Txupinazoa ekintza humanitarioa da
Iruñeko Peñen Federazioak babestu zuen Yala Nafarroa Palestinarekin plataformak 2025eko Sanferminetako txupinazoa botatzeko hautagaitza. Yalak 225 kolektibo eta 1.700 pertsona baino gehiago biltzen ditu, eta iruindarren bozketaren bidez aukeratu zuten, botoen % 52,85ekin. 2016an txupinazoa botatzeko hautaketa herri bozketa bidez egitea onartu zenetik, parte-hartze handiena izan duen deialdia izan da hau. 2016a baino lehen, txupinazoak izaera politikoa zuen batzuetan eta Iruñeko alkateak edo zinegotziek botatzen zuten suziria.
Orain, komunikabide batzuk kexu dira beraien ustetan Yala Nafarroaren hautaketak izaera politikoa duelako. Ez dira gauza bera politika humanitarioa eta izaera politikoa. Politika humanitarioa, minbiziaren arloan adibidez, kaltetutako pertsonen ongizatea eta duintasuna bermatzera bideratutako ekintzak eta estrategien azalpenak dira; edo hondamendi-egoeretan, Valentziakoa kasu, kaltetuei laguntzea. Izaera politikoa, berriz, gizarte batean boterearen antolaketan eta boterea erabiltzeko moduan datza.
Hauxe da politika humanitarioa: gobernu edo erakunde batek giza sufrimendua arintzeko, pertsonen eskubideak babesteko eta haien ongizatea sustatzeko helburuarekin hartutako ekintza eta erabakien multzoa, bereziki krisi, gatazka edo hondamendi egoeretan. Gizatasunaren printzipioetan oinarritzen da.
Badirudi komunikabide batzuk beste alde batera begiratzen ari direla edo mugimendu sionistaren soldatapean daudela
Badirudi komunikabide batzuk beste alde batera begiratzen ari direla edo AEBen eta munduaren zati baten finantzak kontrolatzen dituen, arma enpresen multinazionaletan inbertitzen duen eta Israeli dirua ematen dion mugimendu sionistaren soldatapean daudela. Sionismoa XIX. mendearen amaieran agertu zen Erdialdeko eta Ekialdeko Europan. Sionistek lurrak bereganatzea, palestinarrak botatzea eta munduko boterean eragitea dute helburu.
Israeldarrek lehen ministro bat izan zuten, Yitzhak Rabin, Palestina Askatzeko Erakundearekin estatu palestinar bat negoziatzeko prest zegoena, eta 1995ean muturreko judu batek tiroz hil zuen. Zergatik ez zuen Mossadek, Israelgo inteligentzia zerbitzuak – munduko espioitza erakunde elitistenetako eta eraginkorrenetako bat denak– edo CIAk berak hitzailea geldiarazi?
NBEk (Nazio Batuen Erakundeak) genozidiotzat jotzen du Israelek Gazan egindako erasoaldia, Giza Eskubideen Batzordeak dioenez.
Bigarren Mundu Gerraren ondoren, nazioarteko zuzenbidean genozidio terminoa sartu zen lehen aldiz, Nurembergeko epaiketen akusazio-aktan, eta honela aipatu zen delitua: “Nahita egindako genozidio sistematikoa, lurralde okupatuetako biztanleria zibilaren aurka egindakoa –talde etniko eta nazionalen sarraskiaren bidez – etniak, biztanleriaren sektoreak eta talde nazional etniko eta erlijiosoak suntsitzeko asmoarekin”. Hitlerrek “azken irtenbidea” deitu zuen, hau da, erabateko sarraskia, herri judua eta nazismoak gutxiengotzat jotzen dituen gainerako taldeak behin betiko suntsitzeko asmoarekin.
Gerrak, genozidioak eta gaur egungo gizartean patriarkatuarekin zerikusia duen ezerk ez ditu haurrak errespetatzen
Israelgo Estatua sortu zenetik, sionista juduak palestinar herriaren aurkako genozidioa egiten ari dira, eta Israelgo gazteak palestinarrekiko gorrotoan doktrinatuta daude. Gerrak, genozidioak eta gaur egungo gizartean patriarkatuarekin zerikusia duen ezerk ez ditu haurrak errespetatzen. Gizartea eraldatu nahi badugu, haurrekin hasi behar dugu, gainerakoa alferra da. Mundua kontrolatzen duten jauntxoen aurrean matxinatzeko eginbeharra du herriak, haurrak baldintzarik gabeko maitasunez haziz.
Gerra batean, “jokabide sozial onak” eta legez inposatutako kontrol sozialerako mekanismoak desagertzean, sistemaren etikaren mozorroa erortzen da, eta gure inkontzientea agerian gelditzen da, hau da, herraz, larritasunez, gorrotoz eta beldurrez betetako gure trastelekua.
Palestinarrak jasaten ari diren genozidioa Ruandan ere bizi izan zuten. Han, hutu gobernu hegemonikoa tutsiak suntsitzen saiatu zen. Jugoslavia ohian indar serbio-bosniarrek milaka musulman bosniar hil zituzten…
Ez da gauza bera judua eta sionista
Ez da gauza bera judua eta sionista. Judua identitate etniko edo erlijiosoa da. Sionista hitzak, berriz, jarrera politiko edo ideologiko bat deskribatzen du eta Israelgo Lurra – Palestinan kokatuta dagoena – promesa jainkotiarra den sinesmena sustatzen du.
Juduak ikusi nituen Madrilen Palestinaren alde eta genozidioaren aurka manifestatzen.
Yala Nafarroaren manifestuak Israeli eta Palestinari dagozkien NBEren ebazpenak zorrotz betetzea eta nazioarteko komunitateak Palestinako estatua onartzea eskatzen du. Yala Nafarroak Israelgo gobernua Palestinako herriaren aurka egiten ari den okupazioa eta genozidioa amaitzea du helburu. Ekintza humanitarioa da.
