Malba – Malva sylvestris
Sustraiak udazkenean bilduta, zopa eta saldatan jan daitezke. Hortzak garbitzeko erabili izan da. Hosto samurrak entsaladan, zukuetan… Hosto zaharragoak eta kimuak barazki moduan erabil daitezke. Zopak loditzen ditu; lau hosto handik, 200 ml. uretan egosita, arraultza pareak beste lodituko luke salda.
Hostorik handienak bilgarri moduan erabil daitezke, beteak prestatzeko. Izoztu egin ditzakegu edo lehortu, gehigarri moduan erabiltzeko.
Marokon azoketan oraindik ohikoa da barazki moduan salgai aurkitzea.
Lorak entsaladan, zopan, krematan, gozogintzan edo likoreei gehituta. Lore kukuluak ere ozpinetan onduta kontserba daitezke.
Hazi heldugabeak gordinik jan daitezke, intxaur zaporea dute. Oliozpinari gehituta edota zopa hotzetan ere jan daitezke. Haziak almidoietan aberatsak dira, eta ogia egiteko erabili ohi ziren garai latzetan. Gure amak dio umetan jaten zituztela jolasean eta ogitxo esaten zietela.
Mineral iturri ona da: kaltzioa, magnesioa, potasioa, burnia, selenioa eta kuprea dauzka. Gainera A, C, B1, B2 bitaminak ere bai, eta antozianinak, muzilagoak, taninoak eta flabonoideak. Azken horiei ezaugarri analgesiko, antiinflamatorio eta antiultzeranteak onartzen zaizkie.
Malba nitrogenotan aberatsak diren lurretan hazten da eta hostoetan nitratoak pilatzeko joera du; horregatik saihestu egin behar da ongarri kimikoz kutsaturiko sailetan biltzea. Saihestu punttu laranjak sortzen dituzten onddoak ere, hostoaren ifrentzua %5etik gora kutsatua dutenean.
Ikasi egin behar ditugu gauza hauek. Guk, etxean anginetako minak baretzeko erabili izan dugu gargarak eginez.
Segi, Asier, beharrezkoak ditugu halakoak eta.
Mila esker partekatzeagatik jakinduria hau. Malbak ere jan badaitezke prestatuago egongo gara bestelakoak falta direnerako.