Munduan, Europan eta Euskal Herrian, non-nahi geroz eta gehiago entzuten ari gara hedabideen bidez gerra danborrak. Egoeraz jabetuta, hainbat herritar bildu gara “GERRARIK EZ, EZ GURE IZENEAN” leloaren inguruan. Ez gara kolektibo bat, herriko jende arrunta baizik. Herritar independenteak gara.
Nahiz eta gerra bat eta berbera izan, fronte ugari daude martxan munduan. Gatazka zaharra da. Hibridoa da. Esparru asko ditu: militarra, ekonomikoa, energetikoa, kulturala, soziala… Hamarkadetako gatazkez gain, egunetik egunera fronte gehiago jartzen dituzte martxan: Ukraina, Palestina, Libano, Siria, Sahara, Yemen, Sudan, Somalia, Myanmar (Birmania)… Hori nahikoa ez balitz, fronte berriak ireki nahian dabiltza: Georgia, Moldavia, Hego Korea, Irak…
Gatazka horietan guztietan, NATO eta bere bazkideak sarturik daude zuzenean edo zeharka. Noski, beren interesak babesteko, eta ez herritarrenak.
Orain, egoera inoiz baino latzagoa eta arriskutsuagoa bilakatu da. Uneotan, badago mundu mailako gerra nuklearra bihurtu daitekeena eta lehertzeko zorian dagoena: Ukrainakoa hain zuzen ere.
Egoeraren larritasunaz jabetuta, herritarrok ondorengoa adierazi nahi dugu ozen lau haizetara:
1.- GERRARI EZ: hedabideen bitartez, Ukrainako gerra eta Palestinako sarraskia jarraitzen ditugu ia zuzenean. Ziurrenik Palestinakoa da gehien hunkitzen gaituena, genozidioa geure begiekin ikusten ari garelako. Baina ezin ahaztu aipatutako beste gatazka guztiak.
2. GERRA HORIEK ELIKATZEARI EZ: dagoeneko milaka milioi euro xahutu dituzte gure gobernuek gatazka leku horietara armak bidaltzen, herritarroi kontsulta egin gabe. Jakin badakigu Euskal Herriko hainbat enpresa ari dela armagintzan, gerrak elikatzen hain zuzen ere. Hori gutxi ez eta aurrekontu militarrera Barne Produktu Gordinaren %3 gutxienez bideratzea exijitzen die NATOk bere kideei. Diru kopuru izugarri hori Osasungintza, Hezkuntza, Kultura eta abar pribatizatuz lortu nahi dute. Herritarron erosahalmena eta ongizatea murrizten ari dira, gu pobretzen ari dira.
3. NATOri EZ: gogorarazi nahi dugu hego euskal herritar gehienok, Euskal Herrian egon den erreferendum bakarrean, ezezko biribila eman geniola NATOri 1986. urtean. Atlantismo erasokor honekin bukatu egin behar dugu.
4. SOLDADUSKARI EZ: soldaduska berriro inposatu nahian dabiltza Europako hainbat herrialdetan. Horren hotsak dabiltza eta herrialde batzuetan dagoeneko soldadutza berrezarri dute edo baldintzak zorroztu dituzte, datozen urteotan Europan Errusiarekin gerra bat egongo dela argudiatuz.
5.- DESINFORMAZIOARI EZ: negargarria da hedabide gehienek gai hauetaz eskaintzen duten alde bakarreko ikuspegia eta informazio lerratua. Egiten duten propaganda gerrazalea eta NATOren zuriketa lotsagarriak dira. Gerra urte, gezur urte.
Mugitzen ez bagara, laster gure seme-alabak ikus genitzake gerra-frontetik hilda ekartzen NATOren uniformearekin.
Egoera latz eta bortitz honen aurrean, NATOtik ateratzea eta gatazkan parte hartzen duten alde guztiek gerra egiteari uztea beste irtenbiderik ez dugu ikusten.
Manifestu honen bitartez, ondorengoa exijitzen dugu:
- Euskal Herriko udalek, diputazioek eta gobernuek NATOrekin harremanak puskatzea eta horretarako lan egitea exijitzen dugu.
- Euskal Herriko udal, diputazio eta gobernuei irmo eskatzen diegu ordaintzen ditugun zergen zentimo bakar bat gehiago ez bideratzeko ez Ukrainako gerrara, ez beste inongo gerrara, ezta arma bakar bat gehiago bidaltzeko ere.
- Frantziako eta Espainiako estatuetako gobernuei Euskal Herriak bozkatutakoa errespetatzeko eta NATOtik ateratzeko exijitzen diegu.
Herritarrei dei egiten diegu eskaera hauek bere egin eta mobiliza daitezen.
GERRARIK EZ, GUREKIN EZ KONTATU.
EZ GARA ZUEN GERRARA JOANGO.
EZ DIZKIZUEGU GURE SEME-ALABAK ENTREGATUKO.
GERRARIK EZ, EZ GURE IZENEAN!!!
Euskal Herrian, 2025eko urtarrilaren 4an
Herritar adierazpen hau publikoki irakurri zen 2025-01-04an Aieten egindako prentsaurreko herrikoian.
Agiriari babesa adierazteko: https://ezgoazgerrara.wordpress.com/atxikitu/
Zoragarria! Eskerrik asko ahotsa jartzeagatik.
Zoritxarrez ezinezkoa izan zait gaur Aietera joatea. Erabat ados nago komunikatuarekin. Sentitzen dut argazkia ikusi ondoren etorri den jende gutxi, nahiz eta zaudetenak mugimendu hau hazteko ernamuina zareten. Lotsagarria da komunikabideek horrelako prentsaurrekoekin eta BAKEAren mezuarekin behar bezalako oihartzunik ez izatea, eta ez gerrari buruz. Urteak eman zituzten bakeaz hitz egiten, gogaitasuneraino, ia gorrotatzeraino, potroen hitza. Ongi dago udal erakundeei, aldundiei eta abarrei eskatzea ez dezatela gerrarekin, arma-industriarekin eta Ukrainaren bidez gainera datorkigun industriarekin inolako babesik edo lankidetzarik utzi. Palestinarekin dugun elkartasunaz eta gainerako gatazka belikoez gain, egunero mota guztietako giza eskubideak urratzen baitira; badirudi, ordea, mierda gerrak hondamendi natural baten modukoak direla, eta ez boterea eta erabateko kontrola nahi dituen mundu baten ondorio. Mobilizazio jendetsuak behar direla uste dut, manifestazio nazional bat (Euskal Herria) ondo prestatuta egotea, zabaltzeko denbora emango duen propagandarekin, oso posible da. Zentzugabekeria horren aurrean gizartea aktibatzen hastea izan liteke, badirudi jendea ez dela benetan jabetzen ari.
GERRA, izan ere, dinamita dakarren gabarra itsusia baita, eta ez Athehetic-en gabarra maitea!
Ba ez dakit. Athleticeko finala ospatu zuen jende guztia Aietera joan izan balitz… Espainiarren reyzuelo frankistaren kopako finalaren hedapen mediatiko guztia hedatuko balitz albiste hau gizarteari zabaltzeko… Baina badirudi ez direla jabetzen etor dakigukeenaz. Futbol talde bat, uztez herriko klub, baina pribatua, zoriondu zuten kojonetako politikari guztiek eginbeharrak egingo balituzte, eta hainbeste urtetan demokrazia eta bakea hitzak kakaratu ondoren, armak edo armak egiteko zatiak saltzeari utziko baliote, eta NATOri ezetz eta gerrari ezetz esango baliote, agian Lemoizko zentral nuklear betiko herriak gelditu zuenean bezain pozik ibiliko ginateke denok gabarran, piraguan, traineruan edo gasolinoan.