Mimosa eta akazia beltza –
Acacia Dealbata, Acacia melanoxilon
Hau ez da belarra, jakina, baina merkatuz kanpoko lore jangarria duenez hona ekarri dugu, urtean lehengoetakoa delako esnatzen, belarrak oraindik lo xamar direnean.
Loreak gordinik jan daitezke entsaladan, edo su-frijitu egin daitezke, edo saltsen osagarritzat erabili. Lore zein haziak lehortu egin daitezke eta haiekin irina egin daiteke, ogi eta opilgintzan erabiltzeko. Polenetan aberatsak dira.
Erretxina jangarria omen da eta goma arabigaren ordezko izan daiteke. Karameluak egin daitezke, edo uretan disolbatu, freskagarriak edo erreximenta egiteko. Lehortuz gero, erretxina hori luzaroan gorde daiteke, gero, berotuta, bigundu eta murtxikatu egin daiteke txikle baten antzera.
Mimosaren eta akazia beltzaren haziek zein polenak proteina asko dute (%17 eta %25 artean), zerealen gainetik; koipe poliinsaturatuak (%4 eta %16 artean) eta karbohidratoak (% 30-40) ere badituzte. Hazi hauek, besteak beste, aborigen australiarren ohiko jana omen dira, eta mundu zabalean interesa pizten ari diren elikagaiak dira.
Urtea hasteko hau bai informazio baliagarria, eta ez Ministerioetatik eta Hedabideetatik datorkigun kaka buru-programatzailea.
Eskerrik asko! Musukorik ez; denok mimosa erretxinaren txiklea ahoan eta ibili munduan!
Berriro ere jakinduria osasunarekin uztartzen, jakin behar dugun hori azaleratzen. Eskerrik asko Asier.
Amalurrarekin bat egitera eramaten gaituen jakituria dakarkiguzuna Asier, mila esker.
Esker anitz Asier! gardabera, asunak, zaingorria,… eta laster usain gozoko mimosa lore zoragarriak! Gozatzen hasita nago… Askatasuna, askatasuna eta askatasun gehiago! geuk erabakitzeko nola bizi, elikatu, osatu, eta abar gehiago!