Energian, komunikazioan edo hezkuntzan bezala, osasungintzan ere kooperatibak behar ditugu

Osasun Kooperatiba

Azken hamarkadetan argi eta garbi geratu da osasunaren inguruan negozioa dela nagusi eta, pandemiaren ondoren, abiadura hartu dute aspalditik zetozen pribatizazioa, merkantilizazioa eta bizitzaren medikalizazioa bezalako joerek. Horren aurrean, burujabetza eta herri boterearen eskutik, beharrezko ikusten dugu osasunaren inguruan beste modu bateko alternatiba bat sortzea Euskal Herrian.

Energiaren, komunikazioaren edo hezkuntzaren alorretan gertatu den moduan, osasunaren esparruko kooperatiba bat beharrezkoa dela iruditzen zaigu, ideologia kapitalistatik kanpo, elkartasunean eta zintzotasunean oinarrituta. Gure ustez, hau eratzeko prozesu bat eman beharko litzateke eta bertan hiru urrats aurreikusten ditugu:

BAT: Osasun kooperatibaren oinarri teorikoak jartzea, hau da, zer ulertzen dugun osasuna esatean, nola irudikatzen dugun osasun-arreta eta nola irudikatuko genukeen osasun-sistema bat etekinak eta interesak kanpo utziko lituzkeena.

BI: Oinarriak finkatuta, eratze prozesu bat abian jartzea, non parte hartzaileen kezkak, nahiak eta ezagutzak partekatuko genituzkeen osasun hezkuntza eta arreta berri baten alde.

HIRU: Oinarriak eta ikuspuntuak behin finkaturik, osasun kooperatiba bera sortzea, izan ohi diren neurri legal eta ekonomikoak betez.

BAT: oinarri teorikoak
BI: eratze prozesua
HIRU: kooperatiba bera sortzea

Argi dugu zer EZ dugun nahi: negozioaren legearen pean ari diren Big Farmak, mutuek eta aseguruek kontrolatutako osasun-sistema ustel bat ez dugu nahi, jaiotzatik heriotzaraino bezerotzat hartzen gaituena eta sistema sanitarioren arlo guztiak kontrolatuta dituena, ikasketetatik ikerkuntzaraino, eta, besteak beste, arreta modu zehatz bat inposatzen duena, osasuna eta gaixotasuna ulertzeko beste inolako moduri zirrikiturik uzten ez diona.

Azken mendean biomedikuntza inposatu da eta gizakiaren osotasuna albo batera laga da, terapia kimikoaren mesedetan

Azken mendean biomedikuntza inposatu da eta gizakiaren osotasuna, fisikoa zein mentala eta espirituala, albo batera laga da terapia kimikoaren mesedetan, neurri handi batean. Beste modu bateko tratamenduak edo patenteetatik kanpo geratzen diren sendagaiak eta sendatzeko moduak (sendabelarrak, botika zaharrak, terapia fisikoa, etab.) medikuntza alternatibo izendapenaren itzalean geratu dira.

Edonola ere, aipatzen ari garen osasun kooperatiban parte hartzeak irekia izan beharko luke oinarrizko baloreekin bat egiten dutenentzat; bai Osakidetza edo Osasunbidean lan egiten dutenentzat, bai pribatuan ari direnentzat. Erreferentzia bat behar dugu; sendagile, psikologo, erizain, fisioterapeuta edo bestelako osasun-langile batengana joan behar dugunean, kooperatiba horren barruan egonda, lagungarria izango dela edo harekin kidetasuna izango dugula jakinik.

Osasunaren eremurako herri-erreferentzia berri bat behar dugu kontraboterearen terminoetan ulertuta

Osasunaren eremurako herri-erreferentzia berri bat behar dugu kontraboterearen terminoetan ulertuta, egungo paradigma kapitalistaren aurrean osasun paradigma berri bat indartuko duena eta sare aktibista komunitario bat sortzeko gaitasuna izango duena. Aurrean daukagun distopiatik urrundu eta nahi dugun utopiara jo behar dugu.

* * *

OHARRA:

Idatzi hau Burujabetzaren Aldeko Mugimenduak (BAM) bultzatutako osasun burujabetzaren inguruko bileretan jorratu da, beste atal batzuekin batera: pandemiaren kudeaketa, osasunaren negozioa, osasun-sistemaren egoera, komunitatea eta desazkundea. Maiatzaren 24an Tafallan, goizeko 10:00etatik aurrera, herri-dinamika eraldatzaile honen topaketa berrian, gaia lantzen jarraituko dugu.