Laino guztien gainetik

2012an, Berria egunkariak, “Itxi Nanogunea badaezpada” izeneko artikulua argitaratu zidan. Artikulu hartan, nanoteknologiaren arriskuez ohartarazi eta, teknologien garapenaz eta erabileraz herritarrek erabaki ahal izatea, proposatzen nuen.

Artikulu hura argitaratu eta gero, Berria-k nere kolaborazioak ordaintzeari utzi zion.

Berria-k berak, 2020ko udan “Kiberen” izeneko artikulua debekatu zidan – urte bereko urrian Independentea-k argitaratu zidana.

Artean Argia-n bestelako argiak ikusten nituen… 2021eko apirilean, edizio digitalean, “Zigorra” argitaratu zidaten. Hartan, hartzen ari ziren neurri kriminalekiko irakasle, mediku, kazetari eta politikari askoren konplizitatea seinalatzen nuen.

2021eko abenduan, aldiz, Argia-ko lagunek Pandemia zela-ta beste artikulu bat, argitaratu barik, ilunetaratu egin zidaten. Web-eko bihurguneetan bila ibili ginen, ez genuen atzeman: irakurle sinpleak ez ikusteko moduan publikatu zidaten.

Hona hemen, beraz, esan liteke, gaur lehenengoz argia ikusten duen artikulu hura.

Laino guztien gainetik…

Eztabaida zientifikorik ezak, autoritarismoak eta gehiengoaren obedientziak segitzen dute markatzen birus baten pasaeran eraikitako pandemiaren bigarren urtealdia.

baiezkoei, barrukian bizitzeko baimena luzatuko zaie, beste dosi bat hartzez gero noski, aldioro eskatuko zaiena

Gerra nola doan, futuroa nola datorren, gutxi-asko, guztiok sumatzen dugu; horren araberan hartzen ditugu erabakiak eta posizioak. Hitz bitan esateko: ezezkoak bazterrean geldituko dira; baiezkoei, berriz, alditik aldira barrukian bizitzeko baimena luzatuko zaie, beste dosi bat hartzez gero noski, aldioro eskatuko zaiena.

Ukatzaile batzuek, beren ihesean, beren arima gal edo salba dezaketen konbate moduan hartu dutena, “txertatu ala hil eginen zarete” gurutzada moduan ulertu dute, beren oldarrean, mantsoen buruzagiek.

Bart gauean, asko zekien batek, txertatuta ez daudenak ospitaleetan ez artatzea iradoki zuen irratian. Txertatu nahi ez dutenei que les den pasaporte ateraldi makabroa arrunt bihurtua Espainia aldean… Armak airean eta haginak zorrotz dabilzkigu ehiztariak.

Osasunaz eta askatasunaz bat, kontzientzia (gizakiek euren existentziaz eta euren ekintzez daukaten ezaguera) izan da izurriaren biktima nagusia.

gure kontzientziari eskapu egiten dio gertatzen ari denaren larriak; horregatik ez dugu asmatzen gaizki dagoenaren aurrean matxinatzen

Sarritan, gure kontzientziari eskapu egiten dio gertatzen ari denaren larriak; horregatik ez dakigu deitoratzen; horregatik eta arrazoi gehiagoz, ez dugu asmatzen gaizki dagoenaren aurrean matxinatzen.

Kontzientzia… zientziatik heldu da?… Bai; izurriaren beste biktima haundi bat izan da zientzia.

KOSTATA baina, “normalitate berriak” zer esan nahi zuen, misterio hura, badoa pixkanaka argitzen.

Poblazioaren zati haundi bat txertoen esperimentuan abiarazi eta gero, mundu zabaleko pobre izenekoei txertoa nola helarazi eta han-hemengo heretikoak txerta daitezen nola behartarazi, kalkulaketa dabiltza planetako nagusiak. Bide horretatik, orain, osasunarekin, osasun onarekin behintzat, izenetik hara, zerikusteko askorik ez daukan osasun-pasaportea ezarri digute.

Dagoeneko desmandatuei eta disidenteei debekatua zaie taberna eta jatetxeetan, antzoki eta zineetan, kirol instalazio eta kontzertu-aretoetan sartzea.

bizimodu berriak, poliki-poliki, lagun artean bestelako espazio eta sareak sortzera bultzatuko gaitu

Ezer ez eta festa!: disidente horietako batzuek, leku horiek guztiak erregulatuentzat utzita, dibertsioa, denborapasa eta kultura euren espazio eta maneretan egiteko xantzatzat hartzen dituzte debeku horiek.

… Eta sasi guztien azpitik: bizimodu berriak, poliki-poliki, bizigaiak atzemateko, hara eta hona ibiltzeko, osatzeko… baldinba, auzoaldean, lagun artean bestelako espazio eta sareak sortzera bultzatuko gaitu.