Lurrama azoka azaroaren 7, 8 eta 9an, Miarritzeko Irati areto handian

Lurrama azoka, azaroaren 7, 8 eta 9an (ostiraletik igandera), hiru egunez Miarritzeko Irati areto handian, Ipar Euskal Herriko nekazaritza-herriaren bilgune handi bat.

Milaka eta milaka laborari, laguntzaile, eskoletako haur eta ehundaka laguntzaile.

Dastaketa, erakusketa, sukaldaritza, sal-erosketa, musika, dantza, jan-edakiak, abereak, taberna, hitzaldi, liburu eta ikas-materialen azoka, eta,… zelan ez? Itzelezko erromeria eta parrandaldiak afalosteetan luze ;-)!

Bestalde, Ipar Euskal Herriko eta nonahiko herri mugimenduentzat erakustoki aparta.

Euskaldunak ugari, euskaltzaleak mugida bizi-bizi erraldoi honen muin muinean.

Aurten 20 urte! Urtero kanpoko herriren bat gonbidatzen dabe bereziki. Aurten, 20.a izanda, bereziki Euskal Herria bera gonbidatua, erran ziguten iaz. Bazter guztietako euskaldunak zinez ondo etorriak aurten.

Bi aldiz egin dogu aurreko urteetan eta aurten ere asmoa, laguntzaile moduan parte hartu ahal dozu, benetan murgilduko zara! Eskualdeen arteko lagun-sarea, euskal herria indartzeko modu ederragorik?

• Informazio gehiago: lurrama@ehlgbai.org
• Antolatzaile: Euskal Herriko Laborantza Ganbara (EHLG)
• Tixertak eta Tote-bagak erosteko, hemen, lehen aldiz, 20. urteurrena ospatzeko!
• EHLG diruz sustengatu nahi? Hemen.

Jarraian, hor behean, antolatzaileen aurtengo gonbidapen testua.

Bat egin daigun Lurraman, bai?

Lurraman argitarat eman nahi den eredua laborantza herrikoia da. Naturarekin harremana atxiki nahi da, etxalde ttipiak mantendu, bai eta kalitatezko ekoizpenak eginez bizitzeko ahala ukan. Lurramak ez du bat egiten eredu industrialarekin

Heldu diren azaroaren 7, 8 eta 9an iraganen da laborantza herrikoia eta iraunkorraren saloina, LURRAMA, Miarritzeko Irati gelan.
30 egun eskas dira Lurramako, 2025ko tematika eta ohorezko gomita aurkezten dizkizuegu.

BIHAR ERE LABORARI

Aurten Lurramak bere 20. edizioa ospatzen du eta hautatu dugun gaia da «Bihar ere laborari». Laborariek baserri munduan hainbat funtzio betetzen dituzte eta herri aktibo baten seinale dira!

Laborantxan beste arlotan bezala gazteak izaitea ezinbestekoa da dinamika aintzina eramaiteko eta geroa segurtatzeko.

Lurraman argitarat eman nahi den eredua laborantza herrikoia da, laborari eta etxalde ugarirekin. Holako ereduan naturarekin harremana atxiki nahi da, etxalde ttipiak mantendu, bai eta kalitatezko ekoizpenak eginez bizitzeko ahala ukan. Lurramak ez du bat egiten eredu industrialarekin. Produktibismoa helburu duten etxalde handiek makineria anitz baliatzeaz gain kimika erabiltzen dute lurretan, eta gainera laborari kopuru ttipi batek lur anitz eskuratzen ditu.

Herri batean, laborarien eginbehar nagusia da kalitatezko elikadura ekoiztea lekuko jendearentzat. Erran dezakegu laborantzak, elikaduraz gain beste hainbat eginkizun sozial betetzen dituela. Adibidez gure ingurumena laborantza mota baten hautua da: kanpoko hazkuntzak pentze, landa, mendi… marrazten ditu.

Bestalde, hiri edo herri gotorretatik kanpo laborariak dira tokian berean ari diren azken langileetariko batzu. Horrek ekartzen du familia bizia, kultur ekitaldien mantenzea, beste lanbide moten garatzea…

Gaur egun 6/7 zeharkako lanbide badira laborari batentzat.

Euskal Herrian den laborantza laborantza ainitza da. Etxalde ainitzek laborantza herrikoiaren bidea hartu dute. Gaur egun dinamika horri esker hainbat estruktura, desmartxa kolektibo badira Euskal herrian, izan laborariek sortua edo kontsumitzaileek ere. Beste eskualde batzuei konparatuz Ipar Euskal Herrian egoera aski ona da, eta oraindik gazte instalazio ainitz bada urtero. Ipar Euskal Herrian, urtero 200 eta 225 instalazio artean badira, eta % 75ek 40 urte baino guttiago dituzte.

Haatik, alde on horiek ez dute estali behar laborantxa munduaren garapen kezkagarria. Ipar Euskal Herrian 2010 eta 2020 urteen artean etxaldeen %15 desagertu da eta 1970 eta 2020 urteen artean %57. Gaur egun laborarien parte haundi batek 50 urte pasatua ditu . Bihar ere laborariak izaiteko elgarrekin lan egin behar dugu jendarte zibil, instituzio publiko eta laborantza munduko aktore guziek. Erronka hori betetzeko lege eta ahalak eman behar dira plantan.

20. edizio honetan Lurrama denboran izanen diren konferentziek hainbat gai aipatuko dituzte: lurraren eskuratzea, laborantza mundukoak ez direnen instalazioa, formazioa, kalitatezko markak, burujabetza...