Getozka – Portulaca oleracea
Mundu zabalean oso erabilia eta landua izan den janbelarra da getozka.
Hosto zein kimu berriak entsaladan jarri daitezke, otartekoari gehitu edo txikituak krema eginda. Landarea garatuagoa denean, barazki moduan erabil daiteke, zopan, eltzekadan… Gazta, baratxuria, tomatea, tipula eta oliba olioarekin frijitu daiteke.
Zurtoinak bikainak dira ozpin-kontserban. Lehortu ere egin daitezke, ogiari gehitzeko. Erraustuta, gatzaren ordezko edo gehigarri moduan erabilgarriak dira.
Lore, loreburu eta haziak ere jangarriak dira. Haziak zereal moduan egosi daitezke, edota ehotu, irinei gehitzeko. Lan handia du hazi bilketak.
Hosto freskoek beste edozein barazkik baino omega3 gehiago dute. Gainera, E bitamina, betakarotenoak, C bitamina, B2, B3, B6 eta B9 bitaminak, burnia, magnesioa, kaltzioa, fosforoa, potasioa, litioa eta manganesoa ditu getozkak. Baita melatonina ere kopuru handian, eta betazianinak, betaxiantinak eta glutationa, denak antioxidatzaile indartsuak.
Landare honek ere, beste askok bezala, azido oxalikoa du; beraz, ez da hartaz abusatu behar harri, erreuma, artritis eta gota kasuetan. Saihestu egin behar da haurdunaldian, kontrakzioak eragin ditzakeelako. Kontuz non biltzen den ere, nitratoak pilatzen ditu-eta.
