Janbelarrak, sendabelarrak, belar txarrak, jendilaje arbuiagarria edo behintzat susmagarria. Gobernatu beharreko izurri berdea. Belar txarrak errebeldeak dira, edonon hazteko sen antizibikoa dute, kartzelako porlana arrakalatzen ere dute, edozein zirrikitutan errotzeko gai.
Zein egoskor hazten diren baratzean geure landare maiteenen ondoan, indartsu. Ez dira landatu behar, ez ongarritu edo inguruko belarrengandik babestu; barraskilo eta bareak kentzen ibili beharrik ez; gorrina, zurina edo izurriteei aurre egiteko gai dira; doakoak eta ugariak.
Belar txarrak errebeldeak dira, edonon hazteko sen antizibikoa dute
Mundua gobernatzen dutenek gorroto dituzte belar txarrak eta hala hezten gaituzte, autonomia eskaintzen digutelako bai osasunean, bai elikaduran. Bayer – Monsanto bikoteak geure elikadura kate osoaren jabe izateko dihardu gogor eta bere arlo pozoitsuenetakoa da belarrak suntsitzeko produktuak ekoiztea; jendea pozik, horiei esker Edurne Zuriren sagar pozoindu ederrak jan ahal izango ditugu, Transtalo superjatorrak eta golf belaze perfektoetan bazkatutako behien 0km esne eta haragi supersupereuzkotarrak. Pozioek gaixotzen gaituztenean, ekoitzi dituen enpresa bera izango da sendatuko gaituena, Jinkoak nahi badu. Amen.
Janbelarrak arbasoen elikagai izan dira milaka urtez, pixkanaka barazkiek ordezkatu dituzten arren, baina herenegun arte jan izan dira, bai bilduak, bai erosiak. Ikusiko dugu nola beraien balio nutrizionalak barazkienak baino konzentratuagoak diren, sendabelarrak izateaz gain. Ez da gure asmoa barazkien eta nekazaritzaren ordezkapenik bultzatzea, osagarritasuna baino; ezagutza, esperimentazioa eta natura bizitzeko beste modu batean murgiltzea.
Beraien balio nutrizionalak barazkienak baino konzentratuagoak dira, sendabelarrak izateaz gain
Hemen argitaratuko dugun informazio gehiena gure lagun César Lema Costasek argitaratutako “Usos de 113 plantas silvestres de los campos norteños. Bienaventurada la maleza porque ella nos salvará la cabeza” liburutik itzulia eta laburtua izango da, gure esperientzia pertsonalaren ikutuarekin. Beraz, norbaitek ez baldin badu itxaron nahi hemen tantaz tanta argitaratuko duguna irakurri arte, sarean bilatu dezake liburua edo egileari zuzenean eskatu; hori bai, gazteleraz, baina informazio askoz gehiagoz.
Janbelarren aldarria, ezagutza eta erabilera, justu mundua gobernatu nahi dutenek inposatu nahi diguten ildoaren kontrakoa da: autonomoa, osasuntsua, komunitarioa, parekidea eta naturarekiko integratzailea.
Honen ondoren eta datozen asteetan zehar, janbelarren erabilerarako aholku orokor batzuk ematea eta gero landarez landare aztertzen joatea da asmoa.
Eskerrik asko Asier zure JAKITURIA munduagaz partekatzeagatik. Asko ikasiko dogu!
Aipamen berezia egin nahi deutsat hor ezkutuan dagoen Leireri ere, jakituria horretan daukan sensibilidadean errotutako garrantzia eta jakituriagatik.
Jo baietz. Itzelak. BIAK!
“Bienaventurada la maleza porque ella nos salvará la cabeza”
Ba, gora belar txarrak! Mundiala axier. Jakituria hau ere fratrizidioaren aurkako ezkutu errebelde bat da, bai. Idatzi aproposa egin duk.
Besarkada goxoa, gaztain zaporekoa.
Ekarpen ederra, Asier, eskerrik asko bihotzez.
Gora belar txarrak, bai; janbelarrak, oldar zibilizatorioen aurrean erresistentzian, edozein txokotan hazten direnak bizitza bera bezala; jakina, bizitzaz beteta daudelako.
zuei eskerrak.
Argazkirako benetan latza aukeratu dun e?
Bastarrika, bazter izkinetako altxorren irrika.