Izena emateko esteka: https://docs.google.com/forms/d/18rjQcT3T3xSczl9UEwS-WtMYT5bsbDebIQDaF2lJXLs/viewform?edit_requested=true
Datorren irailaren 26 eta 27an Bilboko Zabalguneko (Ensanche) merkatu ohian bi egunetako elkar-gogoetarako aukera izango dugu. Gune irekiari buruzko 28. Munduko Biltzarraren antolatzaileek, pandemiak eragindako hiru urteko hutsunearen ondoren, galdera hau proposatzen digute: “Garai nahasiak: zelan aurrera egin elkar lagunduz?” Zer izan da? Nola eragin dizu? Zer ikasi dugu? Nola aurrera egin? Mundu osoan eragin du eta gutako askorentzat bizitzako zartadarik handiena izan da. Gainera, elkartzeko eta hausnarketa kolektiborako aukerarik apenas izan dugun. Premia bai, ordea.
Baina has gaitezen lehenengo azaltzen zer den gune irekia edo open space mugimendua. Batzar edo kongresuetan askotan egon bagara, kafe edo bazkari orduetako solasaldietako edukiak egun horietako interesgarrienak izan direla konturatu gara, han gertatutako ideiek, pertsonen arteko enpatiak edo agian ideien trukaketek balio izan digute gehien, gure golkoetarako. Esperientzia haietatik abiatuta, gune irekiko batzarretan horixe da gakoa: biribil handi batean jarrita parte-hartzaile guztiak, hasieran eta agenda hutsik dela, aukera ematen da norberak nahi dituen gaiak plazaratzeko. Gai horietarako guztietarako, gunetxoak izango dira egunean zehar, denari heldu ahal izateko, eta norbera taldez talde mugitu ahal izango da, une bakoitza aberasgarri izan dakion.
1977an Harrison Owen-ek “Open Space Tehcnology: a user’s guide” plazaratuz geroztik, mundu osoan zehar egin izan dira era guztietako testuinguruetan gai konplexu, urjente, gatazkatsuei buruzko gune irekiko topaguneak, arrakasta handiz. Eta mundu mailako mugimendua eta komunitate zabala da abian ordutik, autoeraketa oinarri.
2013an, Euskal Herrian horretan gabiltzanok Gune Irekiaren Lagunak taldea osatu genuen, eta gai eta kolektibo ugarirekin erabili izan dute: basoen kudeaketatik euskararen erabileraraino, osasun publikotik gaztetxeetako antolakuntzetara, Zeraingo Herri Eredua birrasmatzeko, enpresa bat sortzeko zein herri-unibertsitatea asmatzeko.
Eta Gune Irekien Lagunengan piztu zitzaigun kinada eta gonbidapena aurtengo mundu mailako biltzarra eratzeko, 28.a, pandemiak eragindako urte biko etenaldia gaindituz. Hori dela eta, irailaren 26tik 30era GiGi Mundiala dugu Bilbon!
Munduko Gune Irekizaleen webgunea hemen duzu, kontua zabalago arakatu nahi izatekotan: https://openspaceworld.org/wp2.
Askotan galdera interesgarri bat aski izaten da hasieran, jende multzo batek ordu batzuz modu emankorrean eta sortzailean erabiltzeko, aske eta bizi, guztien parte hartzearekin eta helburu amankomunetara joz.
Iraileko galderak pandemiaren ondorenei aurre egiteko balio izango digulakoan nago. Uda honetan agerikoa da bi urtetako dinamika sozialen berpiztea bizi dugula, hasi udaberriko Korrikatik eta udako herriko jaietara. Mugimendu sozialak ere bileretan dabiltza, Nafarroako Artederretan, zein internazionalistak Bizkaiko Artean, edo ekotopaketak Portugaleten urriaren hasieran. Pandemia honek harreman asko moztu ditu, talde zein lagun artekoak, alderdi edo erakundeetakoak,… askorentzat isolamendua ez da fisikoa bakarrik izan, psikologikoki ere kalte egin digu guztioi.
Horregatik, hasierako galderak planteatzen duen bezala, garai nahasi hauetan modu aske batez hitz egitean, elkar laguntza baten alde elkar topatzeko aukera ezin hobea izango dugu Bilbon udazken hasieran. Ez galdu aukera hori!
Angel Bidaurrazaga Vandierdonck
Gentza Eleder Aurtenetxe Pildain
Open Spaceko lagunak
