Hautudeterminazioa

Bezeroak ogi xerratua eskatzen ari zaizkigu geroz eta sarriago. Gure lehen erreakzioa barre egitea da. Ogia mozteko gai ere ez al gara jada? Gero hausnartzen hasi eta ogia xerratua saltzeak zer suposatuko ote ligukeen aztertzen hasten gara: makina erosi, lekua bilatu, mantendu, inguruak apurrez garbitu, ogi xerratua saltzeko plastikozko poltsak erosi, etiketak edo poltsa inprimatuak eskatu…

Ogi xerratua. Bakoitzak bere arrazoiak izango ditu nahiago izateko eta ulergarriak izan litezke, baina nahiago izatetik baldintza erabakigarria izatera jauzi larri bat dago.

Propaganda

Baserritar okin batzuk elkartuta ari gara lanean, gure asmoa ogi ondradu osasungarri eta herrikoi bat ekoiztea da. Ikuspegi agroekologiko sozial batek gidatzen gaitu eta lan handiak hartzen ditugu helburu horrekin: Euskal Herriko ekoizleen artean ale ekologiko egokiak eskuratzeko saretu, irinaren kalitatea eta freskotasuna bermatzeko harrizko errotan ehotu, hartzidurarako orantza soilik erabili inongo gehigarri artifizialak baztertuz, prozesuaren mekanizazio minimoa, gertuko merkatua…. Bere konplikazioak ditu baina gogotsu aritzen gara gure lanean. Oso zaila da jendearengana iristea, jendeari ulertaraztea gure lanaren ezaugarriak, eta zailtasun horri gehitzen zaio, ospea lortzen duen edozein kontzeptu segituan irensten duela sistema komertzialak, eta xukatu egiten duela zentzubakoa bihurtu arte: artisaua, baserrikoa, su egurra, naturala, orantza edo “masamadrea”…

Hautua

Aspaldi barneratu genuen autodeterminazioa egunero praktikatzen denaren ideia. Gobernatzen gaituzten indar erraldoiak gizendu edo ahuldu egiten ditugu eguneroko hautuekin, ogia xerratua izatea erosteko irizpide garrantzitsutzat hartzea hautudeterminantea da eta horrek komertzio globalaren kapoei mesede egiten die. Berdin barazki garbitu eta moztuak kontsumitzea hautatzeak, eta zer esanik ez janari prozesatuak konsumitzeak. Baita ere txartelarekin ordaintzea, bizuma, edota zentro komertzialetan erostea… Ez dut esango korrontearen aurka igerian indartsu gabiltzan izokinak garenik, dena garden, koloretsu eta garbi. Izatekotan, haztegiko izokinak garelako eta ziur aski korrokoi generen bat txertatuta, gustatzen zaizkigulako pentsu merkeak eta zaborrak, baita ere korrontearen alde igerian ibiltzea, gaizki sentitu beharrik gabe.

Ogia xerratua izatea erosteko irizpide garrantzitsutzat hartzea hautudeterminantea da eta horrek komertzio globalaren kapoei mesede egiten die

Kaiola

Hautudeterminazio ariketa bakoitzak korapilo batez hari bat lotzen du menpekotasun ala elkartasun sarea indartuz. Hitz larriz hezi gaituzte, Mitoa Historiak ordezkatu du eta Historia gizon handiz, inperioz eta garaipen zein sarraskiz osatu dute. Horregatik gabiltza beti garaipen historikoek eragindako porrotek makurturik; Dena ala Ezerrez. Dena lortu ezinean zorabiatu egiten gara bizitzaren meandroetan, sigi-sagak norabide bat duela ahaztuz, Dena zer ote den nahastuz. Menpekotasun sarean lotzen dugun korapilo bakoitzak gure hautudeterminazio aukera murritzen du, sare zuloak txikitzen doaz eta sarea bera estutzen.

Dena lortu ezinean zorabiatu egiten gara bizitzaren meandroetan, sigi-sagak norabide bat duela ahaztuz

Ez naiz telefono mugikor zalea, duela gutxira arte eutsi diot sega-potoari lotu gabe, baina sareak harrapatu nau, une batean arriskutsu bihurtu delako. Duela urte gutxi, edonon zegoen telefono bat eskura, dei bat egiteko behar izanez gero. Orain, paradoxikoki, telefonoak ugaldu arren, aukera hori ezabatu egin da, eta, adibidez, errepidean arazo bat izanez gero, egoera larri kafkiano batean aurki gaitezke. Ez da hori bakarrik; gaur egun lan egin ahal izateko mugikorra behar da, dirua maneiatzeko, kontu korronte bat izateko, azokan saldu ahal izateko… Eta hori jendartearen erosokeriak eta lilurak ahalbidetu du, ez dute inongo indarrik erabili behar izan obligazio hori ezartzeko. Horren atzetik dator bizitzaren dijitalizazio integrala eta bizi gaituen kaiolaren presio-ahalmenaren biderketa.

Gogoa

Honaino gure Gogoaren indarraren azalpen arin bat. Merezi du honetan arreta jartzea, Arreta, Gogoa eta Jarduna. Saregileak bezala helburu komun batean elkarrekin eseri eta elkartasun sarea josi. Honekin batera menpekotasun sareak zulatu; ezinbestekoa zaigu Bizirauteko. Beste tresna guztiak, hauteskundeak, kudeaketa, protestak, matxinadak… jardun honetan laguntzen diguten neurrian soilik izan daitezke baliagarri.