Galdera hori bota zuen partaide batek Osasun burujabetzarako taldearen azken bileran. Hortik abiatuta bertan mintzatutakoa aipatuko dut orain, gogoetarako.
Lehenengo eta behin, osasunaren eta osasungintzaren erreferentzia berri bat behar dugu, osasuna, negozio gisa barik, giza-eskubidetzat izango duena. Bizitzako beste alor ugaritan bezala (aisialdia, elikadura edo harremanak), osasunaren merkantilizaziotik atera egin behar dugu, kapitalismoak sustatutako joerek eta pandemiak bizkortu duten merkantilizazioa. Paradigma aldaketa bat beharrezkoa da eta borroka ideologikorako prest egon beharko genuke.
Paradigma aldaketa bat beharrezkoa da eta borroka ideologikorako prest egon beharko genuke
Bestalde, burujabetzaren ikuspegitik, norberarentzat eta komunitatearentzat tresnak lortzeko gaitasuna garatu beharko genuke, hasi osasun-hezkuntzatik eta ikerkuntzaraino. Aspalditik, alor horiek enpresa farmazeutikoen esku daude eta neurri ugari hartu dituzte osasun biomedikoa zabaltzeko, dogma bat balitz bezala. Etekin ekonomikorik ez badago ez dira terapia batzuk egiten eta beste asko zuzenean zokoratzen dira. Gizartea kontsumismora bultzatzen da, hedabideen laguntzarekin egindako beldur eta gezur kanpainen bidez. Osasun-sistema horretarako diseinatuta dago, eta, adibidez, norbaitek bere kontsultatik beste aukeraren bat proposatuko balu, presio asistentzialarengatik eta agintariengatik ekimenak ez luke aterabiderik.
Munduaren iraupenerako deshazkundearen helburuak osasun gastuan ere eragina izan beharko luke. Farmakoen neurrigabeko erabilpena neurtu eta murriztu egin beharko litzateke. AEBn ikusten den moduan; herrialde horrek, osasun gasturik handiena izanda ere, ez du bere herritarren gutxieneko osasun maila bermatzen, haien arteko desberdintasun ekonomiko eta sozialak handiegiak direlako.
lehen gaixoa zena orain bezeroa da
Hiztegiak ere aldatu behar ditugu; izan ere, lehen gaixoa zena orain bezeroa da. Osasun kudeatzaileek produktibitatearen eta efizientziaren leloak muinean sartuta daramatzate eta, noski, osasun publiko edo prebentiboan formaziorik ez daukate. Horregatik, Osasun kooperatibak hezkuntzarako aukera bat eman beharko lioke gizarteari, gure erresilientzia eta ahalduntzea indartzeko bidean. Hona adibide pare bat:
- sukarra gure defentsa sistemaren parte dela jakin beharko genuke eta sukar prozesu bat ez dela berariaz eta bereziki moztu behar.
- oinarrizko farmakologia ezagutu beharko genuke polimedikazioari aurre egiteko.
ikerlari batzuek osasunaren militarizazioaz hausnarketa interesgarriak egin dituzte
Osasuna neurri diktatorialak ezartzeko erabili izan da, eta joera honek sakontzera egingo du, OMEk bultzatutako pandemia hitzarmenaren ondorioz. Europan, Frantziak eta Alemaniak onartuko dituzten neurri murriztaileen inguruan, ikerlari batzuek osasunaren militarizazioaz hausnarketa interesgarriak egin dituzte berriki Okzitaniako Tolosa hiriburuan.
Lantzen ari garen Osasun kooperatibako partaideak elkarlanean aritu daitezke terapien inguruko ezagutzak eta hobekuntzak elkarren artean trukatzeko edo sistemak bultzatzen ez dituen ikerketak egiteko. Adibidez, askotan aipatzen dira lan-absentismoaren kalteak enpresetan, baina ez da aipatzen gaixotutako langileak baja hartzen ez duenean pairatzen duena hain zuzen ere bere lanpostua kolokan egon daitekeelako.
Pandemiatik hona zientzia dogmatizatu egin da
Eztabaida guneak behar ditugu. Pandemiatik hona zientzia dogmatizatu egin da eta desagertu egin dira ikuspegi ezberdinetako eztabaida eta gogoeta interesgarriak. Gutxi batzuen esku geratu da boterea, baita ezagutzarena ere.
Noizbait gaixotzen bagara, aukera izan beharko genuke Osasun kooperatibako kidengana jotzeko, horiek sektore publikoan zein pribatuan egon, gure asmoekin bat egiten duten osasungileekin aritu ahal izateko eta osasun negoziotik aldentzeko.
Hemen aipatu ditugun baloreak eta gogoeta gehiago ere landu beharko ditugu udazkenean zehar egingo ditugun bileretan. Gonbidatuta zaude.
Bai, osasuna neurri patriarkalak eta diktatorialak ere ezartzeko erabili izan da, eta joera honek sakontzera egingo du tekno-feudalismo honetan, estatu batzuek eta OMEk bultzatutako pandemia hitzarmenaren ondorioz.