Benetako jakinduriaren bila

Ez ote da jakinduria barrutik eta esperientziatik ateratzen den zerbait, eta gero bilatuko dugu barneko sentsazio hori hobekien azaltzen duen hitzen teoria edo literatura? Jakinduria ez ote da bizipenetan esperimentatutako zerbait izango, eta ez bestek idatzitakoaren lorito errepikapena?

Eskoletan eta unibertsitateetan bilatzen dutena ez da pertsona jakintsuak sortzea, haiek aukeratutako teorien biltzaile eta loritoak sortzea baizik. Jakintsuak izateko behar den guztia daukagu; goazen bilatzera! Jakinduria hori bizitzak eskaini dizkigun eta zeharkatu ditugun bizipenekin lotuta egongo da. Gero, hitzetan jarri eta ordenatuz gero, hemen duzu Independentea zure jakinduria munduari eskaintzeko. Aselen artikulu interesgarri hau irakurtzean hauxe etorri zait eta guztiokin partekatuko dut (eskerrik asko, Asel, liburu horiek guztiak irakurri beharrean, zure barne-jakinduria gurekin partekatzeagatik):

Ni “moderna eta askea” egiten ninduen nire profesional langile bizitza uztera ausartu nintzen alabak izan nituenean, barneko dei batek deituta, eta sei urtez-edo eszedentzian egon nintzen, amatasunean murgilduta. Beste ama batzuekaz tribuan hazten aritu nintzen tarte horretan, umeekin ikusten, sentitzen eta barnea mugitzen zidan guztia partekatzeko une zoragarriak egunero sortzen zitzaizkigun amoi. Pentsamendu laborategi bat sortu genuen ume haiek zekarkizkiguten altxorrei eta purutasunari esker.

Esango nuke umeak inguruan dutena erreproduzituz jolasten direla

Behaketa eta bizipen horiei esker, esango nuke umeak inguruan dutena erreproduzituz jolasten direla. Umeak askeak dira eta emakume eta gizon rolak erreproduzituko dituzte, haien inguruan ikusten dituztenak. Haiek ez dute batere arazorik. Mutilek lagunaren sevillana arropa gorria jantziko dute eta neskek txapela, bibotea eta gizon ahotsa jarrita Antonio direla esango dute. Jarraian neskak printzesa edo maitagarri bihurtuko dira haien gona luzearekin eta mutilak super heroi eta Batman. Dena barrez, gozamenez. Gauzak honela, ausartuko nintzateke esatera ez dagoela batere arazorik eta ume guztiak yin eta yang energien abaniko zabal guztia esperimentatzeko egarriz jaio garela.

Gero badago beste istoriotxo bat, eta hauxe da nire iritziz: ume horien jolasak eta haiek energia ezberdinak bizitzeko egiten dutena begiratzen dituen heldua. Eta, kontziente ez izanik, heldu horrek itzalean dituen minak. Hemen dago gakoa. Heldu horrek uste badu mutila sevillana arroparekin ezin dela jantzi, adibidez, mutila bada yang energiarekin bakarrik identifikatu behar duelako, edozer egingo du jolas hori erreprimitzeko. Hori egitean, umearen yin energia erreprimituko du. Umeak sentituko du bera yin baldin badago ez dutela maite edo gurasoak urduri jartzen direla, eta, horrela, yin energia horri gainean hormigoia botatzen joango da, itzalean geratzeko.

Ume horien jolasak eta haiek energia ezberdinak bizitzeko egiten dutena begiratzen duen helduan eta heldu horrek itzalean dituen minetan dago gakoa

Nerabezaroan eta helduaroan, aratusteetan mini-gona, takoi, bular handi eta ezpain gorriekin ikusi ditudan mutil futbolarien atzean, aipatu dudan haurtzaroko esperientzia gordetzen ez ote den galdetzen diot nire buruari. Eta eskerrak, errepresio guztiaren gainetik ere, mutil horiek esperientzia hori bizi ahal izatea.

Erreprimituko dena helduak itzalean duena izango da. Nire garaian, feminismoaren eraginez, edo sasoian sasoiko pelikulagatik, neska batek printzesa arropa nahi izatea eta jolas hori esperimentatzen ez uztea ere gertatu izan da.

Helduok, guk bizi izandakoagatik, noski, ezin dugu izakia bere osotasunean sentitu eta izaten utzi

Nire ondorioa, oraingoz, hauxe da: helduok, guk bizi izandakoagatik, noski, ezin dugu izakia bere osotasunean sentitu eta izaten utzi. Polarizatuta baino ez ditugu ulertzen umeak eta pertsonak: sentibera bazara ezin ausarta izan, irekia bazara ezin batzuetan lotsatia izan… eta horrela polo edo mutur guztiekin.

Imajina dezakegu, kanpo-itxurarekin eta mozorrotzearekin haien osotasuna esperimentatzeko jolasa onartzen ez badugu, barne-izaerarekin ere nolako triskantzak egiten diren.

Bideak beti izan behar du gure betaurrekoak garbitzea eta haiei barrutik ateratzen zaiena ateratzen uztea.

Gaur egungo matrakarekin polarizazio moderno berriak agertzen ari direlako susmoa dut

Gaur egungo matrakarekin, jolas horietan sevillana arropa janzten badu, zuzenean homosexual edo trans izendatu… eta polarizazio moderno berriak agertzen ari direlako susmoa dut. Umea gure begirada garbiarekin libre utzita, ematen dit nerabezaroan dudarik gabe sentituko duela erakarpena bere arimaren bideak behar duenagatik, emakumea edo gizona, eta kito. Oso erraza dela ematen dit. Txotxoloen teoriak jarraitu eta umeei ezarri beharrean, gure umeak sentituko bagenitu eta epaitu gabe izaten utziko bagenie, akabo zoramen hau.

Bide batez, eskerrik asko sortzen ari garen Independentea deituriko pentsamendu askeko laborategi honengatik, baita gure barnea askatzeko eta ordenatzeko duen magiagatik ere. Jarrai dezagun gizarte jakituna sortzen!