?
    Gizakia ez dago garapenean. Hauxe da Euskeraren bidez jaso dezakegun ulermena. Euskeraren osaketa beste hizkuntzekin alderatzean nabarmena da.
    Otarraren sumitzeri begira eta……eta ezin jabetu daramagunaz!
    Euskera ohi euskera!!
    zutan da gorderik,
    mendez mede egoki,
    Euskaldun gogoa!!

  2. H.SAPIENS ez eze,
    H.SAPIENS SAPIENS buruizendatu gara, Neardental Sapiensak baino askoz hobeak garelakoan.

    Errakuntza Bibliatik datorkigu (-5000):
    “Bir hazi zaiztezte eta mendera ezazue Lurra”

  3. Ona, Patrik! Homo Absurdus, bai…
    Eta, dena den, ama lurra bake-bakean uztea izango da onena, inor “salbatzera” joan gabe. Homo Absurdusak hobe luke bere burua salbatzen saiatzea, berak eta berarentzat sortu dituen egitura absurdu/toxikoetatik.
    Izan ere:
    “Behin Lur planetari galdetu zioten:
    – Itxura txarra duzu; gaixorik al zaude? Zer duzu?
    – Homo Sapiens delakoa daukat.
    – Aa! Lasai, hori bere kasa pasatzen da”

  4. Eskerrik asko, Ihintza, Josu eta Pako, zuen iritzia emateagatik. Denetatik ikasten da beti. Eta uste dut hori dela guztiontzako bizitza-proiektu integratzaileago baterantz aurrera egiteko bidea, entzutea, hausnartzea eta denok denongandik ikastea. Horregatik zuri eskerrak ematen dizkizut bereziki Ihintza, zergatik bi urte hauetatik atera dudan onena nire euskara hobetzea izan da, eta hala eta guztiz ere eskerrik asko hanka sartzen dudanean nire idazkiak zuzentzeagatik. Ikasten, estropezu egiten, okertzen edo asmatzen jarraituko dut, egunero ikasten baita zerbait berria.

  5. Bai, Patrik, kontatu eta kontatzen digutenari buruz mintzatu zara tarte batean baina akaso kontatzen ez digutenari buruz edo kontatu zutena baina berehala txosten zaharren artean pipiaren bazka izatera kondenatu duten jende izaera oparo eta garrantzitsuenaren kontakizuna falta zaio gure gogoari. Eta hau ez da asmo oneko(?) ni bezalako inuzente plantak egiten dituen jipi zahar baten ameskeria soila, jendearen aurkiaren alde eguzkitsuak itsutzen gaitu egunerokoan eta ilargiaren xuxurla ifrentzua galdu dugu sufrimenduaren eta plazer ezaren ke artean, eta esan bezala ez naiz ezer asmatzen ari. Amerika sarraskitzera joandako kronistek ere ikusi zuten zer zen onberatasuna eta jabego pribaturik ezaren arauekin bizitzea. Konkistatzaile sarraskitzaileek haiek tontotzat hartu, barre eta iseka egin eta beren odola isuri zuten gupidarik gabe. (Horretan gabiltza oraindik). Hori idatzita dago eta ongi izkutatua, jakin behar ez duguna jakin ez dezagun.
    Bizitza deitzea merezi duen bizimodua praktikatzen zuten herriez asko dagoela eskribituta kontatu didate baina nola desegin zaigu jakituria sentsual hori? ARNrik gabeko AristotelesPlatonSanagustin dosi gogor eta saio luzeko ihardueraz, agian?(Ilustratu zahar batzuk aipatzearren).
    Niri faroltxo bat oparitu zidaten bide zidor baten hegalean geldi samar nengoela, noraezean baina beharrezko nituen amorru eta gorrotoari helduta. Bide horrek beste leku batera eraman ninduen, ordutik jada ez dut ezer modu berean ikusten, jada ez dut sikira modu berean begiratzen.
    Askok bezala, izen bat jarri behar nion suntsitzaileari eta askok bezala nik ere “Patriarkatu” aukeratu nuen. Honek, leinu bortitzari segida emanez “Kapitalismo” izeneko eta parte onekoa izan ezin duen gauza hori ekarri du geure gainera.
    Gu sortu ginenean bi gauza esaten ikasi genuen lehen-lehenik: “ama” eta “ez”.
    Ongi izan denak.

Utzi iruzkina, izen eta abizenez

Azken artikuluak