JANBELARRAK

Jan errebelde eta sasoitsu

Asuna da janbelarretan interesgarri eta eskuragarrienetakoa.

2

Asier Bastarrika Gorostiza

Okina eta aita. Basabizizalea. Aia

Estreinakoz
papereko Independentearen
1. zenbakian argitaratua

2023ko abenduan.

Elikagai bikaina da, erraza liseritzen. Mineraletan aberatsa, batez ere kaltzioan, burnian eta magnesioan, 20 gramo asunek erraz asimilatzeko moduko 200 miligramo magnesio dakar; gainera, potasioa, fosforoa, manganesoa, silizea, iodoa, zinka, sodioa, sufrea eta kloroa dauzka. C bitamina iturri ona da, brokolia x 3 eta laranja x 5, bitamina hau burniaren aprobetxamenduan lagungarria da, asuna horregatik da anemiaren aurka horren eraginkorra. Horrez gain, A, K, E, D bitaminak eta B multzokoak ditu. Aminoazido ugari ditu eta justu loratu aurretik pisu lehorraren %25-40 proteina izatera iristen da, sojak baino gehiago.

Guk loratu aurretik biltzen ditugu goiko sei-zortzi hostorik samurrenak. Erabilian hostoak berritzen doaz eta ia urte guztian aprobetxa daitezke, ez direlako batera loratuko. Loratu ostean hostotzarrak oso latzak bilakatzen dira eta hondar aletxo modukoak ekoizten dituzte; hauek gernu bideak urra ditzakete baina ondo egosiz desegiten omen zaizkio.

Asunaren hostoak berritzen doaz eta ia urte guztian aprobetxa daitezke

Diabetes eta hipertentsioaren aurkako botikekiko interferentziak eragin ditzake. Kardiopatia edota giltzurrun gutxiegitasun kasuetan, neurriz hartu, gehiegikeriarik gabe. Kontuz kontsumitu haurdunaldi eta edoskitze aroan ere, baita hamabi urtetik beherakoek ere. Kontuz diogunean, esan nahi da ez dela hartu behar baldekadaka edo honekin prestatutako sendagarri kontzentratuak.

Nola bildu:

Umetan traumaren bat eragin baldin badigu ere, ez da hain latza bere ziztada, batez ere euri girotan. Behetik gorantz hartuz gero gutxiago ziztatzen du. Bestela eskularruak, guraizeak… bakoitzak bere artea erabil dezala, baina kontuan hartuta ziztada bera ere sendagarria dela, baserritar zaharrek ondo dakiten bezala.

Barazki arrunt bezala erabiltzen dugu, lekari eltzekarian, barazki zopan, pureetan. Oso gustuko dugu tortillan, aurretik tipularekin potxatuta

Barazki arrunt bezala erabiltzen dugu, lekari eltzekadari gehituz, barazki zopan edota pureetan. Oso gustuko dugu tortillan, tipularekin potxatu eta gero arraultza gehituta; niri makailu tortilla dakarkit gogora, ez dakit zergatik. Hosto samurrenak entsaladan nahastuta jatea ere ba omen dago. Lagun nafar basati samar batek hostoak bolatxo bilakatu eta hala jaten zituen, pilula moduan, kamuflatuak, jende zibilizatuak esplikaziorik eska ez ziezaion. Oso dotore eta goxo geratzen dira hostoak tenpuran; handitxuak aukeratu behar, baina betiere samurrak eta loratu aurretik. Enpanadillak ere egiten ditugu milurtekoaren hastapenetatik, hori izan zen gure lantegiaren lehen produktua. Hostoak lehortu eta hauts eginda erabil daitezke janaria ontzeko edota irinekin nahasteko.

Jan errebelde eta sasoitsu.

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

2 erantzun “Jan errebelde eta sasoitsu” bidalketan

  1. Hostoa jasotzean, asunari hitz egin ezkero… Ez dizu ziztadarik emango.
    Artilea berdez tindatzeko ere aproposa da.

  2. Aitor, asunari hitz egin ezkero ez duela ziztatzen? Hori frogatu behar da bai.
    Eskerrik asko

Utzi iruzkina, izen eta abizenez

Azken artikuluak