Nekazari protestak

Baserritarrak herritar erosleen babesa behar du lurra defendatzen eta lantzen jarrai dezan

Erreleboa galdu dugunez, Cayetano edo Ingalaterrako Karlos bezalako latifundistek (eta orain bestelako inbertsoreek) erosten jarraituko dute gu bezalako batek uzten edo saltzen dituen lurrak.

2

Aitor Usandizaga Izagirre

Abeltzaina. Naturaren mireslea. Asteasu

Hausnarketaren ondorioak

Nire behiek, jaten ari direnean, irentsi egiten dute dena, tripa zakua bete. Gero, atseden hartzen dutenean, irentsi dutena berriro ahora ekarri eta hausnartu, xehatu, gorputzak dena ondo aprobetxatu dezan.

Badira egun batzuk nekazari eta abeltzainen protesta ekintzak hasi zirela Europako zenbait herrialdetan. Telebistan eta sare sozialetan zabaldu diren irudiak ez dira makalak eta ematen du nekazarion indarra ez dela txikia. Protesta hauei guztiei buruz gauza pare bat esan nahi nituzke: batetik, ni bezalako baserritarretzat, bizi dugun egoera adierazteko modua dela eta beharrezkoa beraz. Baina, bestetik, eta ia gu konturatu ere egin gabe, sistemari komeni zaiola gehien gu kalera ateratzea. Alegia, elikagaien prezio igoera bat ematea bada helburua, hori lortzeko gu erabiltzen gaituztela.

Merkatuko prezioak igo eta administrazioak laguntza gehiago ematen jarraitzea sektorea eta herritarrak gehiago esklabizatzea da

Horrekin ez pentsatu mozkinak guretzat izango direnik edo aberastuko garenik, ez. Erreleboa galdu dugu jada urte askotarako eta, beraz, Cayetano edo Ingalaterrako Karlos bezalako nekazari latifundistek (eta orain bestelako inbertsoreek) erosten jarraituko dute gu bezalako batek uzten edo saltzen dituen lurrak. Nola ez, gure produktuen salmentarako tartean dauzkagun industria eta saltoki handiek ere beharko dute prezio igoera horren pusketa. Eta, noski, hor azaltzen diren traktore horiek “lan efizientziarako” programa informatiko, GPS, sentsore inteligente, kamera, kontrol sistema eta abarrez hornitzeko, makina etxeek ere beraien prezioak igo beharko dituzte. Ala inork espero al du ematen dizkiguten laguntzak kendu eta prezio igoerekin aseko dituztenik gure benetako beharrak?

Gakoa hor dago: herritarrak, erosterako garaian, egiten duen hautuan

Merkatuko prezioak igo eta administrazioak laguntza gehiago ematen jarraitzea sektorea eta herritarrak gehiago esklabizatzea da. Eta garbi adierazi nahi dudan beste kontu bat: gauza bat da guk esklaboen eran lan egitea eta bestea gu kontrolatzen ari diren tekniko horiek guztiek gu esklaboak bezala tratatzea. Ea ez den inor kontzeptu hori ulertu gabe geratzen!

Baserritarrak herritar erosleen babesa behar du bere lurrak (gure lurrak) defendatzen eta lantzen jarraitu dezan. Gakoa hor baitago: herritarrak, erosterako garaian, egiten duen hautuan; zer eta non erosi. Salerosketa harremana baita, herria osatzen dugunon har-emana. Hausnartu dezagun ondo!

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

2 erantzun “Baserritarrak herritar erosleen babesa behar du lurra defendatzen eta lantzen jarrai dezan” bidalketan

  1. Oraintxe traktoreak pilaka sartzen ari dira Donostiara
    馃殰馃殰馃殰馃殰馃殰馃殰
    Trumilka datoz autobidetik

  2. Bai hoixe…baserritxarrei erosi behar zaie..goikoei jaramonik egin gabe,horrek ezbait die ezer emongo..ezgaitxezen jun makrozentruetara…
    Danok baserritxarren azoketara!!guk atera behar dugu gure herrixe aurrera…bestela jai dago.

    GEURE PRODUKTUETAN GASTA DEZAGUN!!!

Utzi iruzkina, izen eta abizenez

Azken artikuluak