Euskal Herriarentzat zein da hobea, karakola ala barea?

Azkenean ailegatu da eta pasa ere bai; 2024ko Azaroaren 5a igaro da. Badirudi ero faxista horrek irabazi dituela “mendebaldeko” estatu hegemon denaren hauteskundeak. Ez ditu hauteskundeak bakarrik irabazi; nagusi ere egin da Ameriketako Estatu Batuetako (AEB) bi ganberetan. Mundua aldatuko da, jai dugu, faxismoa iritsi da eta gelditzeko iritsi da, Europan sekulako eragina izango du horrek, gureak egin du… PORROTA! Justiziak kondenatutako misogino, matxista, arrazista, lunpenkapitalista, libertario… eta gainera Putin madarikatuaren laguna, puttokume halakoa… deabruen deabrua, Luziferren Luziferra, antikristoa, DEABRUA ailegatu da.

Joan den mendeko azken hamarkadan anglosferak SESB erorarazi zuenetik, behin eta berriro Errusia estutzen eta balkanizatu nahian ari dira

AEBko hauteskundeen emaitzei buruz zer edo zer idatzi nahi nuen eta aurreko paragrafoa bat-batean barrutik atera zait. Esoteriko xamar jarri naizela ohartzen naiz. Izan ere, emaitzen gaia buruan bueltaka dudala joan naiz ohera. Ardiak kontatu ordez, gaiarekin bueltaka segitu dut. Munduko geopolitikari errepaso txiki bat eman diot. Egun munduan bizi dugun egoeraren jatorriaz jabetu naiz: Sobietar Errepublika Sozialisten Batasunaren bukaeratik, anglosferak pasa den mendeko azken hamarkadan erorarazi zuenetik, behin eta berriro Errusia estutzen nola saiatu diren — Errusia munduko herrialderik handiena eta aberatsena dela gogoratzen dut: petroleoa, gasa, zilarra, urrea, zura, litioa, titanioa, nikela, diamanteak…–, eta, orduz geroztik, balkanizatzeko nahian dabiltza. Azkeneko hamarkadan Ukrainan sortutako gerra giroaz eta egoera geopolitikoaz ere ohartzen naiz: AEBko deep stateak 2013an Maidanen eragindako kolpea; geroxeago, Donbassen errusiar sentitzen zen biztanleriaren kontrako sarraskia — Azov batailoi faxistak erabiliz, Ukrainako eta “mendebaldeko” (AEB, Erresuma Batua eta horien morroiak) gobernuen onespen eta laguntzarekin, noski… –. Nahiz eta harritzekoa dirudien, hori guztia buruan bueltaka nuela lo gelditu naiz.

Gogoratzen dudan hurrengoa “BIDENte” batenean nagoela da. Ondorengoak gertatuko direla esan dit:

Lehenik, Ukrainan gerra bat hasiko da:

• 2022. urteko otsailean, Errusia Donbassen armekin sartuko da; ondorioz, Ukraina eta Errusiaren arteko guda zuzena hasiko da.
• 2022. urteko martxoan Errusia eta Ukraina Istanbulen akordio batera ailegatzen direnean, Boris Johnson, anglosferaren bozeramailea, Kieven azalduko da apirilean, Zelenskirengana joan eta ez dio utziko akordio hori gauzatzen. Gudan, “mendebaldeko” ententea azaleratuko da.
• “Mendebaldeko” itunak ehundaka mila ukrainar gerrarako erabiliko ditu okela balira bezala — 1.000.000 inguru ukrainar hilko dira gerran –. Horretarako, armekin eskarmenturik gabeko ukrainarrez baliatuko da; horietako asko kalean bertan bahitu eta gerra-frontera joatera behartuko dituzte; badira 16 urteko “boluntario” nerabeak ere…
• “Mendebaldea”, Europar Batasuneko agintari-morroien bitartez, Europa suntsituko duen gerra nuklear bat bultzatzen saiatuko da. Hori aurrera eramateko, eraso, akordio eta trikimailu desberdinak sustatuko dituzte bertan.
• Hori guztia hornitzeko, milaka milioi euro eta dolar eta mota guztietako armamentua emango zaizkie ukrainar agintariei (baita Moskura ailegatu daitezkeen misilak ere).
• 2022ko irailean, Amerikako Estatu Batuetan jatorria duen eta munduko enpresa boteretsuena den BlackRock izeneko enpresako CEOa, Larry Fink hain zuzen ere, Zelenskirekin akordio batera ailegatuko da gerra bukatutakoan Ukraina berreraikitzeko. Akordio horrekin, lur eta gai nagusien jabe egingo da BlackRock. Hitz bitan, Ukraina kolonizatuko dute. Gerra hasi eta zazpi hilabetera, negozio itzela…

Bigarrenik, 2022tik aurrera, AEBk Europar Batasunak (EB) berekiko duen menpekotasuna areagotuko duela dio BIDENteak:

• EBn inflazioa sortuz, energia, elikagaiak eta bizitzako arlo guztiak garestituz, gu guztion erosteko ahalmena jaitsiz.
• EBri Errusiaren gas merkea erostea galaraziz.
• 2022ko irailean, Nord Stream 1 eta Nord stream 2 gasbideak leherraraziz, Errusiako gas natural merkeaz Alemania hornitzea eragotziz.
• EBren industriari munduan duen lehiakortasuna galaraziz (Alemaniako automozio-industria adibidez).
• EBri Txinarekin akordio ekonomikoetara ailegatzen ez utziz — Txinak Italiarekin 2019an sinatutako akordio ekonomikoa 2023an Giorgia Melonik bertan behera utziko du, adibidez –… Mendekotasun horrekin guztiarekin, eta AEBk EBn duen okupazio militarra kontutan hartuta, AEBko “atzeko patioa” bilakatuko da EB.

Hirugarrenik, AEBko izarrik gabeko estatua den Israel eta eskualdean duen botere geoestrategikoa eta militarra bere onerako erabiliko ditu deep state anglosionistak:

• Faxismoaren eta arrazakeriaren bitartez Gazako eta Libanoko genozidio etnikoak eragingo ditu lurrarekin eta ondasunekin gelditzeko.
• Iran probokatuko dute gerra eskualdera zabaltzeko.
• Txinak (BRICS) duen Zetaren bidearen proiektua apurtzen saiatuko dira.

Esandako guztiak gertatutako gauzak direla jabetu naiz. Argi dago zein izan den; bai, ‘demokrata’ hori, Joe Biden, Kamala Harris ezkertiarrarekin batera

Hainbeste zorigaiztorekin, asaldatuta eta izerditan, goizeko lauretan esnatu naiz; aurpegia garbitzen ari nintzela, erdi lo oraindik, amesgaizto bat baino ez dela izan ohartu naiz. Azkenotan hainbatetan egiten hasi naizen bezala, ametsa idazten hasi naiz. Idazten, oraindik lo samar nengoela, gutxika lur hartu eta errealitatera jaitsi naiz, eta esandako guztiak gertatutako gauzak direla jabetu naiz. Dagoeneko, nire ametseko BIDENtea zein izan den argi dagoela uste dut. Bai, horixe, “demokrata” hori, AEBko lehendakaria, Joe BIDEN, lehendakariorde eta lehendakarigai den Kamala Harris ezkertiarrarekin batera, beren agintaldian munduan burutu dituzten astakeria eta basakerietako batzuk aipatzen. Hala ere, dirudienez, benetako amesgaiztoa ez da bukatu oraindik. Badute marjina “onura” gehiago eragiteko: 74 egun ditugu agintaldia/agindua bukatzeko, gure agintaldia/agindua. Egun bakoitza probestu dezagun, esan berri du BIDENek. Badirudi bidean daudela…

Hurrengo egunean, altxatzerakoan, Onintza Enbeitak azaroaren 7an Berriarentzako idatzitako iritzi-artikulu bat irakurri dut. Bide okerretik ez doala iruditu zait; bakarrenetakoa, pentsatu dut eta eskertu dut. Alde batetik, “Kamala Harris ez zela aukera hobea” aipatzen du eta, gobernuan azken lau urteetan zein gaiztakeria eragin dituen ikusita, arrazoirik ez zaio falta. Bestetik, “barrura begira, bada, ez dakit zenbateraino diren demokratak errepublikanoak baino askoz hobeak” ere idatzi du eta hein handi batean berarekin bat egiten dut. Adibide xume gisa, Barak Obama lehendakari ohiak eta Bakearen Nobel saridunak bere agintaldian 2.471.644 agiririk gabeko etorkin deportatu zituela ikustea besterik ez dago, eta hori antifaxista, ezkertiarra… izanik. BIDENek zer esanik ez, begiratu datuak… Hala ere, demokratak edo haien atzean dagoen Deep State zatia propagandaren erabileran askoz iaioagoak direla argi dago, DEABRUAK Obamaren herena deportatu baitzituen bere lehenengo agintaldian, 666.106 hain zuzen ere, eta hala eta guztiz ere munduan dagoen faxista arrazista handienetakoaren etiketa irabazi du. Enbeitak bere artikuluan egiten duen beste aipamen bat ere ekarri nahi dut: “Garaipen honek Gazan berriro ere kolonoak ezartzea eta Zisjordaniaren anexioa azkartu egingo dituela entzun dut, eta horrek bai egiten duela mina”. Min handia gainera, Onintza, baina ondo ulertu behar da zein den jokoa. San Sebastian egunera arte ez da AEBn lehendakaritza aldatuko; dagoeneko Benjamin Netanyahuk, azaroaren 5ean bertan, kargugabetu egin du bere defentsa ministroa zen Yoav Gallant, bere gobernuan zuen kontrako ahots nagusia; eta, bestalde, jada aipatu dut Bidenek esan berri duena. Beraz, dirudienez, AEBko asto demokrata neokon guztiek badute hasi duten lana bukatzeko aukera, urtarrilaren 20ra arte.

AEBko asto demokrata neokon guztiek badute hasi duten lana bukatzeko aukera, urtarrilaren 20ra arte

Jakina da AEB, eta ondorioz “mendebalde” guztia, plutokrazia baten menpe dagoela. Ekintzak, eta ez hitzak, neurtu behar dira. Alde batetik, Bidente lana asko zabaldu da; bestetik, orokorrean, egoeraren analisi eskasak egiten dira, askotan. Elite horien hedabideen propaganda hain sartuta dago gizartean, askotan nahita eta beste batzuetan nahi gabe, inertziaz… oihartzuna besterik ez zaiola egiten, sustraira joan gabe.

Ustez, boteredunen, eliteen, deep statearen… horien guztien — baina guztien eta ez alde batekoen bakarrik — plutokrazia horren atzaparrek, beraien hedabideen bitartez besteak beste, nahita egindako kontaketa gezurteroa deseraiki egin behar dugu. Nahita egindako tranpa matematikoa eragiten da Deabrua zein den esatean: Plus eta Minus, Ona eta Txarra, Ongia eta Gaizkia… Ezkerra eta ultra eskubia…

Zein baino zein hobea, DEABRUA ala BIDENtea? Zein baino zein faxistagoa, astoa ala elefantea?

EUSKAL HERRIARENTZAT ZEIN HOBEA, KARAKOLA ALA BAREA?