Gazan jaioa

Lerro hauek idazten ditut biziki hunkitu nauen Gazari buruzko dokumental bat ikusi eta bihotzean sentitu ostean. Gure bizitzako orduak ematen ditugu Netflix, Amazon Prime edo antzeko zinema plataformetan erdipurdiko filma edo telesailak ikusten. Zer esanik ez zenbat ordu ematen ditugun sare sozialetan! “Gazan jaioa” edo bere gaztelaniazko izenarekin “Nacido en Gaza” dokumentala ikus dezazuen animatzeko idazten ditut lerro hauek.

Israelgo gobernu terroristak Palestinaren kontra, eta bereziki Gazaren kontra, aurrera daraman gerra zigorgabe honek betidanik hunkitu nau, beste gerra edo liskar batzuen gainetik. Egun hauetan buruan eta bihotzean dut Palestina etengabe, gutariko askok bezala. Hedabideetan eta sare sozialetan gatazka honen irudiak ditugu egunotan behin eta berriz eta uste dut, horietaz gain, Gazan bizi duten egoera zertxobait ulertzeko, dokumental hau ikustea aukera paregabea dela.

69 minutuko iraupena duen “Gazan jaioa” dokumentala Netflixen aurkitu dezakegu, Hernan Zin gerra-erreportari italo-argentindarra da zuzendaria eta Jon Sistiaga kazetari euskalduna da produktoreetariko bat. 2014ko Gazako Zerrendako gerra eta gutxira grabatua, dokumental honek hamar haur palestinarren bizitzak indarkeriak nola eraldatu zituen erakusten digu. Haur hauek laguntza psikologikoa, munduko beste umeak bezalakoak izatea, bakean bizitzea edo gurasoak eta senitartekoak bizirik eduki ahal izatea besterik ez dute eskatzen. Beraien naturaltasuna, malkoak, tristura, ume aurpegiak, ume pentsakizunak, ume bihotzak, beraien egunerokotasuna, bizi duten biolentzia, pobrezia, etorkizun eta itxaropen eza… gatazka hobeto ulertzeko modu bat izan daitekeela uste dut. Gure mendebaldar bizitzatik askotan imajinatu ere ezin duguna.