Nola lortu osasun burujabetza?
Azaroaren 14an Osasun burujabetzaz arituko gara Astran (Gernika).
Duela pare bat urte, Burujabetzaren Aldeko Mugimenduan (BAM) talde bat eratu genuen osasun burujabetza lantzeko, elikadura, energia, euskara eta beste atal batzuk lantzeko taldeak ere sortu ziren moduan.
Bizkaian egindako bilera batzuen ondoren, eztabaidarako txosten bat landu genuen, hiru atal hauek dituena:
1. COVID agertokiaren kudeaketa
2. Osasunaren negozioa, pribatizazioa eta merkantilizazioa
3. Osasuna eta burujabetza
Iaz Sopelan eta joan den udaberrian Barakaldon aurkeztu genuen txosten hori. Orain, datorren ostiralean, azaroaren 6an, Bilboko La Bolsa jauregian 19:00etan aurkeztuko dugu. Gainera, beste bide batzuetatik hainbat txokotara heldu da txostena, eta, kezka horien inguruan elkartzeko asmoz, azaroaren 14ko larunbat goizean bilera irekia egingo dugu Gernikako Astra eraikinean. Gune Irekiaren lagunek lagunduko digute batzar partehartzaile eta emankorra bideratzen.
Gure artean gai zabal horren aukerez eta arazoez hitz egin izan dugu, eta jorratu izan dugu, baita ere, zer eragin izan duen globalizazioak alor honetan, nola osasuna eskubide izatetik negozio izatera eraman duten, eta, orobat, nola urratu dizkiguten beste eskubide ugari osasunaren aitzakian. Aipatutako aurkezpenetan, irtenbide baten beharraz aritu izan gara, baina argi dugu auzolanean egin behar dugula bidea. Horregatik, gonbidatuta zaude Gernikako bilera irekira.
Zeuk ere parte hartu nahi duzu?
DEIALDIA
GAIA: Nola lortu osasun burujabetza?
EGUNA: 2026ko azaroaren 14an (larunbata)
ORDUA: 10:00-14:00 (9:30ean harrera)
Bukaeran bazkaltzeko asmoa badaukazu, bidali mezu bat: osasunburujabetza@gmail.com
