Lan Jazarpena

Maskara ezin jartzeagatik zigortua

Hezkuntza Sailak bost hilabeteko zigorra ezarri dit, lanaldi eta soldataren etenaldia eta hezkuntza bereziko zerrendetatik kanporatzea.

10

Oscar Uribarri Astuy

Hezitzailea hezkuntza berezian. Bermeo

Hezkuntzan lan egiten dugun pertsona talde bat gara. Ikastetxeetan musukoaren erabileraren derrigortasunak dakartzan kalteak direla-eta, Telegram talde bat sortu genuen. Bertan, prozesu hau ondo eramateko beharrezkoak ditugun indarra eta animoa aurkitzen ditugu, baita gure zalantzak argitu, ezagutzak partekatu eta bakoitzaren prozesu legalen nondik norakoaz hitz egin ere.

Gure artean gurasoak ere badaude, aita bat eta ama bat hain zuzen ere, beraien alabei musukoaren erabileraren derrigortasunak dakarzkien kalteak direla-eta. Gutariko batzuek diziplina-espedienteak irekita ditugu, baita zigorrak ezarrita ere kasu batzuetan, eta, hori dela-eta, gure kasuak abokatuen esku jarri ditugu.

Jarraian duzue nire esperientzia eta prozesuaren berri:

2019-2020 ikasturtean, ebakuntza bat zela medio, bajan harrapatu ninduen musukoaren erabileraren derrigortasunak ikastetxeetan. Hurrengo ikasturtean, 2020-2021ean, institutuko zuzendaritzan txosten mediku bat aurkeztu nuen: idazki hau familia-mediku titularraren ordezkoak egin zidan kontsulta telefoniko baten ostean. Hizketaldi horretan musukoak eragiten dizkidan kalteak azaldu eta zerrendatu nizkion.

Osakidetzako bi medikuk aitortu zidaten musukoaren erabileraren salbuespen egiaztagiririk egiteko baimenik ez zutela

Lehenengo unetik nabariak izan ziren Osakidetzako medikuen aitzakiak, musukoak osasunean eragiten dizkidan kalteak idatziz onartzerako orduan. Aurrerago, Osakidetzako bi medikuk aitortu zidaten musukoaren erabileraren salbuespen egiaztagiririk egiteko baimenik ez zutela, Osakidetzaren eta Mediku Kontseiluaren aginduak jarraituz.

Martxora arte iraun nuen egoera horretan, eta nire osasunaren okerragotzeak baja hartzera behartu ninduen. Ordura arte, egoera aldatzeko konponbiderik aurkezten ez zidatenez, sudur azpitik jaitsita izaten nuen musukoa, ahal nuen heinean. Hilabete horietan hainbat e-mail partekatu nituen zuzendaritzako kideekin, lankideekin, lan-arriskuen prebentziorako zerbitzuko medikuekin eta baita dagokidan Osakidetzako anbulatorioko medikuekin ere.

Ikerketa hauetan
agerian jartzen zen
musukoaren erabilerak
dakarren kaltea osasunean,
baita birusen kontrako
babes ezaren
egiaztapena ere

Mezu horietan musukoaren inguruko ikerketa zientifiko pilo bat bidali nizkien: ikerketa hauetan agerian jartzen ziren honen erabilerak dakarren kaltea osasunean eta birusen kontrako babes ezaren egiaztapena.

Ez nuen kontrako argudio bakar bat bera ere jaso, ez medikuen aldetik, ez beste inoren aldetik, eta hori benetan esanguratsua iruditzen zait. Lan-arriskuen prebentziorako zerbitzuko medikuei hiru lau aldiz gogorarazi nien beraien erantzukizuna dela langileei ohartaraztea musukoaren erabilerak osasunari dakarkion kaltea.

Aitzakiak eta ihesbideak bakarrik jaso nituen erantzun bakartzat. Egoeraz gogaiturik, nik neuk partekatu nuen lankideekin kalte hauen zerrenda. Lankide bakar batek erantzun zion nik bidalitako mezuari; esanguratsua da lankideen jarrera ere.

2021-2022 ikasturte berria hasi aurretik, Bilboko abokatu batzuek eraikinen barnealdean -lege aldaketa baten ondorioz- musukorik gabe lan egin daitekeela esan zidaten, irizpide batzuk kontuan hartuz. Abokatuek zuzendaritzara gutun bat eta mediku-ziurtagiri bat bidali zituzten, legearen arabera musukorik gabe lan egiteko eskubidea dudala argi utziz.

astelehen batez musukorik gabe agertu nintzen institutuan; hezkuntzako ikuskari bat eta zuzendaritzako kideak nire zain zeuden jada

Salbuespen-ziurtagiri hau Osakidetzako mediku batek egin zidan, bere bihotz ona eta adorea estamentuen aginteen gainetik jarriz. Bi asteko tartea utzi eta aurretiaz abisua eman eta gero, astelehen batez, musukorik gabe agertu nintzen institutuan. Hezkuntzako ikuskari bat eta zuzendaritzako kideak nire zain zeuden jada.

Bilera tirabiratsua izan zen. Beraiek hezkuntzako protokoloak musukorik gabe lan egiterik baimentzen ez zuela esan zidaten, eta nik legeak horixe baimentzen zidala argudiatu nuen, beraiei hierarkia normatiboa gogoraraziz. Adostasunik egon ez zenez, Ertzaintzari deitu zioten, eta beraiekin batera atera nintzen zentrotik.

Lau egunez jarraian egoera bera pairatu ostean, abokatuek eskutitz bat bidali zuten zuzendaritzara, lantokian koakzioak amaitu arte ez nintzela aurkeztuko esanez. Ertzainek esan zidaten, jarrera berberarekin jarraitzen banuen, isunak jartzen hasiko zirela.

Azkenean, Hezkuntza Sailak bost hilabeteko zigorra ezarri dit, lanaldi eta soldataren etenaldia eta hezkuntza bereziko zerrendetatik kanporatzea. Helegitea jarriko dugu epaitegian.

Prozesu honetan sentitzen den bakardadea errazago eramaten da Bizitza, Liberum, Scabelum edo Médicos y Biólogos por la verdad bezalako elkarteen laguntzari esker. Nire esker ona adierazi nahi diet guztiei, lan izugarria egiten ari dira. Testigantza honekin batera, hemen doa nire omenaldia, beraiei eta nire egoera berean dauden lankideei eskainia. Eskerrik asko, bihotz-bihotzez.

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

10 erantzun “Maskara ezin jartzeagatik zigortua” bidalketan

  1. Menpeko Hezkuntza Sistema bateko langile obeditzaileek zer da gure umeengan bermatzen dutena?

  2. Esklabuek ezin baitute gizaki librearen ausardia eta kuraia jasan, ispilu baten gisan hor ageri zaielako beren miseria, kulpa eta lotsa propioa. Horregatik gorroto dute beren ugazaba baino gehiago eta gupidarik gabe erasotzen dute, monolitikoki, beren koldarkeria ebidentzian jartzen duen edonor.

    Mila esker testigantzagatik. Besarkada.

  3. Testigantza hau lau haizeetara zabaldu beharko litzateke, borroka, ausardia eta koherentzia zer den erakusgarri, medikuntzako, hezkuntzako eta ertzaintzako funtzionarioen konplizitate nazkagarria eta obedientzia itsuaren ondorioen adibidea.
    Besarkada bat Oskar, eta animo, helegitea irabaztera!

  4. Elkartasuna saretu eta tentuz jokatu. Beste biderik ez dago. Zenbait irakaslek zurekin bat egiten dugula ziur nago. Baina ez gara asko eta ez dugu lortu indarra behar bezala bideratu. Hiritar soil ugari borroka bakarti eta latzetan.

  5. Aupa Oskar,
    Zure moduko duintasuna daukaten irakasleak (batez ere) behar ditugu.
    Eskerrik asko testigantza partekatzeagatik eta animo helegiteagaz.

  6. Aupa Oscar…nahiago nuke gure ume eta gazteek zu bezain irakasle ausartak balituzke. Aurrera!!!

  7. Aitzindaria zara borroka honetan, heroi txiki edo handi bat. Denboraren buruan eskerrak eman beharko dizkizugu.

  8. Aupa zeu! zeuek! geu! lankideen artean nabaritzen dot beldurraren ondorengo erreflezioa be…bagoaz bidean batzen…Positiboa izan gure dot…Eutsi hor!

Utzi iruzkina

Azken artikuluak