Aurtengo barauean ere jateaz jardun dugu sarri Elosun bildutakook. Topaleku honetara jatorri eta ibilbide desberdinetatik iritsita, askotariko teoria, esperientzia eta usteak mahai gaineratzen dira gure arteko solasaldi luzeetan eta, urtero, elikadurari buruzko informazio-bilduma txukun baten beharra sentitu dugu. Barau-hausnar horretatik sortu da datorren urriko topaketa honen asmoa: Elikadura Burujabea. Sukaldatu, jan, solastu, informazioa elkarbanatu, eztabaidatu eta osasunerako hain garrantzitsua den jardunari, jateari alegia, behar duen arreta eskainiko diogu bertan.
Ostiral arratsaldean bilduko gara Elosun, afaldu, larunbat osoa igaro eta igande bazkalostera arteko egonaldia egin, dena jaso eta etxera. Denera sei otordu, bi gosari, bi bazkari eta bi afari, guztiak osagai agroekologikoekin eginak. Jana eta loa ordaintzeko, pertsonako 100 euroko botea jartzea pentsatu dugu. Zaila zaigu kostu zehatza jakitea, baina ez dugu nahi inor kanpoan geratzerik ordaindu ezin duelako, beraz, etortzeko gogo handia izan eta ordaindu ezin duenak aurrez esan dezala eta ikusiko dugu nola moldatzen garen. Dirua sobratuko balitz, bertan erabakiko genuke zer egin diru horrekin, proposamenean ez baitago inolako irabazi-asmorik.
Oraindik zehazteke dago, baina dena ez da jatea izango: janbelarrak biltzeko mendi-buelta egitea aurreikusi dugu eta saiatuko gara ekoizpen agroekologikoan aritua den norbait ekartzen azalpenak ematera, baita informazio inprimatua ere, eta bideoren bat, oraindik itxi gabe dagoen programan.
Sukaldeko sei saioak banatu egingo ditugu; horietako hiruz Lourdes Iraola arduratuko da eta bestetik Leirek eta neronek beste hirurak antolatuko ditugu, lagundu nahi duenaren parte hartzearekin.
Inork asteburua osatzeko beste proposamenik balu, egitaraua osatzerakoan aztertuko ditugu.
Jada izena eman daiteke hemen:
E L I K A D U R A B U R U J A B E A T O P A K E T A E L O S U N, urriak 10 – 12
Iradokizunik? Zalantzarik?
Idatzi: info@independentea.eus
