Zaingorria – Geranium Robertianum
Ia urte guztian aurki dezakegun belar ugaria. Perrexil antz apur bat du eta geranio usaina; liburuetan irakurri dugu usain desatsegina duela, baina gu ez gara iritzi horretakoak. Usain hori dela-eta baratzeko izurriteak, eltxoak eta arkakusoak uxatzen omen ditu. Berdea izan arren, gorritzeko joera dute hosto zahar zein zurtoinek, baina aurkitu dugu ia gorritasun arrastorik ez duenik ere, leku ilunetan batez ere.
Sarrien jaten dugunetakoa da, biltzeko erraza delako, etengabe berritzen delako eta oso sendagarria delako.
Ez da bereziki zaporetsua, entsaladan jaten ditugu hosto xamurrak zein loretxoak. Beti bezala, loratu aurretik hostoak biltzen ditugu, edo bestela lorea. Gordinik ere bururatzen zaigun beste edozein modutan jan daiteke, ogitartekoetan, zukuan, irabiatua…
Janbelar hau zein besteak hartzeko era moderno tekno eta erraz bat irabiagailuan edo turmixarekin zukuak egitea da, urarekin edo fruta zukuarekin batera, limoi ttantta batzuk ere ondo geratzen dira. Iragazi eta barrura. Sistema honekin landare latz askotaz goza dezakegu, zuntzak eta arantzak baztertuz.
Landare osoa, sustraiak barne, lehortu egin daiteke, beste janbelar asko bezala, eta sukaldean gehigarri moduan erabili.
A, B, C bitaminak, kaltzioa, potasioa, magnesioa, burnia, fosforoa eta germanioa omen ditu. Azken honek zuntzen oxigenazioa hobetzen omen du, ezaugarri antikantzerigeno handiekin. Germanioaz gain, dituen olio esentzial ugariek, geraninak, flabonoideek (rutina), azido organikoek eta taninoek ezaugarri sendagarri asko gehitzen dizkiote.
Ez zaio ia eragin kaltegarririk ezagutzen. Bakarra, asko hartuz gero, prostatitisa duten gizonengan kaltea eragitea da; oso gutxitan gertatzen da, eta, hala denean, epilobioa hartuz konpontzen da arazoa.
Antikoagulanteak hartzen dituen jendeak ere ez luke abusatu behar landare honetaz, odola loditu lezakeelako, haragiak, txerrikiak, esneak, margarinek, frijituek, gatzak, azak, azelgek eta espinakek bezala.
On dagigula!
Ze polita Asier. Eskerrik asko zure jakituria hau partekatzeagatik.
Eskerrik anitz Asier
Bihotz Bihotzetik
Eskerrik anitz Asier
Orain eta beti !
Mila esker, Asier,
gure botika osatzen laguntzeagatik…
hemen jarraitzaile taldea daukak
hire erremedioak jarraitzen eta probatzen…
eskertzen dizuet, baina lotsaz jasotzen ditut halako lorak, batez be Cesar Lemaren itzultzaile lana egiten ari naizelako gehienbat, nahiz eta janbelar praktikantea ere izan.
Eta ez da botika, platera baino.