Badakigu biltzarrak zelako garrantzia izan duen gaur arte mundu osoan. Jendeak elkarrekin aurrera egiteko, gai konplexuei heltzeko, ekimen aberatsak abiatzeko… ezinbestekoak. Biltzarrak batzutan antzu egiten zaizkigu ordea, luze, agor. Galdu ote dugun sena. Ospe txarra ere badute askorentzat. Eta beste askok uste dugu beti bezain premiazkoak ditugula.
Azken hamarkadetan mundu osoan zehar garatu izan dira Gune Irekiko Biltzarrak. Gune Irekia edo Open Space Tecnology talde handien bilerak egiteko metodologia bat da. 80ko hamarkadan hasi zen garatzen, Harrison Owen izeneko batek ikusi zuenean kongresu eta konbentzio handietan kafe-makinaren inguruan gertatzen zirela elkarrizketarik interesgarrienak, eta ez hitzaldi-areto handietan.
Gune Irekiaren espiritua elkarrizketen eremu informal hori bileraren erdigunera eramatean datza, hau da, bilera auto-antolaketatik eratzean. Elkarrizketa egiazko eta esanguratsuak sortzen ditu normalean gai berari buruzko ideia eta pertzepzio desberdinak dituzten pertsonen artean.
Eta litekeena da auto-antolaketaren kontzeptu erakargarri hori izatea hain zuzen, gauzek naturan duten funtzionamendura igortzen duena, interesgarria gerta dakizukeena, gure bizitzako beste edozein esparrutara estrapolatu baitaiteke.
Agian horregatik ere egon badagoen metodologia horren fazilitatzaileen munduko tribu bat, 90. hamarkadaz geroztik urtero WOSonOS (World Open Space on Open Space) izeneko aurrez aurreko bilerak egiten dituena. Aurtengoa 28. aldia izango da eta Bilbon ospatuko da datorren astean.
Gero ez esan ez genuela abisatu! Oraindik ere garaiz zabiltza… Eman izena hemen, giro paregabea izango dugu, baina zeu bazatoz are atseginagoa eta aberatsagoa izango da!
Euskal Herrian 2010 ingurutik gabiltza batzarrak modu honetan bideratzen, askoz biziagoak, emankorragoak eta atseginagoak zaizkigulako. Gune Irekiaren Lagunak taldea sortu genuen 2013an, eta talde horretatik zabaldu genuen gonbitea 2021eko abenduan mundura, GiGi Mundiala! egosten ari zela alegia, eta munduko gune irekizaleek oso pozik hartu.
Horregatik dugu datorren astean, astelehenean hasi eta ostiralera arte (irailaren 26tik 30era), munduko gune irekizaleen biltzarra Bilbon: badator GiGi Mundiala!
Zabalgune eraikinean izango da, Abandon.
Antolaketan hamaboskote bat gara jada, auzolanean, autoeratutako eta autofinantzatutako ekimen eskuzabal zoro horietako batean. Honez gero 50 lagunetik gora daude izena emanda (gutxienez 12 estatutatik etorritako jendea), baina azken egun hauetan goraka ari da izen ematea.
Batzartzea eta biltzarrak egiteko modu bizi-bizi hau gogoko baduzu, aukera aparta hemen sakontzeko eta zabaltzeko. Bina egunetako topaketa bi dira GiGi Mundiala!ren barruan, bakoitza gai bati helduz:
-Irailak 26+27 (astelehen eta astearte, 9:30-18:00):
2020tik aurrerako garai konplexuak: zelan aurrera egin elkar lagunduz?
-Irailak 29+30 (ostegun eta ostirala, 9:30-18:00):
28th WOSonOS: zelan findu, sakondu, zabaldu, gune irekiko praktikan?
Dena Zabalgune eraikinean izango da, Abandon.
Bertan zer gertatuko den ezin jakin. Gune Irekiko batzarretan etorritakoek eurek osatzen dutelako agenda, zer eta noiz mintzatu. Harritzeko prest etorri behar.
Aukera aparta denez, eta zuen inguruan ere interesgarria izango delakoan, gonbidapen zabala egiten dugu GiGi Mundiala!ra.
Mila esker gonbitea zabaltzen laguntzearren!
Bertan ikusiko garelakoan, besarkada bana.
Peru Calabaza Saban
